އިޓާލިއަން ލީީގުގެ އައު ސީޒަން ފެށުމުގެ ކުރިން ޔުވެންޓަސްގެ ކޯޗު އަަންދްރެއާ ޕިރްލޯ ކޯޗިންގ ލައިސަންސް ނަގައިފިއެވެ.

ޔުވެންޓަސްގެ ޒުވާން ޓީމުގެ ކޯޗުގެ މަގާމު ހަވާލުކުރިތާ ނުވަ ދުވަސްފަހު މިދިޔަ އޮގްސްޓަ މަހުގެ އަށްވަނަ ދުވަހު ޕިރްލޯ ވަނީ ޔުވެންޓަސްގެ ސީނިއާ ޓީމުގެ ކޯޗުގެ މަގާމަށް ހަމަޖައްސާފައެވެ. އުމުރުން 41 އަހަރުގެ ޕިރްލޯ ޔުވެންޓަސްގެ ކޯޗުގެ މަގާމަށް ހަމަޖެއްސީ މިދިޔަ ސީޒަނުގައި އެޓީމަށް އިޓާލިއަން ލީގު ކާމިޔާބުކޮށްދިން ކޯޗު މައުރީޒިއޯ ސާރީ މަގާމުން ވަކިކުރުމަށްފަހުއެވެ.

ކޯޗިންގެ އެއްވެސް ތަޖުރިބާއެއް ނެތް ޕިރްލޯ ޔުއެފާ ޕްރޯ ލައިސަންސް ހާސިލުކުރަން ހުށަހެޅީ އޮގަސްޓް މަހުގައެވެ. އަދި ބުދަ ދުވަހު ޕިރްލޯއަށް ވަނީ ޔުއެފާ ޕްރޯ ލައިސަންސް ލިބިފައެވެ.

މީގެ ކުރިން ޔުވެންޓަސްއަށް ކުޅުނު ލެޖެންޑަރީ މިޑްފީލްޑަރު އެ ޓީމުގެ ކޯޗުގެ މަގާމަށް ހަމަޖެއްސިއިރު، މިއީ 2017 ވަނަ އަހަރު ފުޓްބޯޅަ ކުޅުން ހުއްޓާލި ޔުވެންޓަސްގެ ކުރީގެ ކެޕްޓަން ޕިރްލޯ ބޮޑު ކުލަބެއްގެ ކޯޗެއްގެ ގޮތުގައި ފެންނާނެ ފުރަތަމަ ފަހަރެވެ.

އިޓާލިއަން ލީގުގެ ޗެމްޕިއަންކަން ޖެހިޖެހިގެން ނުވަ ފަހަރު ހޯދާފައިވާ ޔުވެންޓަސްއާ ޕިރްލޯ ހަވާލުވިއިރު، މީގެ ކުރިން އޭނާ ވަނީ އިނގިރޭސި ޕްރިމިއާ ލީގާއި އިޓާލިއަން ލީގުގެ ބައެއް ކުލަބުތަކުން ކޯޗެއްގެ ގޮތުގައި މަސައްކަތް ކުރުމަށް ހުށަހެޅުންތަކެއް ލިބުނު ކަމަށް ބުނެފައެވެ.

ދުނިޔޭގައި އުފެދުނު އެންމެ އުފެއްދުންތެރި އެއް މިޑްފީލްޑަރު ކަމަށްވާ ޕިރްލޯ 22 އަހަރަށް ފަހު ފުޓްބޯޅަ ކުޅުން ހުއްޓާލީ 2017 ވަނަ އަހަރުއެވެ. އިޓަލީގެ 21 އަހަރުން ދަށުގެ ޓީމާ އެކު 2000 ވަނަ އަހަރުގެ ޔޫރަޕިއަން ޗެމްޕިއަންޝިޕް ކާމިޔާބުކުރި ޕިރްލޯ ވަނީ އިޓަލީން 2006 ވަނަ އަހަރުގެ ފީފާ ވޯލްޑް ކަޕް ކާމިޔަބުކުރިއިރު މޮޅު ކުޅުމެއް ދައްކާއެވެ.

އިންޓަ މިލާނާއި، އޭސީ މިލާންގެ އިތުރުން ޔުވެންޓަސްއަށް ގިނަ ދުވަސްތަކެއް ވަންދެން ކުޅުނު ޕިރްލޯ ވަނީ ކްލަބު ކެރިއަރުގައި ގިނަ ކާމިޔާބީތަކެއް ހޯދާފައެވެ. އޭނާ އެންމެ ފަހުން ކުޅުނީ އެމެރިކާގެ މޭޖާ ލީގުގެ ނިއު ޔޯކް ސިޓީ އެފްސީއަށެވެ.