މަނަދޫއިން ކޮވިޑް ފެނުމާ ގުޅިގެން 38 މީހުންގެ ސާމްޕަލް ނަގައިފި
އެރަށުން 38 ސާމްޕަލެއް ހޯމަ ދުވަހު ނަގާފައިވޭ
ނ. މަނަދޫ
ނ. މަނަދޫއިން މީހަކު ކޮވިޑަށް ޕޮޒިޓިވްވުމާއި ގުޅިގެން އެ ރަށުގައި ކޮންޓެކްޓް ޓްރޭސިންގ ހެދުމާއި އެކްޓިވް ސަރވިއެލަންސްގެ ދަށުން ސާމްޕަލް ނަގާފައިވާކަމަށް ހެލްތް އިމަރޖެންސީ އޮޕަރޭޝަންސް ސެންޓަރ (އެޗްއީއޯސީ) އިން ބުނެފިއެވެ.
އަންގާރަ ދުވަހުގެރޭ އެޗްއީއޯސީގައި ބޭއްވި ބައްދަލުވުމުގައި އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ އެކްޓިވް ސަރވައިލެންސްގެ ދަށުން އެ ރަށުން 38 ސާމްޕަލެއް ނަގާފައިވާކަމަށެވެ. އަދި އެ ސާމްޕަލްތައް އަންގާރަ ދުވަހު މާލެ ގެނެސް ޓެސްޓް ކުރާނެކަމަށް ވިދާޅުވިއެވެ.
މަނަދޫއިން ފެނުނު ކޭސްއާ ގުޅިގެން މިހާތަނަށް ކޮންޓެކްޓުންގެ ގޮތުގައި 26 މީހަގު ފާހަގަކުރެވިފައިވާ ކަމަށްވެސް ޑރ. ނަޒްލާ ވިދާޅުވިއެވެ. ކޮންޓެކްޓުންގެ ގޮތުގައި ފާހަގަކުރެވިފައިވާ މީހުންގެ ތެރޭގައި ހައި ރިސްކް ކެޓަގަރީގައި ދެތިން މީހަކު ހިމެނެއެވެ. މައުލޫމާތު ލިބިފައިވާ ގޮތުގައި އެއީ އުމުރުން ދުވަސްވީ ފަރާތްތަކެކެވެ.
މަނަދޫއިން ޕޮޒިޓިވްވި މީހާއާއި ގުޅިގެން މީޑިއާގައި ތިލަވެފައިވާ މައުލޫމާތަށް ބަލާއިރު، އޭނާގެ ރިލީޒް ސާމްޕަލްގެ ނަތީޖާ އެންގުމަށް ގުޅިއިރު، އެ މީހާ ހުރީ ކަނޑުމަތީގައެވެ. އަދި އޭނާ ހޯމް ކަރަންޓީނުގައި ހުރިއިރު، ރަށު ތެރެއިން ފެނިފައިވާ ކަމަށް އެ ރަށު ރައްޔިތުންނާއި ނ. އަތޮޅު ހޮސްޕިޓަލްގެ މެނޭޖަރ އިސްމާއީލް ޝަފީގު ވަނީ "ރާއްޖެއެމްވީ" އަށް މައުލޫމާތު ދީފައެވެ.
