އޯއެލްއެސްސީ މޯލްޑިވްސްގެ ތާނަ ލޯގޯ ތަޢާރަފުކޮށްފި

އޮފިޝަލް ލިވަޕޫލް އެފްސީ ސަޕޯޓާސް ކުލަބު (އޯއެލްއެސްސީ) ގެ ރާއްޖޭގެ ގޮފިން ރަސްމީ ތާނަ ލޯގޯ ތަޢާރަފުކޮށްފިއެވެ.

މިލޯގޯ އަކީ އޯއެލްއެސްސީގެ ރާއްޖޭ ގޮއްޕާ ގުޅިގެން ސީދާ އިނގިރޭސިވިލާތު ކުލަބުން އެމީހުންގެ ޑިޒައިން ސްޓޭންޑަޑްތަކާ އެއްގޮތަށް ފަރުމާ ކޮށްފައިވާ، އަދި ލިވަޕޫލުން ރަސްމީކޮށް ބަލައިގަންނަ ލޯގޯއެކެވެ. މިއީ މިފަދަ ކުލަބަކުން ތާނަ އަކުރު ހިމެނޭ ގޮތަށް ލޯގޯއެއް އުފެއްދި ފުރަތަމަ ފަހަރެވެ.

އޯއެލްއެސްސީ މޯލްޑިވްސްއިން ހާމަކުރާ ގޮތުގައި މުޅީން ދިވެހި ބަހުން ލޯގޯއެއް ހެދުމުގެ ބަދަލުގައި، ތާނަ ލޯގޯއެއް ހަދާފައިވަނީ އެ ކުލަބުގެ ރަޖިސްޓާ ކުރެވިފައިވާ އަސްލު ނަން ނުގެއްލޭ ގޮތަށް ގެނެއުމަށެވެ. އޮފިޝަލް ލިވަޕޫލް އެފްސީ ސަޕޯޓާސް ކުލަބު (އޯއެލްއެސްސީ) އަކީ ރަސްމީ ހައިސިއްޔަތަކުން ލިވަޕޫލްގައި ރެޖިސްޓާ ކުރެވި، ދުނިޔޭގެ އެކި ކަންކޮޅުތަކުގައި ހިންގާ ސަޕޯޓަރުންގެ ކުލަބުތަކަށް ދެވިފައިވާ ނަމެކެވެ. މިގޮތުން މިހާތަނަށް 90 ގައުމަކުން 300 ށްވުރެ ގިނަ ކުލަބު ވަނީ ރަޖިސްޓާ ކޮށްފައެވެ.

އޯއެލްއެސްސީގެ ރާއްޖޭގެ ގޮފި ރެޖިސްޓާ ކޮށްފައިވަނީ 2018 ވަނަ އަހަރުއެވެ. ލިވަޕޫލްގެ އިތުރުން ރަސްމީކޮށް ރާއްޖޭގައި ވެސް ރަޖިސްޓްރީކޮށްގެން ކުރިއަށްގެންދާ އޯއެލްއެސްސީން އަންނަނީ ކުޅިވަރާއި އެހެނިހެން ގޮތްގޮތުން ވެސް ރާއްޖޭގައި ހަރަކާތްތަށް ހިންގަމުންނެވެ.

އެގޮތުން މިއަހަރުގެ ކުރީކޮޅު އޯއެލްއެސްސީ މޯލްޑިވްސްގެ ދައުވަތަކަށް ލިވަޕޫލްގެ ކުރީގެ ވައިސް ކެޕްޓަން ޑެނިއަލް އެގާ ވަނީ ރާއްޖެ އައިސް ލިވަޕޫލްގެ ސަޕޯޓަރުންނާ ބައްދަލުކޮށްފައެވެ. މިއީ ރާއްޖޭގެ ސަޕޯޓާސް ކުލަބަކުން އިސްވެ ބޭރުގެ ކުޅުންތެރިޔަކު ގެނެސްގެން ބޭއްވި ފުރަތަމަ އިވެންޓެވެ.

މީގެ އިތުރުންވެސް އޯއެލްއެސްސީ މޯލްޑިވްސްއިން އަންނަނީ މުޅި ރާއްޖޭގައި ލިވަޕޫލް ޕްރޮމޯޓުކޮށް ސަޕޯޓަރުންގެ މެދުގައި ގުޅުން ބަދަހިކުރުމުގެ ގޮތުން އެކި ކަހަލަ ހަފުލާތަކާއި، މުބާރާތްތަށް ބޭއްވުމުގެ އިތުރަށް މުޖުތަމައުއަށް ފާއިދާހުރި އެކިކަންކަމުގައި ބައިވެރިވެ އެހީތެރިވަމުންނެވެ.