އައްޑޫ ބިޔުރޯ

ސިސްޓަރ އައިލެންޑް ކޮންފަރެންސް ބާއްވާ ކައުންސިލްތަކުން އެމްއޯޔޫއެއްގައި ސޮއިކޮށްފިއެވެ.

ފުވައްމުލަކު ސިޓީ ކައުންސިލް އިން އިންތިޒާމް ކޮށްގެން ބޭއްވި މިއެމްއޯޔޫގައި ސޮއިކޮށްފައިވަނީ އެކައުންސިލްގެ މޭޔަރު ފަލާހް ޝަރީފާއި، ކޮންމެ ރަށެއްގެ ރަށު ކައުންސިލް ރައީސްއެވެ.

ސިސްޓަރ އައިލެންޑް ކޮންފަރެންސަކީ ފުވައްމުލަކު ސިޓީ ކައުންސިލް އާއި ގއ. އަތޮޅުގެ އަށް ކައުންސިލް ގުޅިގެން ކުރިއަށް ގެންދިޔަ އެއް ދުވަހުގެ ބައްދަލުވުމެކެވެ.

ގެމަނަފުށީގައި ބޭއްވި މި ބައްދަލުވުމުގައި ބައިވެރިވީ ކައުންސިލްގެ ރައީސުންނާއި އިސްވެރިންނެވެ.

ސިސްޓަރ އައިލެންޑް ކޮންފަރެންސްގެ މައިގަނޑު ބޭނުމަކީ ފުވައްމުލައް ސިޓީއާއި، ގއ. އަތޮޅުގެ ރަށްތަކާއި ދެމެދު އިގްތިސާދީ، އިޖްތިމާއީ އަދި ސިއްހީ ދާއިރާގެ ކަންކަން ހަރުދަނާ ކުރުމެވެ.

ރާއްޖެއެމްވީއާއި ވާހަކަދައްކަވަމުން ގެމަނަފުށީ ކައުންސިލްގެ ރައީސް އަބްދުﷲ ޝިޔާން ވިދާޅުވީ މި އެމްއޯޔޫގެ ދަށުން އެއް ކައުންސިލް އަނެއް ކައުންސިލް ގުޅިގެން އެކި ރަށްރަށުގައި ދިމާވެފައި ހުރި ކަންކަން ހައްލު ކުރުން ހިމެނެއެވެ.

އެގޮތުން މި އެމްއޯޔޫގެ ދަށުން އެންމެ ފުރަތަމަ ވެސް އިސްކަން ދީފައިވަނީ ގެމަނަފުށީގެ ސިއްހީ ދާއިރާ އިން ރައްޔިތުންނަށް އިތުރު ޚިދުމަތެއް ފޯރުކޮށްދިނުމުގެ ގޮތުން ފުވައްމުލަކު ސިޓީގައި މަސައްކަތް ކުރާ ސެޕަޝަލިސްޓް ޑޮކްޓަރުން މަހަކު އެއް ފަހަރު އެ ރަށަށް ގެނައުމަށް ނިންމި ކަމަށެވެ.

އެގޮތުން މި އެއްބަސްވުމުގެ ދަށުން ގެމަނަފުއްޓަށް ސްޕެޝަލިޓް ޑޮކްޓަރެއް ޒިޔާރަތްކޮށް 25 މީހުން ވަނީ ބަލާފައެވެ.

މީގެ އިތުރުން އިޖްތިމާއީ އަދި ލޯކަލް ޓުއަރިޒަމް ޕްރޮމޯޓް ކުރުމަށް ސަރުކާރުން ގަސްތު ކުރާ ބައެއް ކަންކަމާއި ގުޅޭގޮތުން މަޝްވަރާ ކުރުމަށްފަހު ވައިގެ މަގުން މި ދެއަތޮޅު ގުޅާލެވޭނެ ގޮތްތަކާއި ބެހޭގޮތުން ވަނީ ވާހަކަ ދައްކަވާފައެވެ.

ޝިޔާން ވިދާޅުވީ މިވަގުތު މި ދެއަތޮޅުގެ ރައްޔިތުންނަށް ފެރީގެ ޚިދުމަތް ފޯރުކޮށްދެމުންގެންދާ ކަމަށާއި މިއަދާއި ޖެހެންދެން ވަރަށް ކާމިޔާބު ކަމަށެވެ.

މި ކޮންފަރެންސާއި ގުޅިގެން ވާހަކަ ދައްވަމުން ފުވައްމުލަކު ކައުންސިލް މޭޔަރު ފަލާޙް ޝަރީފް ވިދާޅުވީ މި ދެއަތޮޅުގެ ދެމެދުގައި މިހާރު ޤާއިމްވެފައިވާ ދަތުރުފަތުރުގެ ނިޒާމް ހަރުދަނާ ގޮތެއްގައި ގެންދެވޭނީ ފެރީ ނިޒާމެއްގެ އިތުރުން ވައިގެ މަގުން ވެސް ގުޅުވާލެވިގެން ކަމަށެވެ.

ފަލާހް ވިދާޅުވީ ސިސްޓަރ އައިލެންޑް ކޮންފަރެންސްގެ އެންމެ ބޮޑު ބޭނުމަކީ އެއް ކައުންސިލް އަނެއް ކައުންސިލަކުން އެހީތެރިކަން ފޯރުކޮށްދީ އަތުގައި ހުރި ވަސީލަތްތައް ބޭނުން ކޮށްގެން ކަންކަން ހައްލު ކުރުމަށް މަގުފަހި ކުރުން ކަމަށެވެ.

އެގޮތުން ލާމަރުކަޒީ ނިޒާމެއްގެ ބޭނުން އެންމެ ހެޔޮ ގޮތެއްގައިވެސް ހިފޭނީ މައި ސަރުކާރަށް ބަރޯސާނުވެ ކައުންސިލްތަކުން ކަންކަން ރާވާ ހިންގުން ކަމަށް ފަލާޙް ވިދާޅުވިއެވެ.

މީގެ އިތުރުން ދެކުނުގެ ހަތަރު އަތޮޅު ގުޅިގެން ކަނޑައަޅާފައި ހުރި ލަނޑުދަނޑިތައް ވެސް ހުންނާނެ ކަމަށާއި ދެކުނު މަހާސިންތާގައި ނިމުނު ގިނަ ކަންކަމަށް ސިސްޓަރ ކޮންފަރެންސްގައި ވެސް އަލި އަޅުވާފައިވާނެ ކަމަށް ފަލާޙް ވިދާޅުވިއެވެ.