ރެނެސްގެ ގޯލްކީޕަރު މެންޑީ ޗެލްސީއަށް

ރެނެސްއަށް ކުޅެމުން އައި ފްރާންސްގެ ގޯލްކީޕަރު އެޑޮއާޑް މެންޑީ ޗެލްސީއަށް ބަދަލުވެއްޖެއެވެ.

ޗެލްސީން މި ޓްރާންސްފާ ބާޒާރުގައި ގޯލްކީޕަރެއްގެ ސޮއި ހޯދީ ޗެލްސީގެ މިހާރުގެ ގޯލްކީޕަރު ސްޕެއިނުގެ ކެޕާ އަރިއްޒަބަލާގާއާ މެދު އެ ޓީމުގެ ކޯޗު ފްރޭންކް ލަމްޕާޑް ހިތްހަމަނުޖެހޭތީ ކަމަށް ރިޕޯޓުތައް ބުނެއެވެ. ދުނިޔޭގެ އެންމެ އަގުބޮޑު ގޯލްކީޕަރުގެ ގޮތުގައި 2018 ވަނަ އަހަރު ކެޕާ ޗެލްސީއަށް ބަދަލުވީ 71.6 މިލިޔަން ޕައުންޑުގެ ފީއަކަށެވެ. އެކަމަކު ޗެލްސީން ކުޅުނު ގިނަ މެޗުތަކުގެ ކެޕާގެ ފަރާތުން ގިނަ ގޯސްތަކެއް ފެނިފައިވާއިރު، ކެޕާއަށް ޗެލްސީގެ ސަޕޯޓަރުންވެސް ނުރުހެއެވެ.

އެއާއެކު ޗެލްސީން އުމުރުން 28 އަހަރުގެ މެންޑީގެ ސޮއި ހޯދީ ރެނެސްއަށް 22 މިލިޔަން ޕައުންޑް ދެއްކުމަށްފަހުއެވެ. ލަމްޕާޑް ވަނީ ޗެލްސީން މެންޑީގެ ސޮއި ހޯދުމަށް އެޓީމުގެ ކުރީގެ ގޯލްކީޕަރު އަދި މިހާރު އެ ކުލަބުގެ ޓެކްނިކަލް ޕާފޯމަންސް އެޑްވައިޒަރު ޕީޓަ ޗެކް މުހިންމު ދައުރެއް އަދާކުރިކަން ހާމަކޮށްފައެވެ. ޗެލްސީގެ ލެޖެންޑެއްގެ ގޮތުގައި ފާހަގަކުރެވޭ ޗެކް މީގެ ކުރިން ޗެލްސީއާ ގުޅުނީ ރެނެސްއަށް ކުޅުމަށްފަހުއެވެ.

ރެނެސް ދޫކޮށް މެންޑީ ޗެލްސީއަށް ބަދަލުވިއިރު، މީގެ ކުރިން ރެއިމްސްއަށްވެސް ކުޅުނު މެންޑީ ވަނީ މިދިޔަ ސީޒަނުގައި ރެނެސްގައި މޮޅު ކުޅުމެއް ދައްކާފައެވެ. އެގޮތުން އޭނާ ވަނީ މިދިޔަ ސީޒަނުގެ 33 މެޗުގައި ރެނެސްގެ ގޯލް ބަލަހައްޓާފައެވެ. އަދި މި ސީޒަނުގެ ފްރެންޗް ލީގު ފެށިގެން ކުރިއަށްދާއިރު، އޭނާ ޗެލްސީއަށް ބަދަލުވީ ލީގުގެ އެއް މެޗުގައި ރެނެސްގެ ގޯލު ބެލެހެއްޓުމަށްފަހުއެވެ.

ޗެލްސީން މި ސީޒަނަށް މެންޑީގެ ސޮއި ހޯދިއިރު، ޗެލްސީން އަންނަނީ މި ފަހަރުގެ ޓްރާންސްފާ ބާޒާރުގައި ވަރަށް ބޮޑަށް ހަރަކާތްތެރިވަމުންނެވެ. އެގޮތުން މިހާތަނަށް އެ ކުލަބުން ވަނީ އަށް ކުޅުންތެރިއެއްގެ ސޮއި ހޯދާފައެވެ. އެއީ މެންޑީގެ އިތުރުން ބަޔާ ލެވަކޫސެނަށް ކުޅެމުން އައި ޖަރުމަންގެ ޒުވާން ތަރި ކައި ހަވާޓްޒް އާއި، ޒުވާން ޑިފެންޑަރު މަލަންގް ސާ އާއި، ލެސްޓާ ސިޓީގެ ޑިފެންޑަރު ބެން ޗިލްވެލް އާއި، އާރްބީ ލެއިޕްޒީގްގެ ފޯވާޑް ޓިމޯ ވާނާ އާއި، އަޔަކްސްގެ ހަކީމް ޒިޔެކް އާއި ޕީއެސްޖީއަށް ކުޅުނު ބްރެޒިލްގެ ޑިފެންޑަރު ތިއާގޯ ސިލްވާގެ އިތުރުން ނެދަލެންޑްސްގެ ޒުވާން ޑިފެންޑަރު ވިއޭ އެމްބުޔަމްބާއެވެ.

ރިޕޯޓުތައް ބުނާ ގޮތުން ޗެލްސީން މިހާތަނަށް ވަނީ މި ޓްރާންސްފާ ބާޒާރުގައި 220 މިލިޔަން ޕައުންޑަށްވުރެ ގިނައިން ޚަރަދުކޮށްފައެވެ.