ފުރަތަމަ މެޗުން ޑޯޓްމުންޑަށް ފަސޭހަ މޮޅެއް

އައު ސީޒަނުގެ ޖަރުމަން ލީގުގައި ކުޅުނު ފުރަތަމަ މެޗުގައި ބޮރޫޝިއާ މޮންޗެގްލަޑްބަކް އަތުން ބޮރޫޝިއާ ޑޯޓްމުންޑް ފަސޭހަކަމާއެކު މޮޅުވެއްޖެއެވެ.

ޑޯޓްމުންޑުގެ ދަނޑުގައި ހޮނިހިރު ދުވަހުގެރޭ ކުޅުނު މި މެޗުން އެޓީމު މޮޅުވީ 3-0 ގެ ނަތީޖާއަކުންނެވެ. ޖަރުމަނުގެ ދަނޑުތަކަށް 20 އިންސައްތަ ސަޕޯޓަރުން ވެއްދުމުގެ ހުއްދަ ދީފައި އޮތުމާއެކު، ޑޯޓްމުންޑުން ވަނީ މި މެޗު ބަލަން އެޓީމުގެ 10،000 ސަޕޯޓަރުން ދަނޑަށް ވައްދާފައެވެ.

މި މެޗުގައި ޑޯޓްމުންޑުން މޮޅު ކުޅުމެއް ދެއްކިއިރު، އެޓީމުން ލީޑު ނަގާފައިވަނީ މެޗުގެ 35 ވަނަ މިނެޓުގައެވެ. މި ލަނޑު އެޓީމަށް ކާމިޔާބުކޮށްދިނީ އުމުރުން 17 އަހަރުގެ މިޑްފީލްޑަރު ޖިއޮވާނީ ރޭނާއެވެ. މިއީ ޒުވާން މިޑްފީލްޑަރު ޖަރުމަން ލީގުގައި ކާމިޔާބުކުރި ފުރަތަމަ ލަނޑެވެ.

މެޗުގައި ޑޯޓްމުންޑުން ލީޑު ފުޅާކޮށްފައިވަނީ ދެވަނަ ހާފު ފަށައިގެން ނުވަވަނަ މިނެޓުގައެވެ. ލިބުނު ޕެނަލްޓީއަކުން މި ލަނޑު ޑޯޓްމުންޑަށް ކާމިޔާބުކޮށްދިނީ ފޯވާޑް އާލިން ހާލަންޑެވެ. މިއީ އޭރިއާ ތެރެއިން ޑޯޓްމުންޑުގެ ރޭނާއަށް މޮންޗެންގްލަޑްބަކުގެ ރަމީ ބެންސެބައިނީ ކުރި ފައުލަކަށް ރެފުރީ ދިން ޕެނަލްޓީއެކެވެ. އަދި މެޗުގެ 77 ވަނަ މިނެޓުގައި ހާލަންޑް ވަނީ ޑޯޓްމުންޑުގެ ތިންވަނަ ލަނޑު ކާމިޔާބުކޮށްފައެވެ.

ލީގުގައި ކުޅުނު ފުރަތަމަ މެޗުން ޑޯޓްމުންޑް މޮޅުވިއިރު، އެޓީމުން ލީގުގައި ދެން މެޗެއް ކުޅޭނީ އަންނަ ހޮނިހިރު ދުވަހުއެވެ. އެ ދުވަހު ޑޯޓްމުންޑް ނުކުންނާނީ އޯގްސްބާގާ ދެކޮޅަށެވެ.