މޮރާޓާ އަލުން އަނބުރާ ޔުވެންޓަސްއަށް

ލޯނު އެއްބަސްވުމެއްގެ ދަށުން އެތުލެޓިކޯ މެޑްރިޑުގެ ސްޕެއިންގެ ފޯވާޑް އަލްވާރޯ މޮރާޓާ އަލުން އަނބުރާ ޔުވެންޓަސްއާ ގުޅިއްޖެއެވެ.

މިއީ އުމުރުން 27 އަހަރުގެ މޮރާޓާ ޔުވެންޓަސްއާ ގުޅުނު ދެވަނަ ފަހަރެވެ. އޭނާ މީގެ ކުރިން ވަނީ ޔުވެންޓަސްއަށް 2014ން 2016ށް ކުޅެފައެވެ.

ލޯނު އެއްބަސްވުމެއްގެ ދަށުން މޮރާޓާ ޔުވެންޓަސްއާ ގުޅުނީ މި ސީޒަނުގެ ނިޔަލަށެވެ. އެކަމަކު މި އެއްބަސްވުމުގެ ދަށުން ޔުވެންޓަސްއިން ބޭނުންވެއްޖެ ނަމަ، ސީޒަން ނިމުމުން މޮރާޓާގެ އެއްބަސްވުން ދާއިމީކުރުމުގެ ފުރުސަތު އެބައޮތެވެ. އެގޮތުން އެއްބަސްވުން ދާއިމީ ކުރާނަމަ ޔުވެންޓަސްއިން 45 މިލިޔަން ޔޫރޯ ދައްކަން ޖެހޭނެ ކަމަށް ރިޕޯޓުތައް ބުނެއެވެ. އަދި އެއްބަސްވުން ދާއިމީ ނުކޮށް ލޯނުގެ މުއްދަތު އިތުރު ކުރާނަމަ ކޮންމެ ސީޒަނަކަށް 10 މިލިޔަން ޔޫރޯ ދައްކަން ޖެހޭނެ ކަމަށްވެސް ރިޕޯޓުތައް ބުނެއެވެ.

މީގެ ކުރިން ޔުވެންޓަސްގައި މޮރާޓާ ދެ ސީޒަން ހޭދަކުރިއިރު، އޭނާ ވަނީ އެޓީމަށް ކުޅެދިން 93 މެޗުގައި 27 ލަނޑު ޖަހާފައެވެ. އަދި ވަނީ ޔުވެންޓަސްއާއެކު އިޓާލިއަން ލީގު ދެ ފަހަރު، އިޓާލިއަން ކަޕް ދެ ފަހަރު އަދި އިޓާލިއަން ސުޕަ ކަޕް އެއް ފަހަރު ކާމިޔާބުކޮށްފައެވެ. އޭގެ ފަހުން ރެއާލް މެޑްރިޑާއި ޗެލްސީއަށްވެސް ކުޅުނު މޮރާޓާ އެތުލެޓިކޯއާ ގުޅުނީ މިދިޔަ އަހަރުގެ ޖެނުއަރީ މަހުގައެވެ.

ޔުވެންޓަސްއިން މޮރާޓާގެ ސޮއި ހޯދިއިރު، އެޓީމުން މީގެ ކުރިން ފާރަލި ކުޅުންތެރިއަކީ ބާސެލޯނާއަށް ކުޅެމުން އަންނަ އުރުގުއޭގެ ފޯވާޑް ލުއިސް ސުއަރޭޒެވެ. އެކަމަކު އަރޭޒަށް އިޓަލީގެ ރަށްވެހިކަން ނުލިބުމާ ގުޅިގެން އެ ޑީލް ހުއްޓުމުކަށް އައިސްފައިވާ ކަމަށް ވަނީ ރިޕޯޓުކޮށްފައެވެ. ޔުވެންޓަސްއިން ސުަރޭޒް ހޯދުމަށް ކުރަމުން އައި މަސައްކަތް ހުއްޓާލިއިރު، މިހާރު އޭނާ ހޯދުމަށް މަސައްކަތް ކުރަމުން އަންނަނީ އެތުލެޓިކޯއިނެވެ. ރިޕޯޓުތައް ބުނާ ގޮތުން ބާސާއިން ސުއަރޭޒްގެ އެއްބަސްވުން މިހާރު އުވާލާފައިވާއިރު، ހިލޭ ޓްރާންސްފާއެއްގެ ދަށުން ސުއަރޭޒް ވަރަށް އަވަހަށް އެތުލެޓިކޯއާ ގުޅޭނެއެވެ.