އަފްޣާނިސްތާން ސަރުކާރާއި ޠާލިބާނާ ދެމެދު ސުލްހައިގެ ވާހަކަތައް ފަށައިފި

19 އަހަރުވީ ދިގު ހަނގުރާމަ ނިމުމަކަށް ގެނައުމަށް އަފްޣާނިސްތާން ސަރުކާރާއި ޠާލިބާނާ ދެމެދު ސުލްހައިގެ ވާހަކަތައް ގަތަރުގެ ވެރިރަށް ދޯހާގައި ފަށައިފި އެވެ.

ހޮނިހިރު ދުވަހު ސުލްހައިގެ ވާހަކަތައް ފަށާފައިވާއިރު މިއީ އެމެރިކާގެ ތާރީޚުގައި ވެސް އެގައުމުން ބޭރުގައި އެންމެ ގިނަ ދުވަސްވަންދެން ކުރިޔަށް ގެންގޮސްފައިވާ އަސްކަރީ އޮޕަރޭޝަނެވެ. އެމެރިކާގެ ތިން ރައީސުން ވަނީ މި އޮޕަރޭޝަން ކުރިޔަށް ގެންދަވާފައެވެ.

އޮފިޝަލުންނާއި، ޑިޕްލޮމެޓުން އަދި މަޝްރަހު ދިރާސާ ކުރާ ފަރާތްތަކުން ދެކޭ ގޮތުގައި އަފްޣާނިސްތާން ސަރުކާރާއި ޠާލިބާނުން އެއް މޭޒެއްގެ ދޮށަށް ގެނެވުމަކީ ލިބުނު ވަރަށް ބޮޑު ކާމިޔާބީއެކެވެ. އެހެންނަމަވެސް އޭގެ މާނައަކީ ސުލްހައިގެ ވާހަކަތައް ފަސޭހައިން ނިންމާލެވި ނަތީޖާއަކާ ހިސާބަށް ދެވުން ނޫންކަމަށް އެފަރާތްތަކުން ދެކެއެވެ.

އދ އިން އަފްޣާނިސްތާނަށް ކަނޑައަޅުއްވާފައި ހުންނަވާ ޚާއްސަ މަންދޫބު ޑެބޯރަ ލިއޮންސް އދ ގެ ސެކިޔުރިޓީ ކައުންސިލްގައި ވާހަކަދައްކަވަމުން މިމަހު ވިދާޅުވެފައިވަނީ ވާހަކަތައް އެންމެ ބޮޑަށް ބައްޓަން ވެގެންދާނީ އަފްޣާނިސްތާން ކުރިޔަށް އޮތްތަނުގައި ބޭނުންވެގެންދާ ގޮތްތަކުގެ މައްޗަށް ކަމަށެވެ.

ވާހަކަތައް ފެށިގެންދާނީ އެމެރިކާގެ ސެކެޓްރީ އޮފް ސްޓޭޓް މައިކް ޕޮމްޕޭގެ ބައިވެރިވެވަޑައިގަތުމާއެކު ބާއްވާ ޚާއްސަ ރަސްމިއްޔާތަކުންނެވެ. ވާހަކަތައް ފެށިގެން މިދަނީ އެމެރިކާއަށް 2001 ވަނަ އަހަރުގެ ސެޕްޓެމްބަރ މަހުގެ 11 ވަނަ ދުވަހު ދިން ވަރުގަދަ ހަމަލާއަށް 19 އަހަރު ފުރުނުތާ އެއް ދުވަސް ފަހުންނެވެ. ސެޕްޓެމްބަރ 11ގެ މި ހަމަލާއަކީ އެމެރިކާ ސިފައިން އަފްޣާނިސްތާނަށް އެރުމުގެ މައިގަނޑު ސަބަބުވެސް މެއެވެ.

އޭރު އެމެރިކާގެ ރައީސް ކަމުގައި ހުންނެވީ ޖޯރޖް ޑަބްލިޔު ބުޝް އެވެ. އެމެރިކާއަށް ދިން ހަމަލާއަށް މަސްދުވަސްވީ ފަހުން ޖޯރޖް ޑަބްލިޔު ބުޝް ވަނީ އެހަމަލާގެ ފަހަތުގައި ހުރި އުސާމާ ބިން ލާދިން އަތުލައިގަތުމަށް ޚާއްސަ އޮޕަރޭޝަނެއް ފަށާފައެވެ.

