ނަވަލްނީ ތުރުކުރެއްވި ހެދުންތައް ދޭން ގޮވާލައްވައިފި
21 ސެޕްޓެމްބަރު 2020 | ހޯމަ 20:09ހަށިގަނޑުގައި ނޮވެޗިކް ވިހައިގެ އަސަރުހުރި ކަމަށް ސައިންޓިސްޓުން ބުނި: ނަވަލްނީ
ރަޝިޔާގެ އިދިކޮޅު ލީޑަރު އެލެކްސީ ނަވަލްނީ
ސިއްހީ ހާލުކޮޅު ގޯސްވި ރަޝިޔާގެ އިދިކޮޅު ލީޑަރު އެލެކްސީ ނަވަލްނީގެ ހަށިގަނޑުން ނޮވިޗިކް ވިހައިގެ އަސަރު ފެނިފައިވާ ކަމަށް ޔޫރަޕްގެ ލެބޯޓްރީތަކުން ބުނެފައިވާތީ، އޭނާ ތުރުކުރެއްވި ހެދުންތައް އަނބުރާ ހަވާލުކޮށް ދިނުމަށް ނަވަލްނީ އެދިވަޑައިގެންފިއެވެ.
ކޮރަޕްޝަނާ ދެކޮޅަށް އަޑު އުފުއްލަވަމުން ގެންދަވާ ނަވަލްނީގެ ސިއްހީ ހާލުކޮޅު ގޯސްވީ އޮގަސްޓު މަހުގެ 20 ވަނަ ދުވަހު ސައިބީރިޔާ އިން މޮސްކޯ އަށް ދަތުރު ކުރަމުން ދިޔަ ފްލައިޓެއްގެ ތެރެއިން ސައިފޮދެއް ހިއްޕެވި ފަހުންނެވެ. ރަޝިޔާގެ ހޮސްޕިޓަލުގައި ދެ ދުވަސް ވަންދެން ފަރުވާ ހޯއްދެވުމަށް ފަހު އިތުރު ފަރުވާ އަށް ނަވެލްނީ ޖަރުމަންވިލާތަށް ވަޑައިގެން، މިހާރު ވެސް ފަރުވާ ހޯއްދަވަނީ އެ ގައުމުގެ ހޮސްޕިޓަލެއްގައެވެ.
އެ މައްސަލާގެ ތަހުގީގު ރަޝިޔާ އިން އަދިވެސް ފައްޓާފައިނުވަ ފާހަގަކުރައްވަމުން ރަޝިޔާގެ އިދިކޮޅު ލީޑަރު ވިދާޅުވީ، އޭނާ އަށް ވިހަ ދިނީ ޔޫރަޕްގެ އިންޓެލިޖެންސް އޮފިޝަލުން ނޫނީ އޭނާގެ ގާތް މީހުން ކަމަށް ރަޝިޔާގެ ޓީވީ ޗެނަލަކުން ބުނެފައިވާ ކަމަށެވެ. ނަވަލްނީ ވަނީ، އޭނާގެ ސިއްހީ ހާލުކޮޅު ގޮސްވެގެން ޖަރުމަނަށް ގެންދިޔުމުގެ ކުރިން ތުރުކުރެއްވި ހެދުން އަނބުރާ ދިނުމަށް ގޮވާލައްވާފައެވެ.
ނަވަލްނީގެ ހާލުކޮޅު ރަނގަޅުވެ މިހާރު ހިންގަވާ އުޅުއްވެވޭ ވަރަށް ކަމަށް އޭނާ ވަނީ މީގެ ދެތިން ދުވަހެއް ކުރިން ވިދާޅުވެފައެވެ. އޭނާގެ ހާލުކޮޅު ހިއްސާ ކުރައްވަމުން ނަވަލްނީ ވިދާޅުވީ، ބަލިން އެންމެ ފުރަތަމަ ރަނގަޅުވަމުން އައިރު ވާހަކަ ދައްކަން ތެރަޕީ ނެންގެވި ކަމަށެވެ.
ނަވަލްނީގެ ސަޕޯޓަރުންގެ އިތުރުން ޔޫރަަޕްގެ ލީޑަރުން ބުނާ ގޮތުން އޭނާ އަށް ވިހަ ދީފައިވަނީ ރަޝިޔާގެ ސަރުކާރުގެ އޯޑަރަށެވެ. ރަޝިޔާ އިން ބުނާ ގޮތުން އެ މީހުން ހެދި ޓެސްޓުތަކުން ނަވަލްނީގެ ހަށިގަނޑުން ވިހައިގެ އަސަރު ފެނިފައެއް ނުވެއެވެ.
