ފްރާންސް މިޑްފީލްޑަރު އެންގޯލޯ ކާންޓޭ ގަންނަން އިންޓަ މިލާނުން ހުށަހެޅި ހުށަހެޅުން ބަލައިނުގަންނަން ޗެލްސީން ނިންމާފައިވާ ކަމަށް ރިޕޯޓުތައް ބުނެފިއެވެ.

އިންޓައިން ވަނީ ކާންޓޭ ހޯދުމަށް ދެ މިޑްފީލްޑަރުން ކަމަށްވާ ކްރިސްޓިއަން އެރިކްސަން އާއި މާސެލޯ ބްރޮޒޮވިޗް ޗެލްސީއަށް ހުށަހަޅާފައެވެ. މި ޓްރާންސްފާ ބާޒާރުގައި ހަތް ކުޅުންތެރިއަކު ގަންނަން ޗެލްސީން މިހާތަނަށް 200 މިލިޔަން ޕައުންޑް ޚަރަދުކޮށްފައިވުމާއެކު، އެޓީމުން އަންނަނީ ބައެއް ކުޅުންތެރިން ވިއްކާލުމަށް މަސައްކަތް ކުރަމުންނެވެ.

އެކަމަކު ކާންޓޭ ވިއްކާލަން ޗެލްސީން ބޭނުންނުވާ ކަމަށާއި، އެހެންކަމުން އިންޓަގެ ހުށަހެޅުން ބަލައިނުގަންނަން ޗެލްސީން މިހާރު ނިންމާފައިވާ ކަމަށް "ދަ ގާޑިއަން" ގައި ވަނީ ރިޕޯޓުކޮށްފައެވެ.

ކާންޓޭ އަކީ ޗެލްސީގެ ކޯޗަކަށް މިހާރު އިންޓަގެ ކޯޗު އެންޓޯނިއޯ ކޮންޓޭ ހުރިިއިރު ގެނައި ކުޅުންތެރިއެކެވެ. އެހެންކަމުން ކޮންޓޭގެ އެދުމުގެ މަތިން އިންޓަގެ މެނޭޖުމަންޓުން އަންނަނީ ކާންޓޭ އެޓީމަށް ގެނައުމަށް މަސައްކަތް ކުރަމުންނެވެ.

އަނިޔާގެ ސަބަބުން މިދިޔަ ސީޒަނުގައި ކާންޓޭއަށް ގިނަ މެޗުތަކެއް ގެއްލުނު ނަމަވެސް، އޭނާއަކީ އަދިވެސް ޗެލްސީއަށް ވަރަށް މުހިންމު ކުޅުންތެރިއެއް ކަމަށް އެޓީމުގެ ކޯޗު ފްރޭންކް ލަމްޕާޑް ވަނީ ބުނެފައެވެ. އަދި ކާންޓޭ ޗެލްސީގައި ދިގު މުއްދަތަކަށް މަޑުކުރުވަން ބޭނުން ކަމަށާއި، ކާންޓޭ ވިއްކާނުލާނެ ކަމަށްވެސް ލަމްޕާޑް މީގެ ކުރިން ވަނީ ބުނެފައެވެ.

ލެސްޓާ ސިޓީން ވިދާލި ކާންޓޭ ޗެލްސީއަށް ބަދަލުވީ 2016 ވަނަ އަހަރެވެ. މިހާތަނަށް ޗެލްސީއަށް ކުޅެދިން 170 މެޗުގައި 11 ލަނޑު ޖަހާފައިވާ ކާންޓޭ ވަނީ ޗެލްސީއާއެކު އިނގިރޭސި ޕްރިމިއާ ލީގާއި، އެފްއޭ ކަޕްގެ އިތުރުން ޔުއެފާ ޔޫރޮޕާ ލީގުވެސް ކާމިޔާބުކޮށްފައެވެ. އަދި ފްރާންސްގެ ގައުމީ ޓީމާއެކު 2018 ވަނަ އަހަރުގެ ފީފާ ވޯލްޑް ކަޕް ކާމިޔާބުކުރި ކާންޓޭ ވަނީ ޕީއެފްއޭއިން ހޮވާ ޕްރިމިއާ ލީގުގެ އެންމެ މޮޅު ކުޅުންތެރިޔާގެ މަގާމުވެސް ހޯދާފައެވެ.