ބޭރޫތު ޕޯޓުގައި ބާރުގަދަ ގޮވުން ގޮވިތާ މަސްދުވަސް ފަހުން އެސަރަހައްދުގައި ބޮޑު އަލިފާންގަނޑެއް ރޯވަމުންދަނީ

ލުބުނާންގެ ވެރިރަށް ބޭރޫތުގެ ޕޯޓްގައި ބޮޑު އަލިފާންގަނޑެއް ރޯވެ އަނދަން ފަށައިފި އެވެ.

ބައިނަލްއަގްވާމީ މީޑިޔާތަކުން ރިޕޯޓްކުރާ ގޮތުގައި މިއަލިފާންގަނޑު ރޯވުމަށް ދިމާވި ސަބަބެއް އަދި އެހާބޮޑަށް ސާފެއް ނޫނެވެ. އެސަރަހައްދުން ވަރަށް ދުރަށް ބޯކޮށް ކަޅު ދުން ފެންނަން ހުރިއިރު ރޮއިޓަރސް އިން ލުބުނާންގެ އަސްކަރިއްޔާއާ ހަވާލާދީ ބުނެފައިވަނީ ރޯވެފައިވަނީ ތެޔޮ ރައްކާކޮށްފައި ހުރި ތަނެއްގަޔާއި ޓަޔަރުތަކެއްގައި ކަމަށެވެ.

މިހާދިސާއާ ގުޅިގެން މުޅި ލުބުނާނަށް ވަނީ އަނެއްކާވެސް ސިހުން ގެނުވާފައެވެ.

މިދިޔަ އޮގަސްޓްމަހުގެ 4 ވަނަ ދުވަހު ބޭރޫތު ޕޯޓުގައި ގޮވި ބާރުގަދަ ގޮވުމުގައި 191 މީހުން މަރުވެފައިވާއިރު 6000ށް ވުރެ ގިނަ މީހުން ވަނީ ޒަޚަމްވެފައެވެ. ހަ އަހަރު ވަންދެން ޕޯޓުގައި ރައްކާކޮށްފައިހުރި އެމޯނިއަމް ނައިޓްރޭޓް ކޮންޓެއިނަރތަކެއް ގޮވާ ހިނގި މިހާދިސާގައި 300،000 މީހުންގެ ގެދޮރު ގެއްލިފައިވެ އެވެ.

އެސަރަހައްދުން ލައިވްކޮށް ފެންނަމުންދާ ފުޓޭޖްތަކަށް ބަލާއިރު ޕޯޓު ސަރަހައްދުގައި ރޯވެފައިވާ އަލިފާންގަނޑު ނިއްވާލުމުގެ މަސައްކަތް އަލިފާން ނިއްވާ ފަރާތްތަކުން އަންނަނީ ކުރަމުންނެވެ.