މަސްވެރިކަމުގެ ސިނާއަތަށް ކޮވިޑް ތެރޭގައި ބޮޑު އަސަރެއް ނުކުރޭ، ދިމާވީ ހަމައެކަނި ފައިސާ ދިނުމުގެ މައްސަލަ: މިނިސްޓްރީ

މަސްވެރިކަމުގެ ސިނާއަތަށް ކޮވިޑް ތެރޭގައި ބޮޑު އަސަރެއް ނުކުރާކަމަށާއި ދިމާވީ ހަމައެކަނި ފައިސާ ދިނުމުގެ މައްސަލަ ކަމަށް ފިޝަރީޒް މިނިސްޓްރީން ބުނެފިއެވެ.

ކޮވިޑާއި ގުޅިގެން މުޅި ރާއްޖޭގެ އިގްތިސާދު އަނދަވަޅަކަށް ވެއްޓިފައިވާއިރު، ގިނަ ދުވަސްތަކެއް ވަންދެން ރާއްޖެއަށް އެންމެ ބޮޑަށް ބޭރު ފައިސާ ވަންނަ ފަތުރުވެރިކަމުގެ ސިނާއަތްވެސް ހުއްޓިފައި އޮތެވެ. ގިނަ ގޮންޖެހުންތަކާއި ކުންފުނިތަކުން ކުރިމަތިލިއިރު، ވަޒީފާއިން ވަކި ކުރި މުވައްޒަފުންގެ އަދަދުވެސް ދިޔައީ އިތުރުވަމުންނެވެ.

ސަރުކާރުގެ ފަރާތުން ކޮވިޑާއި ގުޅިގެން އާމްދަނީއަށް އަސަރު ކުރި ފަރާތައް އިންކަމް ސަޕޯޓް އެލަވެންސްގެ ގޮތުގައި 5000 ރުފިޔާ ދެމުން ގެންދާއިރު ބައެއް މަސްވެރިން ވެސް ވަނީ އެ ފަރާތްތަކަށް އެ އެހީތެރިކަން ނުލިބެނީ ކީއްވެތޯ ސުވާލު އުފައްދާފައެވެ.

މިކަމާއި ގުޅިގެން، ރާއްޖެޓީވީގެ "ފަލަސުރުހީ" ޕްރޮގްރާމްގައި ވާހަކަދައްކަވަމުން، ފިޝަރީޒް މިނިސްޓްރީގެ ސްޓޭޓް މިނިސްޓަރ ހަސަން ރަޝީދު ވިދާޅުވީ ކަނޑުމަހުގެ މަސްވެރިކަމުގައި ކޮވިޑްގެ ތެެރޭގައި ވެސް މަހަށް ދިޔަ އެއްވެސް ބަޔަކަށް ހީނަރުކަމެއް އައިކަމަކަށް ފާހަގަ ނުކުރެވޭކަމަށާއި, މަސްވެރިން ބާނައިގެެން ގެނައި ހުރިހާ މަހެއް މިފްކޯއިން ގަންނަމުން ދިޔަކަމަށެވެ.

ފައިސާ ލިބުމުގައި ލަސްތަކެއް އުޅުނު ނަމަވެސް ލިބެންޖެހޭ އެއްޗެއް ލިބުނު ކަމުގައި އޭނާ ވިދާޅުވިއެވެ. އޭނާ ވިދާޅުވީ މަސްވެރިކަމުގެ ސިނާއަތުގައި ހަރަކާތްތެރިވާ ފަރާތްތަކަށް އެހެން ސިނާއަތްތަކުގައި ހަރަކާތްތެރިވި ފަރާތްތަކަށް ކުރި ފަދަ އަސަރެއް ކުރިކަމަށް ބުނެވެން ނެތްކަމަށެވެ. އަދި އެއިރު ފަލަސުރުހީ ތަކުންވެސް ގިނަ ބަޔަކު ވަޒީފާއިން ވަކި ވުމާއި އެކު މަހަށް ގޮސް އާމްދަނީ ހޯދަން ފެށިކަން އޮތުން އެއީ ހެއްކެއް ކަމަށް އޭނާ ވިދާޅުވިއެވެ.

އަދި އިންކަމް ސަޕޯޓާއި ގުޅިގެން ލިބުނު ޝަކުވާތައް ބެލިކަމަށާއި އެކަން ކުރަނީ އެހެން ވުޒާރާއަކަށް ވުމުން ކަން ހިނގާގޮތް ރަނގަޅަށް އެނގިނުލައްވާކަމަށެވެ.

މަސްވެރިކަމުގެ ސިނާއަތް ކުރީގައި އޮތްނަމަވެސް ކަންނެލީގެ މަސްވެރިންނަށް ގޮންޖެހުންތަކަކާއި ދިމާވިކަމަށެވެ. އެގޮތުން، އެ ފަރާތްތަކަށް ރަނގަޅު އަގެއް ލިބެނީ ތާޒާކަންމަތީ ބޭރުކުރުމުން ކަމަށާއި ކަންނެލީގެ މަސްވެރިކަމަށް ވަރަށް ބޮޑު ހީނަރުކަމެއް އައިކަމަށެވެ. އެގޮތުން ކުންފުނިތަކަށް މަސް ގަތުމަށް ވެސް ދަތިތަކާއި ކުރިމަތިވި ކަމަށެވެ.

އަދި މިކަމާއި ގުޅިގެން މިނިސްޓްރީން ބޮޑު ކަންނެލީގެ މަސްވެރިކަމުގައި އުޅުއްވާ ފަރާތްތަކާއި މަޝްވަރާކޮށް އެ ވަގުތައް ގެނެވެން އޮތް ހައްލެއް ގެނައިކަމަށާއި ވައިގެ ދަތުރުތައް ފެށުމާއި އެކު ގަންނަ އަގު އުފުލިފައިވާ ކަމަށް ހަސަން ވިދާޅުވިއެވެ.