ޔޫއެންއޯޑީސީގެ ފަރާތުން އެމްއެންޑީއެފް ކޯސްޓްގާޑް އޮފިސަރުންނަށް ހާއްސަ ތަމްރީން ޕްރޮގްރާމެއް ފަށައިފި
15 ސެޕްޓެމްބަރު 2020 | އަންގާރަ 07:11ތަމްރީން ޕްރޮގްރާމް ކުރިޔަށް ގެންދަނީ 2 ހަފްތާއަށް
ޔޫއެންއޯޑީސީގެ ފަރާތުން އެމްއެންޑީއެފް ކޯސްޓްގާޑް އޮފިސަރުންނަށް ގެންދާ ތަމްރީން ޕްރޮގްރާމްގެ ތެރެއިން
ޔޫއެންއޯޑީސީގެ ފަރާތުން އެމްއެންޑީއެފް ކޯސްޓްގާޑް އޮފިސަރުންނަށް ތަމްރީން ޕްރޮގްރާމެއް ފަށައިފިއެވެ.
އެމްއެންޑީއެފުން ބުނީ، ޔުނައިޓެޑް ނޭޝަންސް އޮފީސް އޮން ޑްރަގްސް އެންޑް ކްރައިމް (ޔޫއެންއޯޑީސީ) އިން އެމްއެންޑީއެފް ކޯސްޓްގާޑުގައި ދެ ހަފުތާގެ މުއްދަތަށް ވެސެލް ބޯޑް ސަރޗް އެންޑް ސީޒް ތަމްރީނު ޕްރޮގްރާމެއް ފަށައިފައިވާކަމަށެވެ. މި ޕްރޮގްރާމަކީ އެމްއެންޑީއެފް އާއި ޔޫއެންއޯޑީސީ ގުޅިގެން ކުރިއަށް ގެންދިއުމަށް ހަމަޖެހިފައިވާ ސިލްސިލާ ތަމްރީނުތަކުގެ ތެރެއިން ފުރަތަމަ ތަމްރީނު ޕްރޮގްރާމްކަމަށާއި މި ތަމްރީނު ޕްރޮގްރާމުގައި ކިޔަވައިދެނީ އެމެރިކާގެ ޔޫއެންއޯޑީސީގެ މުދައްރިބުންކަމަށް އެމްއެންޑީއެފުން ބުނެއެވެ.
މިކަމާއި ގުޅިގެން ޔޫއެންއޯޑީސީންވެސް ވަނީ، އިންޑިއާ ކަނޑުގައި ގާނޫނާއި ގަވާއިދުތަކާއި ހިލާފަށް ހިންގާ ކަންކަން ހުއްޓުވުމަށް، މުހިންމު ތަމްރީން ޕްރޮގްރާމެއް ފަށާފައިވާކަމަށް ޓުވީޓުކޮށްފައެވެ.
ދުނިޔޭގެ އެކި ކަންކޮޅުތަކުގައި، ކަނޑުފޭރޭ މީހުންނާއި ޑްރަގް ޓްރެފިކްކުރުމާއި އިންސާނީ ވަގުފާރީގެ އަމަލުތައް ހުއްޓުވައި ޓެރެރިޒަމާއި ދެކޮޅަށް ކުރާ މަސައްކަތާއި ދެކޮޅަށް މަސައްކަތް ކުރުމުގެ ތަމްރީން ޕްރޮގްރާމްތައް ޔޫއެންއޯޑީސީން ކުރިޔަށް ގެންދެއެވެ. މައުލޫމާތު ލިބިފައިވާ ގޮތުގައި ކޯސްޓްގާޑް އޮފިސަރުންނަށް ހިންގާ ތަމްރީން ޕްރޮގްރާމްގައިވެސް މިކަންތައްތަކަށް ވަރަށް ބޮޑަށް އަލިއަޅުވާލާނެއެވެ. އެމްއެންޑީއެފުން ބުނީ ތަމްރީން ޕްރޮގްރާމްއާއި ބެހޭ ތަފްސީލީ މައުލޫމާތު ޓްރެއިނިންގް ޕްރޮގްރާމަށްފަހު ހާމަކުރަނެކަމަށެވެ.
