މަސްވެރިކަން އޮންނަން ޖެހޭނީ ދިވެހި އާއިލާތައް އަތް މަތީގައި، ބިދޭސީންނަށް މި ސިނާއަތް ދޫކޮށްލަން ސަރުކާރުން ފުރުސަތު ނުދޭނެ: މިނިސްޓްރީ
ބިދޭސީންނަށް މަދުން ނަމަވެސް ދޯނި ތަކުގައި އުޅުމުގެ ހުއްދަ ދިނުމުގެ ވިސްނުން އެބަހުރި
މާލެ ބަނދަރުގައި އޮތް ދޯންޏަކަށް މަސް އަރުވަނީ
މަސްވެރިކަން އޮންނަން ޖެހޭނީ ދިވެހި އާއިލާތައް އަތް މަތީގައި ކަމަށާއި ބިދޭސީންނަށް މި ސިނާއަތް ދޫކޮށްލަން ސަރުކާރުން ފުރުސަތު ނުދޭނެކަމަށް ފިޝަރީޒް މިނިސްޓްރީން ބުނެފިއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުން، ފިޝަރީޒް މިނިސްޓްރީގެ ސްޓޭޓް މިނިސްޓަރ ހަސަން ރަޝީދު ވިދާޅުވީ މަސްވެރިކަމުގެ ސިނާއަތުގައި އަދި މަސްދޯނިތަކުގައި ބިދޭސީން އުޅުނު ނަމަވެސް އެފަދަ ހުއްދައެއް މިހާތަނަށް ދީފައި ނުވާނެކަމަށާާއި ބިދޭސީންނަށް މަދުން ނަމަވެސް ދޯނި ތަކުގައި އުޅުމުގެ ހުއްދަ ދިނުމުގެ ވިސްނުން އެބަހުރި ކަމަށެވެ. އަދި އެ ހުއްދަ ނުދޭކަން ފާހަގަކުރައްވައި ހަސަން ވަނީ މަސްދޯނިތަކުން މިވަގުތު މަހަށް ދާންޖެހޭނީ ގަވާއިދާއި އެއްގޮތަށް ދިވެހިން އެކަނި ކަމަށް ތަކުރާރުކުރައްވާފައެވެ.
އޭނާ ވިދާޅުވީ، ގަވާއިދުތަކަށް އަމަލު ނުކުރާނަމަ، އެއީ އިލީގަލް ފިޝިންގ ކަމަށް ބެލެވޭނެ ކަމަށާއި އެކަމުގެ ސަބަބުން މަސް އެކްސްޕޯޓް ކުރުމަށް ގިނަ ގޮންޖެހުންތަކާއި ކުރިމަތިލާންޖެހޭކަމަށެވެ. އަދި މިފަދަ މައްސަލަތައް ހައްލު ކުރުމަށް މަސައްކަތް ކުރަމުން އަންނަ ކަމަށްވެސް، އޭނާ ވިދާޅުވިއެވެ. ބިދޭސީން އުޅޭ މިންވަރު ހައްލުކުރުމަށް ކަމާއި ގުޅޭ ވުޒާރަތަކާއި ގުޅިގެން މިނިސްޓްރީން މަސައްކަތް ކުރަމުންދާކަން ފާހަގަކުރައްވައި ހަސަން ވިދާޅުވީ، އުސޫލުތައް, މިހާރު ކުރަމުންދާ މަސައްކަތްތަކާއި އެކު ވަރަށް އަވަހަށް އާންމުވާނެކަމަށެވެ. އަދި ކުރިޔަށް އޮތްތަނުގައި އެކަންތައްތައް ހައްލުވެގެންދާނެ ކަމަށް ހަސަން ފާާހަގަކުރެއްވިއެވެ.
ޕްރޮގްރާމްގައި އިތުރަށް ވާހަކަ ދައްކަވަމުން ހަސަން ވިދާޅުވީ، ސަރުކާރުގެ ވިސްނުމަކީ ޒަމާނުއްސުރެން އެކަން އޮންނަ ގޮތަށް އާއިލީ ވިޔަފާރިއަކަށް ހެދުން ކަމަށާއި މަސްވެރިން ވެސް އެބޭފުޅުންގެ އަތްމަތިން މި މަސައްކަތް ބީކޮށްލައިގެން ނުވާނެކަމަށެވެ. މަސްވެރިންނަށް ކޮންމެ ބަޔަކުވެސް އިންވެސްޓްކޮށްފާނެކަމަށާއި ގިނަ ފަހަރު އެ ވިޔަފާރިއެއް ކާމިޔާބު ނުވާކަން އޭނާ ފާހަގަކުރެއްވިއެވެ. އަދި ބޭރު މީހުން ސިނާއަތުގައި ހަރަކާތްތެރިވާނަމަ މެދުފަންތީގެ އޮޑިވެރިންނަށް ބޮޑު ގެއްލުމެއް ލިބިދާނެކަމަށާއި މި ސަރުކާރުން އެ ފުރުސަތެއް ނުދޭނަކަމަށް ހަސަން ވިދާޅުވިއެވެ.
ސަރުކާރުގެ ވިސްނުމަކީ، މަސްވެރިކަމުގެ ސިނާއަތުގައި ހަރަކާތްތެރިވާ ދިވެހިންގެ ނިސްބަތް އިތުރުކޮށް، ދިވެހިންގެ އާއިލާތައް އަތްމަތީ ސިނާއަތް އޮތުންކަމަށް ފިޝަރީޒް މިނިސްޓްރީން ވަނީ ބުނެފައެވެ.
