ކޮވިޑް-19: މިދިޔަ މަހު 2705 މީހުން ރަށްރަށަށް ކަރަންޓީނަށް، 121 މީހުން ޕޮޒިޓިވް
13 ސެޕްޓެމްބަރު 2020 | އާދީއްތަ 07:13ކަރަންޓީނަށް ރަށްރަށަށްދާ މީހުން ގައިޑްލައިނަށާއި ކަރަންޓީނުގެ އެއްބަސްވުމާ އެއްގޮތަށް އަމަލު ކުރަންޖެހޭ
އެޗްއީއޯސީން ބޭއްވި ނޫސްވެރިންގެ ބައްދަލުވުމެއްގެ ތެރެއިން: ރަށްރަށަށް ކަރަންޓީނަށްދާ ފަރާތްތަކުން އިތުރަށް ސަމާލުވާންޖެހޭ
މިދިޔަ އޮގަސްޓް މަހު ކަރަންޓީނަށް 2705 މީހުން ރަށްރަށަށް ދިޔައިރު، އޭގެތެރެއިން 121 މީހުން ކޮވިޑް-19އަށް ޕޮޒިޓިވްވެފައިވާކަމަށް ހެލްތު އެމެޖެންސީ އޮޕަރޭޝަން ސެންޓަރު (އެޗްއީއޯސީ)އިން ބުނެފިއެވެ.
އެޗްއީއޯސީގެ ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެސެންޓަރުގެ ތަރުޖަމާނު ޑރ. ނަޒްލާ ރަފީޤު ވިދާޅުވި ކަރަންޓީނަށްދާ މީހުން ރަށްރަށަށް ފޮނުވަނީ އެޗްޕީއޭގެ ވަކި ގައިޑްލައިންތަކެއްގެ ދަށުން، އެކަމަށް އެއްބަސްވެގެން ކަމަށެވެ. ނަމަވެސް ފަހަކަށްއައިސް ބައެއް މީހުން ގައިޑްލައިންތަކަށް ޢަމަލުނުކުރާކަން ފާހަގަ ކުރައްވައި އެކަމާމެދު ޑރ. ނަޒްލާ ވަނީ ކަންބޮޑުވުން ފާޅުކުރައްވާފަ އެވެ.
މާލެ ސަރަހައްދުގައި ކޮވިޑް-19 ފެތުރުން އިތުރުވުމާ ގުޅިގެން، އެޅި ރައްކާތެރިކަމުގެ ފިޔަވަޅެއްގެގޮތުން މާލެ ސަރަހައްދުން ރަށްރަށަށް ދަތުރުކުރުމާއި ރަށްރަށުން މާލެ ސަރަހައްދަށް އައުމުގައިވެސް ޢަމަލުކުރާނެ ޚާއްސަ އުސޫލުތަކެއް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ވަނީ ކަނޑައަޅައި ޢަމަލުކުރަން ފަށާފައެވެ.
ޑރ. ނަޒްލާ ވިދާޅުވީ، ރަށްރަށަށް ކަރަންޓީނަށްދާ މީހުން، ކަރަންޓީނުގެ އެންގުމާ ހިލާފުވާތަން ފެންނަމުންދާ ކަމަށާއި މީގެސަބަބުން އާއިލާއާއި އަވައްޓެރިންނާއި މުޅި ރަށް ނުރައްކަލަށް ހުށަހެޅެމުންދާ ކަމަށެވެ.
ޑރ. ނަޒްލާ ވިދާޅުވީ، ރަށްރަށަށް ކަރަންޓީނަށްދާ ފަރާތްތަކުގެ ޒިންމާ ވަރަށް ބޮޑު ކަމަށާއި، ވަކިން ހާއްސަކޮށް، ކަނޑައެޅިފައިވާ ގައިޑްލައިނާއެއް ގޮތަށް އަމަލުތައް ބެހެއްޓުން ވަރަށް މުހިއްމު ކަމަށެވެ. އަދި ކަރަންޓީނަށް ރަށްރަށަށްދާ މީހުން، ގައިޑްލައިނަށް އަމަލުކުރެވޭ ރަށްރަށުގައި ގާއިމު ކުރެވިފައިވާ ޓާސްކްފޯސްތަކުންވެސް މޮނީޓަރ ކުރުމަށް ބުރަ މަސައްކަތްތަކެއް ކުރަމުންދާ ކަމަށްވެސް ޑރ. ނަޒްލާ ވިދާޅުވި އެވެ.
ރާއްޖޭގައި މިހާތަނަށް ކޮވިޑް-19 އަށް ޕޮޒިޓިވް 9052 ކޭސް ވަނީ ފެނިފަ އެވެ. އަދި ކޮވިޑް-19 އަށް ޕޮޒިޓިވްވި 31 މީހަކު ވަނީ މަރުވެފަ އެވެ.
