މާފުށީގައި ލޯކަލް ޓޫރިޒަމް އަލުން ފެށުމަށް ގާއިމު ކުރަންޖެހޭ ފްލޫ ކްލިނިކްގެ މަސައްކަތް ފަށައިފި
12 ސެޕްޓެމްބަރު 2020 | ހޮނިހިރު 08:33މާފުށީގައި މަދުވަނީ ފްލޫ ކްލިނިކެއް އެކަނި
ކ. މާފުއްޓާއި މާފުށި ފަޅުން ދާދިފަހުން ހިއްކި ބިން: މާފުއްޓަކީ ރާއްޖޭގެ ލޯކަލް ޓޫރިޒަމްގެ ނަމޫނާ ރަށެއް
ކ. މާފުށިގައި އަލުން ލޯކަލް ޓޫރިޒަމް ފެށުމަށްޓަކައި ގާއިމު ކުރަންޖެހޭ ފްލޫ ކްލިނިކް ގާއިމު ކުރުމުގެ މަސައްކަތް ފަށައިފިއެވެ.
މާފުށީ ކައުންސިލްގެ ރައީސް އުސްމާން ރަޝީދު "ރާއްޖެއެމްވީ" އަށް ވިދާޅުވީ މާފުށީގައި އަލުން ލޯކަލް ޓުރިޒަމް ފެށުމަށް ހުންނަންޖެހޭ ފްލޫ ކްލިނިކް މާފުށި ހެލްތް ސެންޓަރުގައި އިމާރާތް ކުރުމުގެ މަސައްކަތް ހޮނިހިރު ދުވަހު ފަށާފައިވާ ކަމަށެވެ.
އުސްމާން ރަޝީދު ވިދާޅުވީ، މިކަން ކުރުމުގައި، ސަރުކާރުގެ ކަމާބެހޭ އިދާރާތާއި މާފުށި ކައުންސިލާއި އަދި މާފުށީގައި ލޯކަލް ޓޫރިޒަމް ދާއިރާގައި ހަރަކާތްތެރިވާ ވިޔަފާރިވެރިން ބައިވެރިވާ ކަމަށެވެ.
އުސްމާނު ރަޝީދު ވިދާޅުވީ، ފްލޫ ކްލިނިކް ގާއިމު ކުރުމަށް ފައިސާގެ އެހީތެރިކަމުން ފެށިގެން މަސައްކަތް ކުރުމުގައި ވެސް އެރަށުގައި ލޯކަލް ޓޫރިޒަމް ވިޔަފާރިން އެހީތެރިކަން ވަރަށް ބޮޑަށް ލިބެމުންދާ ކަމަށާއި އެހެންކަމުން މާފުށިގައި ލޯކަލް ޓޫރިޒަމްގެ ވިޔަފާރީގައި ހަރަކާތްތެރިވާ ހުރިހާ ވިޔަފާރިވެރިންނަށް ވަރަށް ބޮޑަށް ޝުކުރު ދަންނަވާ ކަމަށެވެ.
މީގެއިތުރުން އުސްމާން ރަޝީދު ވިދާޅުވީ، މާފުށީގެ ކޮންމެ އާއިލާއަކީ ވެސް އަދި ކޮންމެ ރައްޔިތަކީވެސް އެރަށުގެ ލޯކަލް ޓޫރިޒަމްގެ ބައިވެރިއެއް ކަމަށާއި، އަދި މިކަމުން އާމްދަނީ ނުލިބޭ އެންމެ އާއިލާއެއްވެސް މާފުށިގައި ނެތް ކަމަށެވެ. އެހެންކަމުން މިދިއަ މާރޗު މަހުގެ މެދުތެރެއިން ފެށިގެން، އެރަށުގެ ގެސްޓްހައުސް ވިޔަފާރިތައް ހުއްޓި، އެރަށުން ގެސްޓުން ހުސްވެ، މުޅިރަށް ފަޅުވެފައިވާ ކަމުގެ އިހުސާސެއް ކުރެވެމުންދާ ކަމަށެވެ.
އެހެންކަމުން، ރަށު ކައުންސިލާއި އަދި ލޯކަލް ޓޫރިޒަމް ހިންގާ ވިޔަފާރިވެރިންނާ ގުޅިގެން، އަލުން ލޯކަލް ޓޫރިޒަމް މަސައްކަތް ފެށޭތޯ ވަރަށް ބޮޑަށް މަސައްކަތް ކުރައްވަމުން ގެންދަވާ ކަމަށާއި، ޓޫރިޒަމުން މިނިސްޓްރީ މިހާރު އިއުލާން ކޮށްފައިވާ ގޮތަށް އަންނަ އޮކްޓޯބަރު މަހުގެ 15 ވަނަ ދުވަހުން ފެށިގެން މާފުއްޓަށް ގެސްޓުން ގެނެވޭނެ އިންތިޒާމުތައް ހަމަޖެއްސޭތޯ ވަރަށް ބޮޑަށް މަސައްކަތް ކުރައްވަމުން ގެންދަވާ ކަމަށް އުސްމާން ރަޝީދު ވިދާޅުވި އެވެ.
އުސްމާން ރަޝީދު ވިދާޅުވީ، ޓޫރިޒަމް މިނިސްޓްރީ މިހާރު އިއުލާން ކޮށްފައިވާ ގޮތަށް އޮކްޓޯބަރު މަހުގެ 15 އިން ފެށިގެން ލޯކަލް ޓޫރިޒަމް ހިންގުމުގެ ފުރުސަތު، ލިބިގެން ދަނީ މާފުށީގައި ފްލޫ ކްލިނިކެއް ގާއިމު ކުރުމުން ކަމަށެވެ.
އުސްމާން ރަޝީދު ވިދާޅުވީ، ލޯކަލް ޓޫރިޒަމް ހިންގުމަށް ކަނޑައަޅާފައިވާ ގައިޑް ލައިނުގައި ބުނެފައިވާ ގޮތުން، މާފުށީގައި މަދުވަނީ ފްލޫ ކްލިނިކެއް އެކަނި ކަމަށާއި އެކަން މިހާރު ފެށިގެން ކުރިއަށްދާ ކަމަށެވެ.
މާފުއްޓަކީ ގިނަ އަދަދެއްގެ ގެސްޓްހައުސްތަކާއި ފަތުރުވެރިކަމުގެ ދާއިރާގެ ގިނަ ހަރަކާތްތަކެއް ހިންގަމުންދާ ރަށެވެ. ރާއްޖޭގައި އެންމެ ފުޅާ ދާއިރާއެއްގައި ލޯކަލް ޓޫރިޒަމް ހިންގަނީ ވެސް މާފުށީގަ އެވެ.
ރާއްޖޭގައި ބޯޑަރު ބަންދުކޮށް، ރާއްޖެއަށް ޓޫސްރިސްޓުން އައުން މުޅިން ހުއްޓިގެން ދިޔައީ، މިދިއަ މާރޗު މަހުގެ 27 ވަނަ ދުވަހުން ފެށިގެން ނެވެ. ނަމަވެސް މިދިއަ ޖުލައި މަހުގެ 15 ގައި އަލުން ބޯޑަރު ހުޅުވާލުމާއެކު މަދުމަދުން ނަމަވެސް ޓޫސްޓް ރިސޯޓްތަކަށް ޓޫރިސްޓުން އަންނަމުން ދެއެވެ.
