ލަންކާ އިން ހަދިޔާ ކުރި ސައިފަތްތައް ލުބްނާނުގެ ރައީސްގެ ގާޑުންނަށް ބެއްސެވި މައްސަލައެއް

ލުބްނާނުގެ ވެރިރަށް ބެއިރޫތުގައި ހިނގާދިޔަ ގޮވުމުގެ ހާދިސާއާއި ގުޅިގެން ސްރީލަންކާއިން ހަދިޔާކުރި ސައިފަތްތައް އެގައުމުގެ ރައީސްގެ ގާޑުންނަށް ބެއްސެވި މައްސަލައެއް ފެންމަތިވެއްޖެއެވެ.

ލަންކާއިން ހަދިޔާކުރި 1600 ކިލޯގެ ސައިފަތް ރައީސްގެ ގާޑުންނަށް ބައްސަވާފައިވާކަމަށް ބުނެ ގިނަ ބަޔަކު ދަނީ ސޯޝަލް މީޑިއާގައި ވަރަށް ބޮޑަށް ފާޑުކިޔަމުންނެވެ. އެގޮތުން ޓްވިޓަރގައި ހޭޝްޓެގް ޓީ ތީފް އަދި ހޭޝްޓޭގް ސިލޯން ޓީ ދަނީ ޓްރެންޑް ވަމުންނެވެ.

އެފަރާތްތަކުން ބުނާގޮތުގައި އެ ސައިފަތްތައް ބައްސަވާފައިވަނީ ރައީސް މައިކަލް އޭއޮންގެ ގާޑުންނަށާއި، އާރމީގެ ބޭފުޅުންގެ އިތުރުން އެމީހުންގެ އާއިލާތަކަށެވެ.

ލުބްނާނުގެ ރައީސްގެ އޮފީހުން ސައިފަތް ހަދިޔާކުރި ފޮޓޯތަކެއް އާއްމު ކުރުމާއި އެކު އެގައުމުގެ މީޑިއާތަކުން ވަނީ ގިނަ ސުވާލުތަކެއް ކުރިމަތިކޮށްފައެވެ. ލަންކާގެ މި ހަދިޔާ ހުރީ ކޮންތަނެއްގައިތޯއާއި ގުޅިގެން ކުރެވުނު ސުވާލުތަކަށް ޖަވާބުދެމުން ރައިސް އޮފީހުން ބުނެފައިވަނީ ސްރިލަންކާގެ ސަފީރަށް ލެބްނަންގެ ރައީސް ޝުކުރު އަދާކުރައްވާފައި ވާކަމަށެވެ.

ބެއިރޫތުގައި ހިނގާދިޔަ ހާދިސާއާއި ގުޅިގެން މޯރިޓާނިއާއިން ލުބްނާންއަށް ހަދިޔާކުރި ތަކެއްޗާއި ގުޅިގެން އެގައުމުގެ ސަރުކާރުން ކަންތައް ކުރިގޮތާއި ގުޅިގެން މީގެކުރިން ފާޑުކިއުންތައް އަމާޒުވިއެވެ.

އޮގަސްޓް މަހުގެ 4 ވަނަ ދުވަހު ބެއިރޫތުގައި ހިނގާދިޔަ ހާދިސާގައި 190 ށް ވުރެ ގިނަ މީހުން ދުނިޔެ ދޫކޮށްފައިވާއިރު އެތައް ބަޔަކަށް ވަނީ އެކި ވަރުގެ ޒަހަމްތަކެއް ލިބިފައެވެ.