ސިޓީގެ މިޑްފީލްޑަރު ގުންޑޮގާން ކޮވިޑް-19 އަށް ޕޮޒިޓިވް ވެއްޖެ

މެންޗެސްޓާ ސިޓީއަށް ކުޅެމުން އަންނަ ޖަރުމަންގެ މިޑްފީލްޑަރު އިލްކާއި ގުންޑޮގާން ކޮވިޑް-19 އަށް ޕޮޒިޓިވް ވެއްޖެއެވެ.

ގުންޑޮގާން ކޮވިޑް-19 އަށް ޕޮޒިޓިވްވިކަން ހޯމަ ދުވަހުގެ ވަގުތެއްގައި ސިޓީން ވަނީ ކަށަވަރުކޮށްދީފައެވެ.

ސިޓީން ނެރުނު ބަޔާނެއްގައި ބުނީ ގުންޑޮގާން ކޮވިޑް-19 އަށް ޕޮޒިޓިވްވުމާއެކު އިނގިރޭސިވިލާތުގެ ސަރުކާރުންނާއި އިނގިރޭސި ޕްރިމިއާ ލީގުން ކަނޑައަޅާފައިވާ ކަރަންޓީން އުސޫލުގެ ދަށުން އޭނާ 10 ދުވަހަށް ސެލްފް-އައިސޮލޭޝަނަށް ގޮސްފައިވާ ކަމަށެވެ.

ގުންޑޮގާން ކޮވިޑް-19 އަށް ޕޮޒިޓިވް ވިއިރު، މި މަހުގެ ކުރީކޮޅު ސިޓީއަށް ކުޅެމުން އަންނަ އަލްޖީރިއާގެ ފޯވާޑް ރިޔާދް މާރޭޒް އާއި ފްރާންސްގެ ޑިފެންޑަރު އައިމެރިކް ލަޕޯޓުވެސް ވަނީ ކޮވިޑް-19 އަށް ޕޮޒިޓިވް ވެފައެވެ.

ސިޓީގެ ތިން ކުޅުންތެރިއަކު މިހާތަނަށް ކޮވިޑް-19 އަށް ޕޮޒިޓިވް ވިއިރު، އައު ސީޒަނުގެ އިނގިރޭސި ޕްރިމިއާ ލީގުގައި ސިޓީ ކުޅޭ ފުރަތަމަ މެޗުގައި ހޯމަ ދުވަހުގެރޭ ނުކުންނާނީ ވުލްވްސްއާ ދެކޮޅަށެވެ. މި މަހުގެ 12 ވަނަ ދުވަހު ޕްރިމިއާ ލީގުގެ ކުޅުން ފެށި ނަމަވެސް، ސިޓީން މިހާތަނަށް ލީގުގައި މެޗެއް ކުޅެފައި ނުވަނީ އެޓީމުން މިދިޔަ އޮގަސްޓް މަހު ޔުއެފާ ޗެމްޕިއަންސް ލީގުގައި ވާދަކުރުމާ ގުޅިގެންނެވެ.