ދީޕިކާގެ އިސްތަށިގަނޑަށް ބޮޑު ބަދަލެއް
ފޮޓޯ އިން ދިޕިކާ ފެނިގެންދަނީ އޭނާގެ އިސްތަށިގަނޑު ވަރަށް ބޮޑަށް ކޮށާލައި، ހައިލައިޓް ކޮށްފައިވާ
ދިޕިކާ ޕަޑްކޯން
ބޮލީވުޑްގެ ކާމިޔާބު ބަތަލާ ދިޕިކާ ޕަޑްކޯންގެ އިސްތަށިގަނޑަށް ވަރަށް ބޮޑު ބަދަލެއް ގެނެސްފިއެވެ.
"ފިލްމްފެއާ" އިން ޓްވީޓް ކުރި ފޮޓޯތަކުން ދިޕިކާ ފެނިގެންދަނީ އޭނާގެ އިސްތަށިގަނޑު ކުރުކޮށް ކޮށާލުމަށްފަހު ހައިލައިޓް ކޮށްފައިވާ ތަނެވެ. ދިޕިކާގެ މި ލުކް ފޭނުންނަށް ވަނީ ވަރަށް ކަމުގޮސްފައެވެ.
ދިޕިކާގެ މި ލުކް އޭނާގެ އެންމެ އަވަހަށް އޮތް ފިލްމުގައި އޭނާ ފެނިގެންދާނެ ލުކެވެ. މި ފިލްމަކީ ޝަކުން ބަޓްރާގެ ފިލްމެކެވެ.
ޝަކުންގެ އާ ފިލްމުގެ ޝޫޓިން ގޯއާގައި ފެށުމުގެ ތައްޔާރީތައް މިހާރު ކުރިޔަށް ދާ ކަމަށް އިންޑިއާގެ ނޫސްތަކުން ބުނެއެވެ. މި ފިލްމުގެ ނަން އަދި އިއުލާނު ކޮށްފައި ނުވީ ނަމަވެސް މި ފިލްމަކީ ވަރަށް ތަފާތު ވާހަކައަކަށް ހަދާ ޑާކް ރިލޭޝަންޝިޕް ތްރިލަރއެކެވެ. ފިލްމުގެ ކާސްޓްގައި ދިޕިކާގެ އިތުރުން ސިދާންތު ޗަތުރަވެދީ އާއި އަނަންޔާ ޕާންޑޭ ވެސް ފެނިގެން ދާނެއެވެ.
ޝަކުންގެ މި ފިލްމަކީ އަންނަ އަހަރު ކުރީކޮޅު ގެނެސް ދިނުމަށް އަމާޒު ހިފާފައިވާ ފިލްމެކެވެ. މި ފިލްމަކީ ކަރަން ޖޯހަރުގެ ދަރުމާ ޕްރޮޑަކްޝަނުން ހަދާ ފިލްމެކެވެ.
