ކާގޯ ފެރީ ހިދުމަތުގެ އެންމެ މުހިންމު އެއް ބޭނުމަކީ ރާއްޖޭގެ އިމްޕޯޓް-އެކްސްޕޯޓްގެ ފަރަގު ކުޑަކުރުން: ސަންޖޭ ސުދީރު
26 ސެޕްޓެމްބަރު 2020 | ހޮނިހިރު 06:36ރާއްޖޭގެ އެކްސްޕޯޓަރުންނަށް އިންޑިއާގެ އިމްޕޯޓަރުންނާއި އެކު މަޝްވަރާތައް ކޮށް މުދާ ވިއްކުމުގައި އިތުރު ފުރުސަތުތަކެއް ލިބިގެންދާނެ
އިންޑިއާ އިން ރާއްޖެ އަށް ކަނޑައަޅުއްވާފައި ހުންނަވާ ސަފީރު، ސަންޖޭ ސުދީރު
އިންޑިއާ އާއި ރާއްޖެ އާއި ދެމެދު ފެށުނު ކާގޯ ފެރީ ހިދުމަތުގެ އެންމެ ބޮޑު އެއް އަމާޒަކީ ރާއްޖޭގެ އިމްޕޯޓް އަދި އެކްސްޕޯޓް އާއި ދެމެދު އޮތް ފަރަގު ކުޑަކުރުން ކަމަށް އިންޑިއާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު، ސަންޖޭ ސުދީރު ވިދާޅުވެއްޖެއެވެ.
ސަފީރު ވިދާޅުވީ، އެއްގައުމުން އަނެއް ގައުމަށް މުދާ އުފުލުމުގައި ޑައިރެކްޓް ރޫޓެއް ކަނޑައެޅިގެން ދިއުމުން މުދާ އުފުލުމުގައި ވަރަށް ގިނަ ލުއިތަކެއް ލިބިގެންދާނެ ކަމަށެވެ. އަދި ކޮޗިން އާއި ކުޅުދުއްފުއްޓާއި ދެމެދު މި ފެށުނު ހިދުމަތުގެ ސަބަބުން ރާއްޖޭގެ އެކްސްޕޯޓަރުންނަށް އިންޑިއާގެ އިމްޕޯޓަރުންނާއި އެކު މަޝްވަރާތައް ކޮށް، މުދާ ވިއްކުމުގައި އިތުރު ފުރުސަތުތަކެއް ލިބިގެންދާނެ ކަމަށް ސަފީރު ވިދާޅުވިއެވެ.
ހާއްސަގޮތެއްގައި ރާއްޖޭގެ ކުދި އަދި މެދުފަންތީގެ ވިޔަފާރިތަކަށާއި، މަސްވެރިކަމުގެ ސިނާއަތުގައި ހަރަކާތްތެރިވާ ވިޔަފާރިތަކަށް މީގެން ކުރާ ފައިދާ ބޮޑުވާނެ ކަމަށް ސަންޖޭ ސުދީރު ފާހަގަކުރެއްވިއެވެ. އަދި ކުޑަ ވަގުތުކޮޅެއްގައި އިންޑިއާގެ އެއް ބިލިއަން މީހުންގެ އާބާދީއަށް މުދާ އެކްސްޕޯޓް ކުރުމުގެ ފުރުސަތު ލިބިގެންދާނެ ކަމަށް ސުދީރު ވިދާޅުވިއެވެ.
ސުދީރު ވަނީ އެ ފެރީގައި ފިނިކުރި ބާވާތްތައް އުފުލުމުގެ އިންތިޒާމުތައް ވެސް ހަމަޖެހިފައިވާ ކަމަށް ފާހަގަކުރައްވައި މީގެ ސަބަބުން ރާއްޖޭގެ މަސްވެރިންގެ މަސް އެކްސްޕޯޓް ކުރުމުގެ ފުރުސަތު ލިބިގެންދާނެ ކަމަށް ވިދާޅުވެފައެވެ.
މީގެ އިތުރުން، މި ހިދުމަތުގެ ސަބަބުން ރާއްޖޭގެ މަސްވެރިކަމުގެ އެންމެ ބޮޑެތި މާކެޓުތަށް ކަމަށްވާ ޔޫރަޕާއި ޖަޕާނަށް އިންޑިއާގެ ކޮޗިން މެދުވެރިކޮށް މަސް އެކްސްޕޯޓް ކުރުމުގެ މަގުސަދު ފަހިވެގެން ދާނެ ކަމަށް ފާހަގަކޮށް ރާއްޖެއިން ޔޫރަޕުގެ މާކެޓަށް މުދާ ފޯރުކޮށްދެވޭ ވަރަށް ވުރެ ކޮޗިން އިން ޔޫރަޕުގެ މާކެޓަށް މުދާ ފޯރުކޮށް ދިނުމަށް ފަސޭހަވާނެ ކަމަށް ސަފީރު ސުދީރު ވިދާޅުވިއެވެ.
