ކޮވިޑް-19 އިން ދުނިޔޭގެ އިގްތިޞާދަށް ލިބޭ ގެއްލުމުން އަރައިގަތުމަށް 5 އަހަރު ނަގާފާނެ

ކޮވިޑް-19 ޕެންޑަމިކާ ގުޅިގެން ދުނިޔޭގެ އިގްތިޞާދަށް ދިމާވެފައިވާ ގެއްލުމުން އަރައިގަތުމަށް ފަސް އަހަރު ނަގާފާނެ ކަމަށް ވޯލްޑް ބޭންކުގެ ޗީފް އިކޮނޮމިސްޓް ކާމެން ރެއިންހާޓް ވިދާޅުވެއްޖެއެވެ.

ރެއިންހާޓް ވިދާޅުވީ ވައިރަސް ފެތުރުން ކޮންޓްރޯލް ކުރުމަށް ލޮކްޑައުންގައި އަޅާފައިވާ ހުރިހާ ފިޔަވަޅުތައް އުވާލައިފިނަމަ އިގްތިޞާދު ކުރިއަރަން ފަށާނެކަމަށެވެ. ނަމަވެސް ލިބުނު ހުރިހާ ގެއްލުމަކުން އަރައިގަނެ އިގްތިޞާދު ކޮޅަށް ޖެހުމަށް ފަސް އަހަރުގެ މުއްދަތެއް ނަގާނެކަމަށް ރެއިންހާޓް ވިދާޅުވިއެވެ.

ސްޕެއިންގެ މެޑްރިޑްގައި ކުރިޔަށްދިޔަ ކޮންފެރެންސެއްގައި ވާހަކަދައްކަވަމުން ރެއިންހާޓް އިތުރަށް ވިދާޅުވީ ޕެންޑަމިކުގެ ސަބަބުން އެކި ގައުމުތަކުގެ އިގްތިޞާދަށް އެކި މިންވަރަށް ގެއްލުން ވަމުންދާއިރު އެ ގެއްލުމުގެ އަސަރު ބައެއް ގައުމުތަކުގައި އަނެއް ބައި ގައުމުތަކަށްވުރެ ދިގު މުއްދަތަކަށް ހުންނާނެ ކަމަށެވެ. އަދި މިއާއެކު ތަފާތުކުރުންތައް އިތުރަށް ބޮޑުވެ މުއްސަނދި ގައުމުތަކުގައި ދިރިއުޅޭ ފަގީރުން އިތުރަށް ފަގީރު ވެގެންދާނެ ކަމަށް ރެއިންހާޓް ވިދާޅުވިއެވެ. އަދި މުއްސަނދި ގައުމުތަކަށްވުރެ ބޮޑަށް ފަގީރު ގައުމުތަކަށް އިގްތިޞާދީގޮތުން ލިބޭ ގެއްލުން ބޮޑުވާނެ ކަމަށް ރެއިންހާޓް ވިދާޅުވި އެވެ.

މީގެ އިތުރުން 20 އަހަރު ތެރޭ ފުރަތަމަ ފަހަރަށް ދުނިޔޭގެ ފަގީރުކަން މި ޕެންޑަމިކާ ގުޅިގެން މައްޗަށްދާނެ ކަމަށް ރެއިންހާޓް ވިދާޅުވިއެވެ. މީގެ ކުރިން ވޯލްޑް ބޭންކުގެ ރައީސް ޑޭވިޑް މަލްޕާސް ވަނީ ކޮވިޑް-19 ކޮންޓްރޯލް ނުވެ ދިގު މުއްދަތަކަށް އޮވެއްޖެނަމަ، ދުނިޔެ 1929 އިން 1933 އަށް ތަޖުރިބާ ކުރި ގްރޭޓް ޑިޕްރެޝަން ފަދަ އިގުތިސާދީ ކާރިސާއަކާ ކުރިމަތިލާން ޖެހިދާނެ ކަމަށް ވިދާޅުވެފައެވެ.