އޭގެފަހުން ކުރިޔަށްދާ މިހަނގުރާމަ ނިމުމަކަށް ގެނައުމަށް ޠާލިބާނުންނާއި އެމެރިކާ އާ ދެމެދު މިއަހަރުގެ ފެބްރުއަރީ މަހު ވަނީ އެއްބަސްވުމަކާ ހަމައަށް އައިސްފައެވެ. އެއެއްބަސްވުމުގެ ދަށުން އަފްޣާނިސްތާނުގައި ތިބި އެމެރިކާ ސިފައިން އެގައުމުން ފައިބަން ޖެހެއެވެ. އަދި ޠާލިބާނުން ދޭ ހަމަލާތައް ހުއްޓާލަން ޖެހެއެވެ. އަދި ޠާލިބާނުންނާއި އަފްޣާނިސްތާން ސަރުކާރާ ދެމެދު ވާހަކަތައް ކުރިޔަށް ގެންދިޔުމަށް އަފްޣާނިސްތާންގެ ޖަލުތަކުގައި ތިބި 5000 ޠާލިބާނުން ދޫކޮށްލަންޖެހެއެވެ.

އެގޮތުގެ މަތިން އަފްޣާނިސްތާން ޖަލުތަކުގެ ތިބި ޠާލިބާނުން އެއްކޮށް މިނިވަންކޮށްފައިވަނީ ނިމިގެން ދިޔަ ހަފްތާގަ އެވެ.

އަނެއްކޮޅުން އެމެރިކާގެ ރިޔާސީ އިންތިޚާބު މިއަހަރުގެ ނޮވެމްބަރ މަހު އޮންނައިރު 2016 ވަނަ އަހަރު ވެރިކަމަށް އައުމަށް ޑޮނަލްޑް ޓްރަމްޕް ވެވަޑައިގެންނެވި ވައުދުކަމުގައިވާ އެމެރިކާގެ އަސްކަރިއްޔާގެ ޝާމިލްވުން އަފްޣާނިސްތާނުގައި މަދުކުރުމުގެ ސިޔާސަތު ތަންފީޒު ކުރުމަށްޓަކައި ވެސް މިކަމަކީ މުހިންމު ކަމެކެވެ.

އެމެރިކާއިން ނޮވެމްބަރ މަހާ ހަމައަށް އަންނައިރު އަފްޣާނިސްތާނުގައި ތިބި އެގައުމުގެ ސިފައިންގެ އަދަދު 13000ން 5000ށް މަދުކުރާނެ ކަމަށް ވަނީ ބެލެވިފައެވެ. މިއީ އެމެރިކާ އާއި ޠާލިބާނާ ދެމެދު ވެވުނު އެއްބަސްވުމުގެ ދަށުން އެމެރިކާއިން ކުރަންޖެހޭ ކަމެކެވެ. މިހާތަނަށް އައިއިރު އަފްޣާނިސްތާން ހަނގުރާމައިގައި އެމެރިކާގެ 2300 ސިފައިން ވަނީ މަރުވެފައެވެ.

ޔޫރަޕްގެ ޑިޕްލޮމެޓުން ވިދާޅުވާ ގޮތުގައި ސުލްހައިގެ ވާހަކަތަކުގެ އެންމެ ކުރީގައި އޮންނަން ޖެހޭނީ ހަމަލާ ބަދަލުކުރުން ހުއްޓާލުމެވެ. ޠާލިބާނުން އަފްޣާނިސްތާނުގެ އަސްކަރީ ފަރާތްތަކަށާއި އާންމުންނަށް ދެމުންގެންދާ ހަމަލާތައް ހުއްޓާލަން ޖެހޭނެކަމަށް އެ ފަރާތްތަކުން ގަބޫލުކުރެއެވެ.

19 އަހަރުވީ މިހަނގުރާމައިގައި މިހާތަނަށް އައިއިރު ލައްކައަކަށްވުރެ ގިނަ އާންމުން މަރުވެފައިވާއިރު އަފްޣާނިސްތާން އެއްކޮށްހެން ވަނީ ސުންނާފަތިވެފައެވެ. އެހެންކަމުން މިހަނގުރާމަ ނިމުމަކަށް ގެނެވޭނެ ހަމައެކަނި ގޮތަކީ ދެ ފަރާތުގެ މެދުގައި ކުރިޔަށް ގެންދެވޭ ވާހަކަތައް ކަމަށް ގިނަ ބަޔަކު ގަބޫލު ކުރެއެވެ.