އެންމެ މެމްބަރުން ގިނައީ އެމްޑީޕީގެ، އެންމެ މެމްބަރުން މަދީ ލޭބަރ ޕާޓީގެ!

52952 (ފަންސާސް ދެ ހާސް ނުވަ ސަތޭކަ ފަންސާސް ދެ) މެމްބަރުންނާއެކު އެންމެ މެމްބަރުން ގިނަ ޕާޓީއަކީ ސަރުކާރު ހިންގާ މައި ޕާޓީ، އެމްޑީޕީ ކަމަށް އިލެކްޝަންސް ކޮމިޝަންގެ ހިސާބުތަކުން ދައްކައިފި އެވެ.

އިލެކްޝަންސް ކޮމިޝަންގެ ފަރާތުން ވަނީ ޕާޓީތަކުން ހުށަހަޅާފައިވާ ފޯމްތައް ޕްރޮސެސްކޮށް ނިންމާފަ އެވެ. އަދި އެޔާއެކު ޕާޓީތަކުގެ ދަފްތަރަށް އައި ބަދަލުތައް އިލެކްޝަންސްގެ ފަރާތުން އާންމުކޮށްފައިވެއެވެ.

Advertisement

އިލެކްޝަންސް ކޮމިޝަންގެ މައުލޫމާތުތައް ދައްކާގޮތުން އަހަރު ފެށިގެން މިހާތަނަށް އެމްޑީޕީގެ މެމްބަރުންގެ އަދަދު ވަނީ ދަށަށް ގޮސްފަ އެވެ. އެގޮތުން 31 ޑިސެމްބަރު 2019 ވަނަ ދުވަހު އާންމުކުރި ހިސާބުތަކާއި، އިލެކްޝަންސް ކޮމިޝަނުން ބުރާސްފަތި ދުވަހު އާންމުކުރި އަދަދުތަކަށް ބަލާއިރު، އެމްދީޕީގެ މެމްބަރުންގެ އަދަދު 1149 މެމްބަރުން ވަނީ މަދުވެފަ އެވެ.

މި މުއްދަތުގައި އިދިކޮޅު ޕީޕީއެމްގެ މެމްބަރުންގެ އަދަދު އިތުރުވިނަމަވެސް، ޕީއެންސީގެ މްމަބަރުންގެ އަދަދު ވަނީ ދަށްވެފަ އެވެ. އެގޮތުން ޕީޕީއެމްގެ މެމްބަރުންގެ އަދަދު 1071 އިތުރުވެފައިވާއިރު، ޕީއެންސީގެ މެމްބަރުންގެ އަދަދު ވަނީ 217 ދަށްވެފަ އެވެ.

އިލެކްޝަންސް ކޮމިޝަންގެ މައުލޫމާތުތައް ދައްކާގޮތުން، ސިޔާސީ ޕާޓީތަކުގެ ދަފްތަރުގައި ތިބި ޖުމްލަ މެމްބަރުންގެ އަދަދު 134720 (އެއް ލައްކަ ތިރީސް ހަތަރުހާސް ހަތް ސަތޭކަ ވިހި) އަރަ އެވެ.