އެސްބީއައިގައި ރޯވުމުން، ލިބުނު ގެއްލުން 16 މިލިއަން ރުފިޔާއަށް

ހުސްވި އޮގަސްޓު މަހުގެ 28 ވަނަ ދުވަހުގެރޭ މާލޭގައި ހިނގި ބޮޑު އަލިފާނުގެ ހާދިސާގައި ސްޓޭޓް ބޭންކް އޮފް އިންޑިއާ (އެސްބީއައި) އަށް ލިބުނު ގެއްލުމުގެ އަގު 16 މިލިއަން ރުފިޔާ އަށް އަރާ ކަމަށް އެ ބޭންކުން ބުނެފިއެވެ.

އެސްބީއައި ހިންގަމުން އަންނަ ގަދަގެ މުހައްމަދުފުޅު އިމާރާތް ޖެހިގެން ހުންނަ ކެފޭ ޓިއޮލޯގައި ރޯވި އަލިފާންގަނޑު ކޮންޓްރޯލް ނުވެ އެ އިމާރާތުގެ ޕެންޓް ހައުސްގައި ރޯވެ އެސްބީއައިގެ ފަސް ފަންގިފިލާއަށް އަލިފާނުގެ އަސަރު ކުރިއެވެ.

ރާއްޖޭގެ ބްރާންޗުގެ ސީއީއޯ ބަރަތް މިޝްރާ ''ރާއްޖެ.އެމްވީ'' އަށް ވިދާޅުވީ، އަލިފާނުގެ އަސަރު އެންމެ ބޮޑަށް ކޮށްފައިވަނީ ތިން ވަނަ ފަންގިފިލާ އަށް ކަމަށެވެ. އެ ފަންގިފިލާގެ 80 އިންސައްތަ ވަނީ އަނދާފައެވެ. އޭގެ ތެރޭގައި އެ ތަނުގައި ބޭނުން ކުރަމުން އައި ގިނަ އަދަދެއްގެ ކޮމްޕިއުޓަރު ސާާމަނުގެ އިތުރުން ގޮނޑިތަކާއި މޭޒުތައް ހިމެނެއެވެ. ހަތަރު ފްލޯ އަށް ވެސް ވަނީ 30 އިންސައްތަ ގެއްލުން ވެފައެވެ. އަލިފާން ރޯވުމާއި އެކު އެސްބީއައި ގައި ދެމުން ދިޔަ ހިދުމަތްތައް ވަނީ ހުޅުމާލޭގައި ހުންނަ ބްރާންޗަށް ބަދަލުކޮށްފައެވެ.

މިޝްރާ ވިދާޅުވީ، ހުޅުމާލޭގައި ހުންނަ އެސްބީއައިގެ ބްރާންޗުގައި ޖާގަ ކުޑަވުމުން އެހެން އިމާރާތަކުން އިތުރު ދެ ފްލޯއެއް ނަގާފައިވާ ކަމަށެވެ. އޭނަ ވިދާޅުވީ، މާލޭގައި ހުންނަ އޮފީސް މަރާމާތުކޮށް ހުޅުވުމުގެ މަސައްކަތް ކުރިޔަށްދާ ކަމަށާއި، މާލޭ އޮފީހުން ކަސްޓަމަރުންނަށް ހިދުމަތް ފޯރުކޮށްދެވޭވަރު ވާނީ ނޮވެމްބަރު މަހުގެ ފަހުކޮޅު ގައި ކަމަށެވެ. ދިވެހިންގެ އިތުރުން ރާއްޖޭގައި މަސައްކަތް ކުރާ ބޭރުގެ ގިނަ އަދަދެއްގެ ބަޔަކު ހިދުމަތް ހޯދަމުން އަންނަ އެސްބީއައި އަކީ ގިނަ ބައެއް އިތުބާރު ހޯދާފައިވާ ބޭންކެކެވެ.

މާލީ ކަންކަމުގައިވެސް އެސްބީއައި އިން ދަނީ ރާއްޖެއަށް އެހީތެރިވަމުންނެވެ. އެގޮތުން އިންޑިއާ ސަރުކާރުން ބަޖެޓް ސަޕޯޓްގެ ގޮތުގައި ދިނުމަށް ނިންމާފައިވާ 250 މިލިއަން ޑޮލަރުގެ ލޯނު ދިނުމަށް ހަމަޖެހިފައިވަނީ ވެސް އެސްބީއައި މެދުވެރިކޮށެވެ. އެސްބީއައި އިން ރާއްޖޭގައި ހިދުމަތް ދެމމުން އަންނަތާ 40 އަހަރަށް ވުރެ ގިނަ އަހަރު ވެއްޖެއެވެ.