ޕްރިންސިޕަލުންގެ ޓެނުއަރޝިޕް އުސޫލާއި ގުޅިގެން ހަދަން ޖެހޭ ގަވާއިދުތައް ހަދާނީ މަޝްވަރާތައް ކުރުމަށްފަހު: މިނިސްޓްރީ
12 ސެޕްޓެމްބަރު 2020 | ހޮނިހިރު 23:59ޕްރިންސިޕަލަކަށް އެއް ސްކޫލެއްގައި އެންމެ ގިނަވެގެން ހުރެވޭނީ 8 އަހަރު
އެޑިއުކޭޝަން މިނިސްޓްރީގެ ޕަރމެނެންޓް ސެކެޓްރީ އަހުމަދު އަލީ
ޕްރިންސިޕަލުންގެ ޓެނުއަރޝިޕް އުސޫލާއި ގުޅިގެން ހަދަން ޖެހޭ ގަވާއިދުތައް ހަދާނީ މަޝްވަރާ ކުރަން ޖެހޭ ފަރާތްތަކާއި މަޝްވަރާތައް ކުރުމަށް ފަހު ކަމަށް އެޑިއުކޭޝަން މިނިސްޓްރީން ބުނެފިއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަ ދައްކަވަމުން އެޑިއުކޭޝަން މިނިސްޓްރީގެ ޕަރމަނެންޓް ސެކެޓްރީ އަހުމަދު އަލީ ވިދާޅުވީ ޓެނުއަރޝިޕް އުސޫލުގެ ދަށުން ގަވާއިދުތައް ހަދާނީ އަވަސް އަރުވާލާއިގެން ނޫން ކަމަށާއި އެގޮތަށް ގަވާއިދެއް ހަދައިގެން ތަންފީޒެއް ވެސް ނުކުރެވޭނެ ކަމަށެވެ.
އަދި އެ ގަވާއިދުތައް އެކުލަވާލާނީ މަޝްވަރާ ކުރުމަށްފަހު ކުރިމަގުގައި ކޮށްފާނެ އަސަރުތަކަށް ވެސް ވިސްނައިގެން ކަމަށެވެ.
އޭނާ ވިދާޅުވީ މި ގަވާއިދު އެކުލަވާލާނީ ރަނގަޅަށް ދިރާސާ ކުރުމަށްފަހު ކަމަށާއި މިއީ ތައުލީމީ ދާއިރާއަށް ގެނެވިގެންދާ ބޮޑު ބަދަލަކަށް ކަމަށެވެ.
ސިވިލް ސަރވިސް ކޮމިޝަން (ސީއެސްސީ) އިން އެކުލަވާލާފައިވާ މި އުސޫލުގައިވާ ގޮތުން، ޕްރިންސިޕަލުންގެ ޓެނުއަރޝިޕް އަކީ ޕްރިންސިޕަލްގެ މަސްއޫލިއްޔަތާއި ޒިންމާތައް އަދާ ކުރުމަށް ސަރުކާރުގެ ވަކި ސްކޫލަކަށް އައްޔަން ކުރެވޭ މުއްދަތެވެ. މިގޮތުން ސަރުކާރު ސްކޫލެއްގައި ޕްރިންސިޕަލް މަގާމުގައި ތިބޭ މުވައްޒަފުންގެ ޓެނުއަރޝިޕް މުއްދަތަކީ މީލާދީ 4 ހަތަރު އަހަރު ކަމަށް ބުނެފައި ވެއެވެ.
އަދި އެއް ސްކޫލެއްގައި ޕްރިންސިޕަލްގެ މަގާމުގައި އެއްފަރާތަކަށް އެންމެ ގިނަވެގެން މަސައްކަތް ކުރެވޭނީ ވިދިވިދިގެން ޖުމްލަ 8 އަަހަރު ކަމަށް ވެސް އެ އުސޫލުގައި ބުނެފައިވެއެވެ.
