ބޯޑަރު ހުޅުވިފަހުން އެންމެ ގިނަ ފަސިންޖަރުން ރާއްޖެ އައީ އާދިއްތަ ދުވަހު، 871 ފަސިންޖަރުން އައި: ވީއައިއޭ
28 ސެޕްޓެމްބަރު 2020 | ހޯމަ 07:39ސެޕްޓެމްބަރު 27 ގައި 871 މީހުން ރާއްޖެ އައި
ގަތަރު އެއާވޭސްގެ ގެ ފްލައިޓެއްގައި ދަތުރުކުރި މީހުން ފްލައިޓުން ފައިބަނީ، ރާއްޖޭގެ ބޯޑަރު ކޮވިޑާއި ގުޅިގެން ބަންދުކުރުމަށް ފަހު ހުޅުވާލީ ޖުލައި 15ގައި
ރާއްޖޭގެ ބޯޑަރު ޖުލައި 15 ވަނަ ދުވަހު ހުޅުވާލިފަހުން އެންމެ ގިނަ އަދަދެއްގެ މީހުން ރާއްޖެ އައިސްފައި ވަނީ ސެޕްޓެމްބަރު މަހުގެ 27 ވަނަ ދުވަހު ކަމަށް ވެލާނާ އިންޓަނޭޝަނަލް އެއާޕޯޓުން ބުނެފިއެވެ.
ރާއްޖެޓީވީގެ ފަށާއިރު ޕްރޮގްރާމްގައި ވާހަކަ ދައްކަވަމުން ވީއައިއޭގެ ޓާމިނަލް އޮޕަރޭޝަންސްގެ ޖެނެރަލް މެނޭޖަރ އިބްރާހިމް ހުސެއިން ވިދާޅުވީ ސެޕްޓެމްބަރު 27 ވަނަ ދުވަހު ރާއްޖެއަށް 871 ފަސިންޖަރަކު އައިސްފައިވާކަމަށާއި 809 ފަސިންޖަރަކު ރާއްޖެއިން ފުރާފައިވާކަމަށެވެ. ލޮކްޑައުން ހުޅުވާލި ފަހުން އެންމެ ގިނަ ފަތުރުވެރިން އައި ދުވަހުގެ ގޮތުގައި އިއްޔެ ފާހަގަކުރެވިފައިވާއިރު މިދިޔަ ހަފްތާގެ އާދިއްތަ ދުވަހުވެސް 851 ފަސިންޖަރުން ވަނީ ރާއްޖެއައިސްފައެވެ.
އޭނާ ވިދާޅުވީ އެންމެ ގިނައިން ފަސިންޖަރުން އަންނަ ދުވަސްތަކުގެ ގޮތުގައި ފާހަގަކުރެވިފައިވަނީ ކޮންމެ ހަފްތާއެއްގެ ހުކުރު އަދި އާދިއްތަ ދުވަސްކަމަށާއި، އިއްޔެވެސް ރަޝިއާގެ އެއޮރޯފްލޯޓު ފްލައިޓްގައި 339 މީހުން ރާއްޖެ އައިސްފައިވާކަމަށެވެ. އިބްރާހިމް ވިދާޅުވީ، އެއޮރޯފްލޯޓްގެ ދަތުރުތަށް ރާއްޖެއަށް ފެށިފަހުން ރާއްޖެއަންނަ ފަސިންޖަރުންގެ އަދަދު ގިނަވެއްޖެކަމަށާއި އެންމެ ގިނައިން މީހުން އައިސްފައިވަނީވެސް ރަޝިއާއިން ކަމަށެވެ.
ކުރިޔަށް އޮތް ތަނުގައި އިތުރު އެއާރލައިިންތަކުން ރާއްޖެއަށް ދަތުރު ފަށާނެކަން ފާހަގަކޮށް އޭނާ ވިދާޅުވީ، އިއްޔެ ސްވިޒަލެންޑްގެ އޭޑަލްވައިސްއިން ރާއްޖެއަށް ސީދާ ފްލައިޓް ރާއްޖެ ފަށާފައިވާކަމަށާއި ހަފްތާއަކު ދެ ފަހަރު ދަތުރު ކުރާނެކަމަށް ވަނީ އިއުލާނު ކޮށްފައެވެ. އަދި 4 ޕްރައިވެޓް ޖެޓް ރާއްޖެ ދަތުރުކޮށްފައިވާކަން އޭނާ ފާހަގަކުރެއްވިއެވެ.
ވީއައިއޭގެ ތަފާސްހިސާބުތަކުން ދައްކާ ގޮތުން، ޑޮމެސްޓިކް 6 ފްލައިޓެއް ވެސް ވަނީ ސެޕްޓެމްބަރު 27 ގައި އޮޕަރޭޓް ކޮށްފައެވެ. އެގޮތުން މާލެ އަށް 153 މީހުން އައިސްފައިވާ އިރު، ރާއްޖޭގެ އެކި ރަށްރަށަށް 122 މީހުން ވަނީ ފުރާފައެވެ.
