ޤަވާޢިދާ ޚިލާފަށް ރުއްގަސް ކެނޑުމާއި ގުޅިގެން ނަޑެއްލާ ކައުންސިލް 20،000 ރުފިޔާއިން ޖުރިމަނާކޮށްފި
25 ސެޕްޓެމްބަރު 2020 | ހުކުރު 07:28ކައުންސިލަށް އަންގާފައިވަނީ ބަންދު ދުވަސްތައް ހިމަނައިގެން 30 ދުވަހުގެ މުއްދަތުގެ ތެރޭގައި ޖޫރިމަނާ ފައިސާ ދެއްކުމަށް
ގދ. ނަޑެއްލާ - ގަވާޢިދާ ޚިލާފަށް ރުއްގަސް ކެނޑުމާއި ގުޅިގެން އެރަށު ކައުންސިލް ވަނީ ޖޫރިމަނާ ކޮށްފައި
ގަވާޢިދާ ޚިލާފަށް ރުއްގަސް ކެނޑުމާއި ގުޅިގެން ގދ. ނަޑެއްލާ ކައުންސިލް ޖުރިމަނާކޮށްފިއެވެ.
އެންވަޔަރަންމެންޓަލް ޕްރޮޓެކްޝަން އޭޖެންސީ (އީޕީއޭ) އިން ބުނީ ނަޑެއްލާގައި ވަށައިގެން މަގެއް ހެދުމަށް، ރުއްގަސް ކެނޑުމާއި، ފުރުމާއި، ކޮނެގެން ނަގާފައިވާކަން އެ އޭޖެންސީ އިން ބެލި ބެލުމުން ފާހަގަކުރެވިފައިވާ ކަމަށެވެ.
ދިވެހިރާއްޖޭގެ ތިމާވެށި ރައްކާތެރިކޮށް ދެމެހެއްޓުމާ ބެހޭ ޤާނޫނުގެ ދަށުން ހެދިފައިވާ ގަވާއިދުގެ 20 ވަނަ މާއްދާގެ (ހ) ގެ 10 ވަނަ ނަންބަރަށް ރިޢާޔަތްކޮށް 20،000 ރުފިޔާއިން އެ ރަށުގެ ކައުންސިލް ޖޫރިމަނާކުރުމަށް ސެޕްޓެމްބަރު މަހުގެ 2 ވަނަ ދުވަހު ނިންމާފައިވާ ކަމަށެވެ.
އެ ކައުންސިލް ޖޫރިމަނާކޮށްފައިވަނީ އެގާނޫނުގެ ދަށުން ހެދިފައިވާ ތިމާވެއްޓަށް އަސަރުފޯރާ މިންވަރު ބަޔާންކުރާ ރިޕޯޓު ހެދުމާބެހޭ ޤަވާއިދުގެ ދަށުންނެވެ.
އީޕީއޭ އިން އެ ރަށު ކައުންސިލަށް އަންގާފައިވަނީ ބަންދު ދުވަސްތައް ހިމަނައިގެން 30 ދުވަހުގެ މުއްދަތުގެ ތެރޭގައި ޖޫރިމަނާ ފައިސާ ދެއްކުމަށެވެ.
