ވީޑިއޯ ކޮންފަރެންސްކޮށް ޝަރީއަތް ހިންގުމަށް ބޭނުންވާ ގިނަ އައިޓީ ސާމާނު ޔޫއެންޑީޕީން ހަދިޔާ ކޮށްފި

ޝަރީއަތްތައް ހިންގުމަށް ބޭނުންވާ ގިނަ އައިޓީ ސާމާނު ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާމް (ޔޫއެންޑީޕީ) އިން ރާއްޖެއަށް ހަދިޔާ ކޮށްފިއެވެ.

އެކަން ހާމަ ކުރައްވައި ޖުޑީޝަލް ސަރވިސް ކޮމިޝަން (ޖޭއެސްސީ) އިން ނެރުނު ބަޔާނެއްގައި ބުނީ، ޔޫއެންޑީޕީގެ އެހީގެ ދަށުން އެ ކޮމިޝަނަށާއި ދިވެހިރާއްޖޭގެ ކޯޓުތަކަށް ހަދިޔާ ކުރުމަށް ހަމަޖެހިފައިވާ ތަކެތި ބުރާސްފަތި ދުވަހު ޙަވާލު ކޮށްފައިވާ ކަމަށެވެ.

ބުރާސްފަތި ދުވަހު ޖޭއެސްސީގައި ބޭއްވި ރަސްމިއްޔާތެއްގައި މިތަކެތި ޙަވާލުކޮށްދެއްވީ، ޔޫއެންޑީޕީގެ ފަރާތުން ދިވެހިރާއްޖެއަށް ކަނޑައަޅުއްވާފައިވާ ރެޒިޑެންޓް ރެޕްރެޒެންޓޭޓިވް މިސް އަކީކޯ ފުޖީއެވެ. ކޮމިޝަނުގެ ފަރާތުން އެހީއާ ޙަވާލުވީ ކޮމިޝަނުގެ ރައީސް ޙިސާން ޙުސައިންއެވެ.

އޭގެ އިތުރުން، ކޯޓުތަކަށް ހަދިޔާ ކުރެއްވި އެހީއާ ހަވާލުވީ ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަންގެ ފަރާތުން ޖުޑީޝަލް އެޑްމިނިސްޓްރޭޓަރ، ޑރ. އަބްދުﷲ ނަޒީރު ކަމަށް ވެސް ޖޭއެސްސީން މައުލޫމާތު ދެއެވެ.

ޖޭއެސްސީން މައުލޫމާތު ދޭ ގޮތުގައި ޔޫއެންޑީޕީގެ ހިލޭ އެހީގެ ދަށުން ވީޑިއޯ ކޮންފަރެންސް މެދުވެރިކޮށް ޝަރީއަތްތައް ހިންގުމަށް ބޭނުންވާ ގިނަ އައިޓީ އިކިއުޕްމަންޓްތަކާއި، އޮފީސް 365 ގެ ލައިސަންސް އާއި، އިތުރު ގިނަ އިކުއިޕްމަންޓްތައް ވަނީ ހަދިޔާ ކޮށްފައެވެ.

ޖުޑީޝަރީގެ މަސައްކަތްތައް ހަރުދަނާކޮށް ކުރިއެރުވުމުގެ ގޮތުން މިހާރު ވެސް ޔޫ.އެން.ޑީ.ޕީގެ ހިލޭ އެހީގެ ދަށުން އިތުރު 6 ކޮންސަލްޓެންސީ ޕްރޮގްރާމް ކުރިއަށްދާ ކަމަށް ޖޭއެސްސީން މައުލޫމާތު ދެއެވެ.