ފުރަތަމަ ޑިވިޝަނުގައި އަލަށް ވާދަކުރާ ސުޕަ ޔުނައިޓެޑް ސްޕޯޓްސް (ސަސް) ގެ ކޯޗަކަށް ތަޖުރިބާކާރު ކޯޗު އަޙްމަދު ނާޝިދު (ނާދު) ހަމަޖައްސައިފިއެވެ.

މީގެ ކުރިންވެސް ފުރަތަމަ ޑިވިޝަނުގެ ޓީމުތަކަށް އިރުޝާދު ދީފައިވާ ނާދު ސަސްގެ ކޯޗުގެ މަގާމާ ހަވާލުވީ އެއް އަހަރުގެ އެއްބަސްވުމެއްގެ ދަށުންނެވެ.

ސަސްގެ ކޯޗުގެ މަގާމާ ނާދު ހަވާލުވިއިރު، އޭނާ އެންމެ ފަހުން އިރުޝާދު ދީފައިވަނީ 19 އަހަރުން ދަށުގެ ގައުމީ ފުޓްބޯޅަ ޓީމަށެވެ. މިއަހަރުގެ ޖެނުއަރީ މަހުގެ އެއްވަނަ ދުވަހު 19 އަހަރުން ދަށުގެ ގައުމީ ފުޓްބޯޅަ ޓީމާ ހަވާލުވި ނާދު ވަނީ މިދިޔަ އަހަރުގެ ޑިސެމްބަރު މަހު ނޭޕާލުގައި ބޭއްވި ސައުތު އޭޝިއަން ގޭމްސްގައި ރާއްޖޭގެ އަންހެން ގައުމީ ފުޓްބޯޅަ ޓީމަށް ލޯ މެޑަލް ހޯދައިދީފައެވެ. އަދި ނާދު ވަނީ 2017 ވަނަ އަހަރުގެ ތިންވަނަ ޑިވިޝަން ފުޓްބޯޅަ މުބާރާތުގެ ޗެމްޕިއަންކަން ދިވެހި ސިފައިންގެ ކުލަބާއެކު ހޯދާފައެވެ. ވިކްޓަރީ ސްޕޯޓްސް ކުލަބަށް މީގެ ކުރިން ކުޅުނު ނާދު ވަނީ ވިކްޓަރީގެ އިތުރުން، ޔުނައިޓެޑް ވިކްޓަރީ އާއި އޯލް ޔޫތު ލިންކޭޖް (އޭވައިއެލް) އަށްވެސް ކޯޗުކަން ކޮށްދީފައެވެ.

އައު ސީޒަނުގެ ދިވެހި ޕްރިމިއާ ލީގުން ސަސް ޖާގަ ހޯދާފައިވަނީ މިދިޔަ ސީޒަނުގެ ދެވަނަ ޑިވިޝަނުގެ ރަނަރަޕް ޓީމުގެ ހައިސިއްޔަތުންނެވެ. މިދިޔަ ސީޒަނުގެ ދެވަނަ ޑިވިޝަނުގެ ފައިނަލަށް ދިޔަ ދެ ޓީމަށްވެސް، އަންނަ ސީޒަނުގެ ފުރަތަމަ ޑިވިޝަނުން ޖާގަ ލިބޭގޮތްވީ ސަސްޕެންޝަނުގެ ސަބަބުން ނިއުރޭޑިއަންޓް ސްޕޯޓްސް ކުލަބާއި ވިކްޓަރީ ސްޕޯޓްސް ކުލަބު ދެވަނަ ޑިވިޝަނަށް ވެއްޓުމުންނެވެ. ކުރިން ގަވާއިދުގައި އޮންނަނީ ދިވެހި ޕްރިމިއާ ލީގުގެ އެންމެ ފުލަށް ދާ ދެ ޓީމާއި ދެވަނަ ޑިވިޝަނުގެ ފައިނަލުގައި ކުޅޭ ދެ ޓީމު މެދުގައި ލީގު ބުރެއް ކުޅުމަށް ފަހު، އެންމެ ގިނަ ޕޮއިންޓް ހޯދާ ދެ ޓީމެއް ފުރަތަމަ ޑިވިޝަނަށް އަންނަ ގޮތަށެވެ.

އައު ސީޒަނުގެ ދިވެހި ޕްރިމިއާ ލީގަށް ސަސްއިން ތައްޔާރުވަމުން އައި ނަމަވެސް، އައު ސީޒަން ފަށާނެ ތާރިޚެއް އަދި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ކަނޑައަޅާފައެއް ނުވެއެވެ. އެކަމަކު މިއަހަރުގެ ޑިސެމްބަރު މަހު ފުޓްބޯޅަ ސީޒަން އަލުން ފަށަން އެފްއޭއެމުން މަސައްކަތް ކުރި ނަމަވެސް، ދާދި ފަހުން އެފްއޭއެމްގެ ރައީސް ބައްސާމް އަދީލް ޖަލީލް ވަނީ ފުޓްބޯޅަ ސީޒަން ފެށުން ޑިސެމްބަރު މަހަށްވުރެ ލަސްވުން އެކަށީގެންވާ ކަމަށް ވިދާޅުވެފައެވެ.