ބޮޑުމިނުގައި 4.6 ހެކްޓަރުގެ ލ. ބޮޑުފިނޮޅަކީ މީގެ 12 އަހަރު ކުރިން ޓޫރިޒަމް ޓްރެއިނިންގ ރިސޯޓެއްގެ ގޮތުގައި ތަރައްގީ ކުރުމަށް ޕްރެމިއަ އެކުއިޓީ ޕްރައިވެޓް ލިމިޓެޑާއި ހަވާލުކޮށްފައިވާ ރަށެކެވެ.
މި ރަށަކީ ލާމުގެ އެންމެ ރީތި ރަށްތަކުގެ ތެރެއިން ފާހަގަކޮށްލެވޭ ގުދުރަތީ މުއްސަނދިކަން ލިބިފައިވާ ރަށެކެވެ. 25 އަހަރު ދުވަހަށް ޕްރެމިއަ އެކުއިޓީ ކުންފުންޏަށް ދޫކޮށްފައިވާ މިރަށުގައި މިއަދާ ހަމައަށް ވެސް އެއްވެސް މަސައްކަތެއް ނުކޮށް އޮތް އޮތުމަކީ ލާމު އަތޮޅުގެ ރައްޔިތުންގެ ކަންބޮޑުވުމެކެވެ.
މިއީ ލ. ގަމުގެ ވެސް އަދި އަތޮޅުގެ ވެސް ޓޫރިޒަމް ކުރިއެރުވުމަށް ވަރަށް މުހިންމު މަޝްރޫއަކަށްވާއިރު، ޓްރެއިނިން ރިސޯޓު ހަދަން ދީފައިވާ ސަރަހައްދު އެއްކޮށް މިހާރު އޮތީ ވީރާނާ ވެފައެވެ. މި ސަރަހައްދު އަލުން ތަރައްގީކޮށް ޓޫރިޒަމް ދާއިރާ ކުރިއެރުވުމަށް ލާމު އަތޮޅުގެ ރައްޔިތުން ތިބީ ކެތްމަދު ވެފައެވެ. އަދި މިކަމުގައި ގަމު ދާއިރާގެ މެންބަރުގެ ވެސް ކަންބޮޑުވުން އިންތިހާއަށް ވަނީ ގޮސްފައެވެ.
ރާއްޖެއެމްވީއަށް މައުލޫމާތު ދެއްވަމުން ގަމު ދާއިރާގެ މެންބަރު މުހައްމަދު ވިސާމް ވިދާޅުވީ، ލ. ގަމަކީ ލޯކަލް ޓޫރިޒަމަށް ފައްކާވަމުން އޭގެ ވިޔަފާރި ކުރަމުން އަންނަ ރަށެއް ކަމަށެވެ. އެގޮތުން ތުނޑީ އަވަށުގެ ގޮނޑުދޮށުން ސަރަހައްދަކާއި، އެ އަވަށާއި ކައިރީގައިވާ ދެ ފަޅު ރަށް އަމިއްލަ ފަރާތަކަށް ދީފައި އޮތްއިރު، އެތަނުގައި އެއްވެސް މަސައްކަތެއް ނުފެށި އޮތުމަކީ ގަމުގެ ރައްޔިތުން އިންތިހާއަށް ކަންބޮޑުވާ ކަމެއް ކަމަށެވެ.
"މިއަދު 12 އަހަރުވެގެންދިޔައިރު މި ބޮޑުފިނޮޅު ޕްރޮޖެކްޓް ނުފަށާ ދިގުދެމިގެންދާއިރު ގަމު ރައްޔިތުންނަށް އަތް އުރާލައިގެން ތިބެވޭކަށް ނެތް. ގަމުގެ އިގްތިސާދާ އަދި އަޅުގަނޑުމެންގެ ކުރިއެރުން ހަގީގަތުގައިވެސް ބިނާވެފައި އޮތީ މިސަރަހައްދުތައް ތަރައްގީ ކުރެވިގެން."ގަމު ދާއިރާގެ މެންބަރު މުހައްމަދު ވިސާމް
ވިސާމް ވަނީ ލާމު ބޮޑުފިނޮޅު ތަރައްގީ ނުކޮށް މިހާ ދުވަސް ވަންދެން ދޫކޮށްލާފައި އޮތުމާ ގުޅިގެން ޓޫރިޒަމް މިނިސްޓަރ ޑރ. އަބްދުﷲ މައުސޫމުގެ ސަމާލުކަމަށް ވެސް އެކަން ގެންނަވާފައެވެ. މިނިސްޓަރަކާއެކު ވިސާމް ބޭއްވި ބައްދަލުކުރެއްވުމުގައި އެރަށުގައި ޓޫރިޒަމްގެ މަސައްކަތް ވީއެންމެ އަވަހަށް ފެށުމުގެ މުހިންމު ކަމާގުޅޭގޮތުން ވަނީ ފުޅާ ދާއިރާއެއްގައި މަޝްވަރާ ކުރައްވާފައެވެ.
ރައްޔިތުންގެ ކުރިއެރުމާއި ގުޅިފައިވާ މިފަދަ ތަންތަން ތަރައްގީވަމުންދާނަމަ އެކަމަކީ އެސަރަހައްދެއްގައި ދިރިއުޅެމުންދާ އެތައް ރައްޔިތަކަށް އެކަމުގެ ނަފާ ލިބިލިބި ހުންނާނެ ކަމެއްކަން ޔަގީނެވެ. ވިސާމް ވިދާޅުވީ ރައްޔިތުންގެ ހައްގެއް ބަންދުކޮށްގެން ލިބޭނެ އެއްވެސް މަންފާއެއް ނޯންނާނެ ކަމަށެވެ.
ރާއްޖޭގެ ރީތި ރަށްތަށް އެ އަތޮޅުތަކުގެ ރައްޔިތުންނަށް އެއްވެސް މަންފާއެއް ނުވާ ގޮތަށް ޓޫރިޒަމް ދާއިރާގައި މަސައްކަތް ކުރާ މަހުޖަނުން ދިގު މުއްދަތަށް ނަގައި އެތަންތަނުގައި އެކަށީގެންވާ މަސައްކަތެއް ނުކޮށް ދޫކޮށްލާފައި ހުރުމަކީ ރައްޔިތުން ކަންބޮޑުވާ ކަމެކެވެ. އެގޮތުން މިހާރުވެސް ރާއްޖޭގެ ގިނަ ސަރަހައްދުތަކެއްގައި ޓޫރިޒަމަށާއި ދަނޑުވެރިކަމަށް އަދި ސިނާއީ ބައެއް މަސައްކަތަށް ދޫކޮށްފައި ހުރި ރަށްތަކުގައި އެއްވެސް މަސައްކަތެއް ނުކޮށް ހުންނަކަން ފާހަގަކޮށްލެވެއެވެ.
