އެޑެލްވެއިސް އެއަރލައިން އިން، ސްވިޒަލޭންޑާއި ރާއްޖެއާ ދެމެދު ސީދާ ދަތުރުތައް ފަށައިފި
އެ އެއަރލައިނުން ހަފުތާއަކު 2 ދަތުރުކުރާނެ
ސްވިޓްޒަލޭންޑުގެ އެޑެލްވެއިސް އެއަރލައިން، ދަތުރުތައް މެދުކަނޑާލީ ކޮވިޑް-19އާ ގުޅިގެން
ސްވިޒަލޭންޑުގެ އެޑެލްވެއިސް އެއަރލައިންއިން، ސްވިޓްޒަލެންޑާއި ރާއްޖެއާ ދެމެދު ސީދާ ދަތުރުތައް ފަށައިފިއެވެ.
ކޮވިޑް-19އާ ގުޅިގެން ދަތުރުތައް މެދުކަނޑާލުމަށްފަހު އަލުން ދަތުރުތައް ފަށާ، އާދިއްތަ ދުވަހުގެ ހަވީރުގެ ވަގުތުގައި ވެލާނާ އިންޓަނޭޝަނަލް އެއަރޕޯޓުގައި ފުރަތަމަ ފްލައިޓް ވަނީ ޖައްސާފައެވެ.
އެ އެއަރލައިނުން ހަފުތާއަކު 2 ދަތުރު ކުރާއިރު، މި ދަތުރުތައް ކުރާނީ ސްވިޒަލެންޑުގެ ޒިއުރިކުން ވެލާނާ އިންޓަނޭޝަނަލް އެއަރޕޯޓަށެވެ.
ސްވިޒަލޭންޑަކީ ރާއްޖޭގެ ފަތުރުވެރިކަމުގެ ސިނާއަތަށް މުހިއްމު މާކެޓެކެވެ. 2019 ވަނަ އަހަރު ރާއްޖޭގެ ޓޮޕް މާކެޓުގެ ތެރޭގައި ސްވިޒަލޭންޑު ހިމެނެއެވެ. ސްވިޒަލޭންޑުގެ ރައްޔިތުންނަށް ރާއްޖެ އަކީ މަގުބޫލު މަންޒިލެއް ކަމަށްވާއިރު، ސްވިޓްޒަލެންޑާއި ރާއްޖެއާ ދެމެދު ސީދާ ދަތުރުތައް ފެށުމުން ކުރިއަށް އޮތްތާނގައި ގިނަ އަދަދެއްގެ ފަތުރުވެރިން އަންނާނެ ކަމަށް ބެލެވެއެވެ.
ކޮވިޑް-19 އާ ގުޅިގެން ތިން މަހަށް ވުރެ ގިނަ ދުވަހަށް ފަހު ރާއްޖޭގެ ބޯޑަރުތައް ބަންދުކުރުމަށްފަހު، ޖުލައި މަހުގެ 15 ވަނަ ދުވަހު ބޯޑަރު ހުޅުވާލިފަހުން ގިނަ އެއަރލައިންތަކުން އަންނަނީ އަލުން ދަތުރުތައް ފަށަމުންނެވެ. އަދި މިހިނގާ ސެޕްޓެމްބަރު މަހުގެ 8 ވަނަ ދުވަހާ ހަމައަށް ރާއްޖެ އައިސްފައިވަނީ 11629 ފަތުރުވެރިންނެވެ.
