ހެންވޭރު ޑާބީ މެޗު ކާމިޔާބުކުރުމަށް ޒެފްރޯލް އޮތީ ކެތްމަދުވެފަ: ނާދު

މުބާރާތަށް ނުކުތީ ފުރަތަމަ ޑިވިޝަންގެ ޖާގައެއް ކަށަވަރު ކުރުމަށް ކަމަށާއި އެގޮތުން ހެންވޭރު ޑާބީ މެޗު ކާމިޔާބުކުރުމަށް ޒެފްރޯލް އޮތީ ކެތްމަދުވެފައި ކަމަށް އެޓީމުގެ ކޯޗު އަހުމަދު ނާޝިދު (ނާދު) ބުނެފިއެވެ.

ދެވަނަ ޑިވިޝަން ފުޓުބޯޅަ މުބާރާތުގެ ފައިނަލްގައި އާދިއްތަ ދުވަހުގެރޭ ޒެފްރޯލާއި ކުޑަ ހެންވޭރު ބައްދަލުކުރާ އިރު، ޒެފްރޯލަކީ ފާއިތުވި އަހަރުވެސް މި މުބާރާތުގެ ފައިނަލްގައި ކުޅެފައިވާ ޓީމެކެވެ. އެހެން ނަމަވެސް އެޓީމަށް ވަނީ ފައިނަލްގައި 2-5 އިން ބަލިވެ ފުރަތަމަ ޑިވިޝަނަށް އެރުމަށް ކުރަމުން އައި މަސައްކަތަށް ހުރަސް އެޅިފައެވެ.

މިއަހަރުގެ ފުރަތަމަ ޑިވިޝަނަށް ކޮލިފައިވުމުގެ އަޒުމުގައި ކުޑަ ހެންވޭރާ ދެކޮޅަށް ކުޅޭ ފައިނަލަށް ނުކުތުމުގެ ކުރިން ރާއްޖެއެމްވީއަށް މައުލޫމާތު ދެމުން ނާދު ބުނީ ފުޓުބޯޅައިގައި މިފަހުން އެންމެ ރަނގަޅު ފުޓުބޯޅައެއް ކުޅެމުން އަންނަ ކްލަބުތައް ނިސްބަތް ވަނީ ހެންވޭރަށް ކަމަށެވެ.

ނާދު ބުނީ ޒެފްރޯލާއި ކުޑަ ހެންވޭރަށް ނިސްބަތްވާ ޓީމުތަކެއް ކަމުން މިއީ ފޯރިގަދަ ބަލާހިތްވާ ފަދަ ކުޅުމެއް ފެނިގެންދާނެ މެޗެއް ކަމަށް ގަބޫލުކުރާ ކަމަށާއި އަދި މި މެޗަށް ޒެފްރޯލް އޮތީ އެންމެ ފުރިހަމައަށް ތައްޔާރުވެފައި ކަމަށެވެ.

މި މެޗަށް ނުކުންނަ އިރު ޒެފްރޯލްގެ ޑިފެންޑަރަކަށް ކާޑު ހަމަވެގެން ނުކުޅެވޭ އިރު، އަނިޔާގެ އެއްވެސް މައްސަލައެއް ޓީމުގައި ނެތް ކަމަށް ނާދު ބުންޏެވެ.

ޒެފްރޯލާއި ކުޑަ ހެންވޭރު ބައްދަލުކުރާ ފައިނަލް މެޗު ކުޅުމަށް ހަމަޖެހިފައި ވަނީ އާދިއްތަ ދުވަހުގެރޭ ގަލޮޅު ރަސްމީ ބޯޅަ ދަނޑުގައެވެ.