ކޮޅުވެއްޓީގައި ހުރި ހުރިހާ މުދާ މިއަދު ބާލައި ނިމެނޭ، މުދާތައް ހުރީ އިންޝުއަރ ކޮށްފައި: ސައީދު

ރަށްރަށުގެ ކަރަންޓުގެ ހާލަތު ރަނގަޅުކުރުމަށް، އެ ރަށްރަށަށް ގެންދާ ޖަނަރޭޓަރު ސެޓްތައް ހިފައިގެން ދަތުރުކުރި ކޮޅުވެއްޓީގައި ހުރި ހުރިހާ މުދަލެއް ބާލައި ނިމޭނެކަމަށް ފެނެކަ ކޯޕަރޭޝަންގެ މެނޭޖިންގް ޑިރެކްޓަރ އަހުމަދު ސައީދު ވިދާޅުވެއްޖެއެވެ.

ރާއްޖެއެމްވީ އަށް މިކަމާއި ގުޅޭ އެންމެ ފަހުގެ މައުލޫމާތު ހިއްސާ ކުރައްވަމުން ސައީދު ވިދާޅުވީ، އެމްޓީސީސީއާއި ގުޅިގެން މުދާ ބޭލުމުގެ މަސައްކަތް އިއްޔެ ފެށިއިރު، ބޮޑު ބައި ނިމިފައިވާކަމަށެވެ. އެގޮތުން، ބޮޑުބައެއް ބޭލިއްޖެކަމަށާއި މިއަދު ހުރިހާ މުދާ ބާލައި ށ. މިލަންދޫއަށް ގެންދާނެކަމަށެވެ. ފަރަށް އެރި ކޮޅުވެއްޓީގައި، ހއ. އަތޮޅުގެ އިހަވަންދޫ، ދިއްދޫ އަދި ފިއްލަދޫއަށް ގެންދާ 3 ޖަނަރޭޓަރަކާއި ބާރަށަށް ގެންދާ ކޭބަލްތަކެއްވެސް އެބަހުރި ކަމަށް ސައީދު ވަނީ ވިދާޅުވެފައެވެ. ޖުމްލަ 13 މިލިއަން ރުފިޔާގެ މުދާ ކޮޅުވެއްޓީގައި ހުރިކަން ފާހަގަކުރައްވައި ސައީދު ވިދާޅުވީ ހުރިހާ މުދަލެއްވެސް ހުރީ އިންޝުއަރ ކޮށްފައިކަމަށެވެ. އަދި މޫސުން ރަނގަޅުނަމަ، ކުރިޔަށް އޮތް 3 ދުވަސް ތެރޭ އެ މުދާތަށް ގެންދިއުމަށް ހަމަޖެހިފައިވާ ރަށްތަކަށް ގެންދާނެކަމަށް ސައީދު ވިދާޅުވިއެވެ.

ގިނަ އަދަދެއްގެ މުދަލާއި އެކު އުތުރުގެ ރަށްތަކަށް ދަތުރުކުރަމުންދަނިކޮށް ކޮޅުވެއްޓި ފަރަށް އަރާފައިވަނީ ށ. ނިލަންދޫ އިރުމަތީ ފަރަށެވެ. ޖެންސެޓްތައް ގެންދިއުމުގައި ފެނަކައިން ހަވާލުކޮށްފައިވަނީ އަމިއްލަ ކުންފުންޏަކާއިކަން ފާހަގަކޮށް ސައީދު މީގެކުރިން ވިދާޅުވީ ކޮޅުވެއްޓި ފަރަށް އެރުމާއިއެކު އެ ފަރާތްތަކުން ކޮޅުވެއްޓި ފުންކުރުމުގެ މަސައްކަތް ފެށިކަމަށެވެ. ނަމަވެސް 3 ދުވަސްވީއިރު ވެސް އެކަށީގެންވާ ހައްލެއް ނުލިބުމުގެ ސަބަބުން ފެނަކައާއި އެމްޓީސީސީ ގުޅިގެން މުދާ ބޭލުމުގެ މަސައްކަތް ކުރަމުން އަންނަކަމަށެވެ.

ނަމަވެސް އެތަކެތި ކޮޅުވެއްޓިއަށް އެރުވީވެސް ވަރަށް ރައްކާތެރިކަމާއިއެކު ސަތަރި އެޅުމަށްފަހުކަން ފާހަގަކޮށް ސައީދު ވިދާޅުވީ ޖެނެރޭޓަރ ސެޓްތަކަށް ގެއްލުމެއް ނުވާކަމަށެވެ.