ރ. ދުވާފަރުގެ ދެވަނަ ފިޔަވަހީގެ މަގު ހެދުމުގެ މަޝްރޫއު އެމްޓީސީސީ އާއި ހަވާލުކޮށްފި
އެމް.ޓީ.ސީ.ސީ އާއި ހަވާލު ކޮށްފައި ވަނީ ސެޕްޓެމްބަރ މަހުގެ 9 ވަނަދުވަހު
ރ.ދުވާފަރުގެ މަގެއް، ތާރުއަޅާ ނިމިފައި
ރ. ދުވާފަރު ދެވަނަ ފިޔަވަހީގެ މަގު ހެދުމުގެ މަޝްރޫއު މޯލްޑިވްސް ޓްރާންސްޕޯޓު އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާއި ހަވާލުކޮށްފިއެވެ.
އެމްޓީސީސީ އިން ބުނީ މި މަޝްރޫއު އެ ކުންފުންޏާއި ހަވާލު ކޮށްފައި ވަނީ ސެޕްޓެމްބަރ މަހުގެ 9 ވަނަ ދުވަހުއެވެ.
މި މަޝްރޫއުގެ ތެރޭގައި ފައި މަގުގައި ހިނގޭނެ ގޮތަށް 4,960 ސްކެއާ މީޓަރުގެ ސަރަހައްދެއް ގާއިމު ކުރަން ވަނީ ހަމަޖެހިފައެވެ. އަދި މީގެ އިތުރުން މަގުގައި ދުއްވޭ ގޮތަށް 17,790 ސްކެއާ މީޓަރުގެ ސަރަހައްދެއް ގާއިމު ކުރުމުގެ އިތުރުން ކޭބަލް ހޮޅި ވަޅުލުމުގެ މަސައްކަތާއި މަގުމަތީ ނިޝާން ހަރު ކުރުމުގެ މަސައްކަތް ވެސް ވަނީ ހަމަޖެހިފައެވެ.
މި މަޝްރޫއު އަށް ހޭދަވާނެ ކަމަށް ލަފާކޮށްފަައި ވަނީ 37.8 މިލިއަން ރުފިޔާއެވެ. އަދި މި މަޝްރޫއަކީ 300 ދުވަހު ތެރޭގައި ނިންމުމަށް ހަވާލު ކުރެވިފައިވާ މަޝްރޫއެކެވެ.
ސަރުކާރުގެ ފަރާތުން މި މަޝްރޫއުގެ ކޮންޓްރެކްޓުގައި ސޮއި ކުރައްވާފައިވަނީ ޕްލޭނިންގް މިނިސްޓްރީގެ ޑިރެކްޓަރު ޖެނެރަލް އަލްފާޟިލާ ޝާނާ ފާރޫގެވެ. އަދި އެމްޓީސީސީގެ ފަރާތުން ސޮއިކުރައްވާފައި ވަނީ އެމްޓީސީސީގެ ސީއީއޯ އާދަމް އާޒިމްއެވެ.
