ހުޅުމީދޫ ބަހާއުއްދީން މަގު ހެދުމުގެ 85 އިންސައްތަ މަސައްކަތް ނިންމާލައިފި
17 ސެޕްޓެމްބަރު 2020 | ބުރާސްފަތި 04:17ލެޑް މަގުބައްތި ސަޕްލައިކޮށް ހަރުކުރުމުގެ %48 މަސައްކަތް ވަނީ ނިމިފައި
ހުޅުމީދޫ ބަހާއުއްދީން މަގު
ސ. ހުޅުމީދޫ ބަހާއުއްދީން މަގު ހެދުމުގެ މަޝްރޫޢުގެ 85 އިންސައްތަ މަސައްކަތް ނިންމާލައިފިއެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ބުނީ މި މަޝްރޫޢުގެ ދަށުން ލެޑް މަގުބައްތި ސަޕްލައިކޮށް ހަރުކުރުމުގެ 48 އިންސައްތަ މިހާރު ނިމިފައިވާ ކަމަށެވެ.
މި މަޝްރޫޢުގެ އަމަލީ މަސައްކަތް ފަށާފައިވަނީ މިދިޔަ އަހަރުގެ އެޕްރީލް މަހުގެ 1 ވަނަ ދުވަހު އެވެ.
އެމްޓީސީސީން ހުޅުމީދުގެ ބަހާއުއްދީން މަގު ތަރައްގީ ކުރުމުގެ މަޝްރޫއުގެ ދަށުން މިދިޔަ ޖޫން މަހުގެ ތެރޭގައި ވަނީ އެ މަގުގައި ތާރު އެޅުމުގެ މަސައްކަތް ނިންމާފައެވެ.
މި މަޝްރޫއުގެ ދަށުން 2.2 ކިލޯ މީޓަރުގެ ސަރަހައްދެއްގައި 50 މިލިމީޓަރުގެ ބޯމިނުގައި ތާރު އަޅާފައިވެއެވެ.
ބަހާއުއްދީން މަގު ތަރައްގީ ކުރުމުގެ މަޝްރޫއުގެ ދަށުންގެ އިތުރުން ސްޓޯމް ވޯޓާ މެނޭޖުމެންޓު ސިސްޓަމެއް ގާއިމްކޮށް، ޕޭވްމެންޓު ހެދުމަށް ވަނީ ހަަމަޖެހިފައެވެ. އަދި އެ މަގުގައި ސްޕީޑް ބްރޭކަރު ހަރުކުރުމާއި ޒިބްރާ ކްރޮސް ގާއިމްކޮށް ގަސް އިންދަން ހާއްސަ ސަރަހައްދުތައް ވެސް ހެދުމަށް ވަނީ ހަމަޖެހިފައެވެ.
