ރާއްޖެއިން ކޮވިޑަށް ޕޮޒިޓިވްވި މީހުންގެ 63 ޕަސެންޓަކީ ދިވެހިން
ރާއްޖެއިން މިހާތަނަށް ޕޮޒިޓިވްވި މީހުންގެ ތެރެއިން 6,312 މީހުންނަކީ ފިރިހެނުން
މާލޭގެ މަގުމަތި
ރާއްޖެއިން ރިޕޯޓުކުރި ކޮވިޑް-19ގެ ކޭސްތަކުގެ 63 ޕަސެންޓް ހިއްސާ ކުރަނީ ދިވެހިން ކަމަށް ތަފާސް ހިސާބުތަކުން ދައްކައިފިއެވެ.
މިހާތަނަށް ރާއްޖެއިން 9,052 މީހުން ކޮވިޑް-19 ށް ޕޮޒިޓިވްވެފައިވާއިރު އޭގެތެރެއިން 5,732 މީހުންނަކީ ދިވެހިންނެވެ. އެއީ ރާއްޖެއިން ރިޕޯޓުކޮށްފައިވާ ކޭސްތަކުގެ 63.3 ޕަސަންޓެވެ.
ބާކީ 36.7 ޕަސެންޓަކީ ބިދޭސީންނެވެ. އެގޮތުން 2,525 ބަންގްލަދޭޝް ރައްޔިތުން ކޮވިޑަށް ޕޮޒިޓިވްވެފައިވާއިރު އެއީ ރާއްޖެއިން ރިޕޯޓުކޮށްފައިވާ ކޭސްތަކުގެ 27.8 އެވެ. މިހާތަނަށް ރާއްޖެއިން އިންޑިއާގެ 518 މީހަކު ކޮވިޑަށް ޕޮޒިޓިވްވި ކަމަށް އެޗްޕީއޭގެ ތަފާސްހިސާބުތަކުން ދައްކާއިރު އެއީ 5.72% މީހުންނެވެ.
އެޗްޕީއޭގެ ޑޭޝްބޯޑުން ދައްކާގޮތުގައި ނޭޕާލްގެ 79 މީހަކު ކޮވިޑަށް ޕޮޒިޓިވްވެފައިވެއެވެ. އަދި 14 މީހުންނަކީ ފިލިޕީންސްގެ ރައްޔިތުންނެވެ.
ރާއްޖެއިން މިހާތަނަށް ޕޮޒިޓިވްވި މީހުންގެ ތެރެއިން 6,312 މީހުންނަކީ ފިރިހެނުންނެވެ. އަދި 2,720 މީހުންނަކީ އަންހެނުންނެވެ.
ރާއްޖޭގައި ކޮވިޑު ޖެހޭ މިހުންގެ އަދަދުތައް އިތުރުވަމުން އަންނައިރު ބައްޔަށް ޕޮޒިޓިވް ވާ ދިވެހިންގެ އަދަދުތައް ވަނީ ވަރަށް ބޮޑުތަނުން އިތުރުވެފައެވެ. އެގޮތުން ކޮވިޑު ޖެހޭ މީހުންގެ ތެރޭގައި މިހާރު ގިނައީ ދިވެހި ޒުވާނުން ކަން ފާހަގަކޮށްލެވެއެވެ.
