ކަލާސް ޓީވީން ގެނެސްދޭ މަގްބޫލް ރިއަލިޓީ ޝޯ "ބިގް ބޮސް" ބޮޑު އަގެއްގައި ހޯސްޓްކޮށްދޭ ބޮލީވުޑްގެ މަޝްހޫރު އެކްޓަރު ސަލްމާން ހާން މިފަހަރުގެ ސީޒަނުގައި ފީ ކުޑަކޮށްދޭން ތައްޔާރަށް ހުރިކަމަށް މީޑިއާތަކުން ރިޕޯޓުކޮށްފިއެވެ.

ކޮވިޑް-19 ގެ ސަބަބުން މާލީގޮތުން ދިމާވެފައިވާ ހާލަތުގެ ސަބަބުން ބިގް ބޮސްގެ ޓީމަށް މުސާރަ ދިނުމަށްޓަކައި، ސަލްމާންގެ ފީ ކުޑަކުރިޔަސް އޭނާގެ އެއްވެސް މައްސަލައެއް ނެތްކަމަށް ސަލްމާން ވަނީ ޝޯގެ ޕްރޮޑިއުސަރު ގާތުގައި ބުނެފައެވެ.

އާންމު ގޮތެއްގައި ސަލްމާން ހޯސްޓްކޮއްދޭ ކޮންމެ އެޕިސޯޑަކަށް 5 މިލިޔަނެއްހާ ރުޕީޒް އޭނާއަށް ލިބެއެވެ. ބިގް ބޮސް ސީޒަން 4 އިން ފެށިގެން ހޯސްޓް ކުރަމުން އަންނަނީ ސަލްމާން ހާންއެވެ.

ބިގް ބޮސް ސީޒަން 14 ފެށުމަށް ހަމަޖެހިފައިވަނީ އަންނަ މަހު 3 ގައެވެ.