ޒުވާންކަމަކީ އިންސާނާގެ އުމުރުގެ އެންމެ މުހިންމު ބައި ކަމަށާއި، އެންމެހާ ޒުވާނުން އެ ނިއުމަތާ މެދު ސަމާލުވުމަށް ހުކުރު ޚުތުބާގައި ގޮވާލައްވައިފިއެވެ.

''ޒުވާންކަން ހެޔޮގޮތުގައި ހޭދަކުރުން'' މިމައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ އިންސާނާގެ އުމުރުފުރާގެ ތެރެއިން ޒުވާންކަމަކީ ބޮޑުވެގެންވާ ނިއުމަތެއް ކަމަށާއި، އެ ޒުވާންކަން ހޭދަކުރި ގޮތާ ބެހޭގޮތުން ޚާއްސަ ގޮތެއްގައި ސުވާލުވެވޭނެ ކަމަށެވެ. އަދި ވަކިން ޚާއްސަކޮށް ޒުވާންކަން ހޭދަކުރި ގޮތާބެހޭ ގޮތުން ސުވާލު ކުރެވޭނެކަން ބަޔާންކޮށްފައިވާތީ، ޒުވާންކަމަށް ދެވިފައިވާ އަހައްމިއްޔަތާއި، އެކަމުގެ ބޮޑުކަން ވަޒަންވެގެންދާ ކަމަށް ޚުތުބާގައި ބުނެފައިވެއެވެ.

ޚުތުބާގައި ބުނީ ޒުވާނުންނަކީ ގައުމެއްގެ އެންމެ އަގު ބޮޑު ރައުސްމާލު ކަމަށާއި، ގައުމެއް ތަރައްގީވެ، ކުރިއަރައި ދިއުން ބިނާވެފައި ވަނީ، ގައުމުގެ ޒުވާނުންގެ ހުނަރާއި، ސުލޫކާއި އެ މީހުންގެ ހަރުދަނާ އަގީދާގެ މައްޗަށް ކަމަށެވެ. ގައުމުގެ މުސްތަގުބަލަށް ކުރެވޭ އުއްމީދުތަކުގެ ހަގީގީ މޭސްތިރިންނަކީ އެ ގައުމެއްގެ ޒުވާނުންކަން ފާހަގަކޮށް ޚުތުބާގައި ބުނެފައިވަނީ އިސްލާމް ދީނުގައި ޒުވާނުންނަށް ރަނގަޅު އިސްލާމީ ތަރުބިޔަތެއް ދީ، ހަރުދަނާ ގާބިލު ބަޔަކަށް ހެދުމަށް ވަރަށް ބޮޑަށް ބާރު އަޅާފައިވާ ކަމަށެވެ.

ޚުތުބާގައި ބުނީ ހަރުދަނާ އީމާންތެރި ޒުވާނުންނަކީ އެމީހުންގެ ނަފުސާއި މުދަލުން ވެސް ދީނާއި ގައުމަށްޓަކައި ގުރުބާންވާނެ ބައެއް ކަމަށާއި، ﷲ ގެދީން ޙިމާޔަތްކޮށް، އެ ދީނަށް ނަޞްރު ދީ، އަދި ގައުމަށް ދިމާވާ ކޮންމެ ނުރައްކާތެރިވަގުތެއްގައި ގައުމު ދިފާއު ކުރުމުގައި އިސް ސަފުގައި ތިބޭނެ ވަރުގަދަ ފަހުލަވާނުން ކަމަށެވެ. އަދި އިސްލާމީ އުއްމަތް ބިނާކުރުމުގައި ޒުވާނުން އަދާކޮށްފައި ވަނީ، ތާރީޚު ފަޚްރުވެރިވާ ފަދަ ދައުރެއް ކަމަށާއި، އިސްލާމް ދީނުގައި ޒުވާނުންނަށް މަތިވެރި މަގާމެއް ދީފައިވާ ކަމަށެވެ.

ޚުތުބާގައި ބުނީ ޒުވާނުންނަކީ ގައުމު އެއުރެންނާ މެދު ފަޚުރުވެރިވާ ބަޔަކަށް ހެދުމުގައި، މައިންބަފައިން އެއުރެންގެ ޒިންމާ ފުރިހަމަ ގޮތުގައި އުފުލަންޖެހޭ ކަމަށާއި، އަދި މިނޫނަސް އެންމެހާ ޒިންމާދާރު ފަރާތްތަކުން އެ ޒިންމާ އުފުލަންޖެހޭ ކަމަށެވެ. އެގޮތުން އެންމެ އިސްކަމެއްގެ ގޮތުގައި ޒުވާނުން އިސްލާމީ އަގީދާ އާއި، މަތިވެރި އަހުލާގެއްގެ މަތީގައި ތަރުބިއްޔަތު ކުރުމަށް ޚާއްސަ ސަމާލުކަމެއް ދޭންޖެހޭ ކަމަށް ޚުތުބާގައި ބުނެފައިވެއެވެ.

ޚުތުބާގައި ބުނީ ޒުވާނުން އިސްލާމް ދީނަށް ލޯބި ޖައްސައި، އިސްލާމްދީނުގެ މަތިވެރި އަސާސް ތަކުގެ މަތީގައި ދިރިއުޅޭން ދަސްކޮށްދޭން ޖެހޭ ފަދައިން، ޒުވާނުންގެ ހިތްތަކުގައި، ގައުމީ ލޯބި އާލާކޮށް ދިރުވަން ޖެހޭ ކަމަށެވެ.

އިސްލާމީ ގިއުގަނޑުގެ ތެރެއިން އުފާ ފާޅުކުރުމާއި، ދަތުރުދިއުމާއި، ޙަފްލާތައް ބޭއްވުމަކީ ދީން މަނާކުރާ ކަންކަމެއް ނޫންކަން ފާހަގަކޮށް ޚުތުބާގައި ބުނީ ރަސޫލާ ވެސް ބޮޑެތި މީހުންނާއި، ކުޑަކުދީންނާ ސަމާސާ ކުރައްވާ ކަމަށާއި، ހިތްތަކަށް އުފާވެރިކަން ގެނެސް ދެއްވާ ކަމަށެވެ.

އެހެންކަމުން ހުރިހާ ގޮތަކުން ވެސް ޒުވާނުންނަށް ޚާއްސަ އަހަމިއްޔަތުގެ ކަމެއް ދީނުގައި ދީފައިވާކަން ޚުތުބާގައި ފާހަގަކުރައްވާފައިވެއެވެ.