ފީޗަރ ނުވަތަ ރިޕޯޓު ދާއިރާ ފިޔަވައި، ކޮންމެ ނޫސްވެރިޔަކަށްވެސް ކުރިމަތިލެވޭނީ 1 ދާއިރާއަށް: މީޑިއާ ކައުންސިލް
ނޫސްވެރިކަމުގެ އިނާމު ދިނުމުގެ އުސޫލުގެ 4 ވަނަ މާއްދާއާއި 5 ވަނަ މާއްދާއަށް ވަނީ އިސްލާހު ގެނެސްފައި
ނޫސްވެރިންތަކެއް ރައީސް އޮފީހުގައި އޮތް ނޫސްވެރިންގެ ބައްދަލުވުމެއްގައި
ފީޗަރ/ރިޕޯޓު ދާއިރާ ފިޔަވައި، ކޮންމެ ނޫސްވެރިޔަކަށްވެސް ކުރިމަތިލެވޭނީ އެއް ދާއިރާއަށް ކަމަށް ކަނޑައަޅައި މޯލްޑިވްސް މީޑިއާ ކައުންސިލުން ދޭ ނޫސްވެރިކަމުގެ އިނާމު ދިނުމުގެ އުސޫލު އިސްލާހުކޮށްފިއެވެ.
މީޑިއާ ކައުންސިލުން އިސްލާހުކޮށްފައިވަނީ އުސޫލުގެ 4 ވަނަ މާއްދާ (އިނާމު ދެވޭ ދާއިރާތައް މާނަކުރާ ގޮތް) އެވެ. އިސްލާހުގައި ބުނެފައިވަނީ ބްރޯޑްކާސްޓިންގ ކެޓަގަރީއަށް ކުރިމަތިލާ ފަރާތްތަކަށް އޮންލައިން ނުވަތަ ޕްރިންޓް ކެޓަގަރީއަށް ކުރިމައްޗެއް ނުލެވޭނެ ކަމަށެވެ. އަދި އޮންލައިން ނުވަތަ ޕްރިންޓް ކެޓަގަރީއަށް ކުރިމަތިލާ ފަރާތަކަށް ބްރޯޑްކާސްޓިންގ ކެޓަގަރީއަށް ކުރިމައްޗެއް ނުލެވޭނެ ކަމަށެވެ.
ބަދަލަކަށް ގެނެސްފައިވަނީ ފީޗަރ/ރިޕޯޓު ދާއިރާ ފިޔަވައި، ކޮންމެ ނޫސްވެރިޔަކަށްވެސް ކުރިމަތިލެވޭނީ އެއް ދާއިރާއަށެވެ. ކުރިން އިސްލާހު ނުކޮށް އޮތް އިރު 4 ވަނަ މާއްދާގައި ބުނެފައިވަނީ ކޮންމެ ނޫސްވެރިޔަކަށްވެސް ކުރިމަތިލެވޭނީ އެއް ދާއިރާއަށް ކަމަށެވެ.
މީގެ އިތުރުން މި އުސޫލުގެ 5 ވަނަ މާއްދާ (އިނާމަށް ނަން ހުށަހެޅުން) ގެ (ޅ) ގެ 1.2 ވެސް ވަނީ އިސްލާހުކޮށްފައެވެ. އެގޮތުން މި އުސޫލުގެ 3 ވަނަ މާއްދާގެ (އ) ގައި ބަޔާންކޮށްފައިވާ ނޫސްވެރިކަމުގައި ބޭނުންކުރާ ތަސްވީރު (ފޮޓޯ ޖާރނަލިޒަމް)ގެ ދާއިރާއަށް ހުށަހަޅާނަމަ، ޝާއިޢު ކޮށްފައިވާ 5 ފޮޓޯ (ޝާއިޢު ކުރެވުނުއިރު އޮތް ކެޕްޝަނާއެކު) އަދި ފޮޓޯ ސްޓޯރީ/ފޮޓޯ އެސޭ ހުށަހެޅުމުގައި 03 މަޢުޟޫއަކަށް ހުށަހަޅަންވާނެ ކަމަށެވެ.
ފޮޓޯ ސްޓޯރީ/ފޮޓޯ އެސޭ ހުށަހަޅާއިރު ސްޓްރީމެއްގެ ގޮތުގައި 3 އާއި 15 އާ ދެމެދުގެ ޢަދަދަކަށެވެ. ފޮޓޯ ސްޓޯރީގެ ތަރުތީބު، ތަޢާރަފަކާއި ކެޕްޝަން އެނގޭނެ ގޮތަށް ހުށަހަޅަންވާނެ ކަމަށް ބުނެފައިވެއެވެ. އަދި މީގެ އިތުރުން ފޮޓޯ ސްޓޯރީ ހުށަހަޅާއިރު ގްރޫޕް މަސައްކަތެއްގެ ގޮތުގައިވެސް ހުށަހެޅޭނެ ކަމަށް ބުނެފައިވެއެވެ. ގުރޫޕް މަސައްކަތް ހުށަހަޅާއިރު، ހުށަހަޅާ ފަރާތް ފިޔަވައި ގުރޫޕުގައި ހިމެނޭ އެހެން ފަރާތްތައް މި އުސޫލުގެ 4 ވަނަ މާއްދާއިން އިސްތިސްނާ ވާނެ ކަމަށް ބުނެފައިވެއެވެ. އަދި ހުށަހަޅާ ފަރާތްފިޔަވައި އެހެންފަރާތްތަކަށް ބޭނުންވާ ކެޓަގަރީޒް ތަކަށް އިނާމަށް ހުށަހެޅުމުގެ ފުރުޞަތު އޮންނާނެއެވެ.
މޯލްޑިވްސް މީޑިއާ ކައުންސިލުން ދޭ، އިނާމުތަކަށް ކުރިމަތިލުމުގެ ފުރުޞަތު މި މަހުގެ 10 ވަނަ ދުވަހުން ފެށިގެން ވަނީ ހުޅުވާލާފައެވެ. އަދި މި އިނާމުތަކަށް ކުރިމަތިލާ ފަރާތްތަކުން މި މަހުގެ 24 ވަނަ ދުވަހުގެ މެންދުރުފަހު 1:30 ގެ ކުރިން ފޯމް ހުށަހެޅުމަށް ވަނީ އެދިފައެވެ.
