ގްރޭންޑް ސްލޭމް މުބާރާތެއް ފުރަތަމަ ފަހަރަށް ތިއެމް ކާމިޔާބުކޮށްފި

ޔޫއެސް އޯޕަން ޓެނިސް މުބާރާތުގެ ޗެމްޕިއަންކަން ހޯދާ ޓެނިހުގެ ގްރޭންޑް ސްލޭމް މުބާރާތެއް ފުރަތަމަ ފަހަރަށް އޮސްޓްރޭލިއާގެ ޑޮމިނިކް ތިއެމް ކާމިޔާބުކޮށްފިއެވެ.

ދުނިޔޭގެ ރޭންކިންގެ ތިންވަނައިގައި އޮތް ތިއެމް މީގެ ކުރިން ކުޅުނު ގްރޭންޑް ސްލޭމް ތިން ފައިނަލުންވެސް ވަނީ ބަލިވެފައެވެ. އެއީ މިދިޔަ އަހަރުގެ އޮސްޓްރޭލިއަން އޯޕަން ފައިނަލްގެ އިތުރުން 2018 އާއި 2019 ވަނަ އަހަރުގެ ފްރެންޗް އޯޕަން ފައިނަލެވެ.

އެކަމަކު ކެރިއަރުގެ ފުރަތަމަ ގްރޭންޑް ސްލޭމް މުބާރާތް ތިއެމް ކާމިޔާބުކުރީ އާދީއްތަ ދުވަހުގެރޭ ކުޅުނު ޔޫއެސް އޯޕަންގެ ފައިނަލްގައި ޖަރުމަންގެ އަލެކްސަންޑަ ޒްވެރެވް އަތުން 3-2 ސެޓުން މޮޅުވެގެންނެވެ.

ވާދަވެރި ކުޅުމެއް ފެނިގެންދިޔަ މި މެޗުގެ ފުރަތަމަ ދެ ސެޓު ގެންގޮސްފައިވަނީ ޒްވެރެވެވެ. އެއީ 6-2 އަދި 6-4 ންނެވެ. އެކަމަކު ތިއެމް ވަނީ ކުޅުން ރަނގަޅުކޮށް ފަހު ތިން ސެޓު ކާމިޔާބުކޮށްފައެވެ. ފަހު ތިން ސެޓު ތިއެމް ގެންދިޔައީ 6-4، 6-3 އަދި 7-6 ންނެވެ.

ފައިނަލް މެޗަށްފަހު އުމުރުން 27 އަހަރުގެ ތިއެމް ބުނީ މީގެ ކުރިން ކުޅުނު ފައިނަލް މެޗުތަކުގައި ވާދަވެރިކޮށް، ރަނގަޅަށް ކުޅުނު ނަމަވެސް ނަސީބުގެ އެހީނުވާ ކަމަށާއި، އެކަމަކު މި ފަހަރު މުބާރާތް ހާސިލްކުރެވުނީ ނަސީބުގެ އެހީވެސް ލިބުމުން ކަމަށެވެ.

މި ފަހަރުގެ ޔޫއެސް އޯޕަނަކީ ކޮވިޑް-19 ގެ ބްރޭކަށްފަހު ބޭއްވި ފުރަތަމަ ޓެނިސް މުބާރާތެވެ. މި މުބާރާތުގައި ނަން މަޝްހޫރު ގިނަ ކުޅުންތެރިންތަކެއް ކުޅެފައެއް ނުވެއެވެ. އޭގެ ތެރޭގައި މިދިޔަ އަހަރުގެ ޗެމްޕިއަން ސްޕެއިންގެ ރަފައެލް ނަޑާލް އާއި ސާބިއާހެ ރޮޖާ ފެޑެރާވެސް ހިމެނެއެވެ. އަދި މިފަހަރުގެ މުބާރާތުން ދުނިޔޭގެ އެއްވަނައަށް ރޭންކް ކޮށްފައިވާ ސާބިއާގެ ނޮވަކް ޖޮކޮވިޗް ވަނީ ޑިސްކޮލިފައި ކޮށްފައެވެ.