ޙިޔާނާތުގެ ބޮޑެތި ތުހުމަތުތަކާއެކު އަރްމީނިއާގެ އިދިކޮޅު ލީޑަރު ހައްޔަރަށް!

މާލީ މުއާމަލާތްތަކަށް އޮޅުވާލުމާއި ޙިޔާނާތުގެ ބޮޑެތި ތުހުމަތުތަކާއެކު އަރްމީނިއާގެ އިދިކޮޅު ލީޑަރު ޝަރީއަތް ނިމެންދެން ބަންދުގައި ބެހެއްޓުމަށް އެ ޤައުމުގެ ކޯޓުން އަމުރުކޮށްފިއެވެ.

އަރްމީނިއާގެ އިދިކޮޅު ލީޑަރު ގަޖީކް ސަރުކިޔަންގެ މައްޗަށް ކުރެވޭ ތުހުމަތުތަކުގެ ތެރޭގައި 2017 ވަނަ އަހަރު އެ ޤައުމުގައި ބޭއްވި މަޖިލިސް އިންތިޚާބުގައި ވޯޓު ގަތުމާއި، ޖުވާގެ ވިޔަފާރި ހިންގައި ދައުލަތަށް އެތަކެއް ގެއްލުންތަކެއް ދިނުން ހިމެނެއެވެ. އެގޮތުން ދައުލަތަށް 60 މިލިއަން އެމެރިކާ ޑޮލަރުގެ ގެއްލުން ދީފައިވާކަމަށް އެ ޤައުމުގެ ނޫސްތަކާ ޙަވާލާދީ އަލްޖަޒީރާގައި ރިޕޯޓް ކޮށްފައިވެއެވެ.

އެހެން ނަަމަވެސް ސަރުކިޔަން މި ތުހުމަތުތައް ދޮގު ކުރައްވައެވެ. އަދި މިއީ އެ ޤައުމުގެ ބޮޑުވަޒީރު ނިކޯލް ޕާޝިޔާ ކުޅުއްވާ ސިޔާސީ ގޭމެއް ކަމަށް އޭނާ ވަނީ ވިދާޅުވެފައެވެ. އަދި މިކަމުގެ ފަހަތުގައިވާ މީހުން ޒިންމާ ކުރުވާނެ ކަމަށްވެސް ވިދާޅުވިއެވެ.

އޭގެ އިތުރުން، މިހާރުގެ ސަރުކާރުން ކޮވިޑް-19 ފެތުރުން ކޮންޓްރޯލް ކުރުމަށް އެކަށީގެންވާ ފިޔަވަޅު ނާޅާ ކަމަށާއި، އެ ޤައުމުގެ އިޤްތިސާދު އަނދަވަޅަކަށް ވައްޓާލަމުންދާކަމަށް ވިދާޅުވެ ސަރުކިޔަން ވަނީ ސަރުކާރަށް ވަރަށް ބޮޑަށް ފާޑުވިދާޅުވެފައެވެ.

ސަރުކިޔަންގެ ވަކީލާ ޙަވާލާދީ އޭއެފްޕީ ނިއުސްގައި ރިޕޯޓް ކޮށްފައިވާ ގޮތުން ކޯޓުގެ މި އަމުރު އިސްތިއުނާފު ކުރެއްވުމަށް މިހާރު އެމަނިކުފާނު ގެންދަވަނީ މަސައްކަތް ކުރައްވަމުންނެވެ.