ގައުމީ ފުޓްސަލް ޓީމު ތުރުކަމިނިސްތާނަށް ފުރައިފި
13 ސެޕްޓެމްބަރު 2017 | ބުދަ 16:30މުބާރާތުގެ ގްރޫޕުގެ ފުރަތަމަ މެޗުގައި ރާއްޖެ ނިކުންނާނީ ޔޫއޭއީއާ ދެކޮޅަށް
ގައުމީ ފުޓްސަލް ޓީމު ފުރުމުގެ ކުރިން ފޮޓޯއަކަށް ހުއްޓިލައިގެން
ފަސް ވަނަ އޭޝިއަން އިންޑޯ އެންޑް މާޝަލް އާޓްސް ގޭމްސްގައި ވާދަކުރުމަށް ރާއްޖޭގެ ގައުމީ ފުޓްސަލް ޓީމު ތުރުކަމިނިސްތާނަށް ފުރައިފި އެވެ. ތުރުކެމެނިސްތާންގެ އަޝްޣަބަތުގައި މި މަހުގެ 16 އިން 26 ގެ ނިޔަލަށް ކުރިއަށްދާ މި މުބާރާތުގައި ރާއްޖެ ލައްވާލާފައި ވަނީ ގްރޫޕް ބީގައެވެ. ރާއްޖޭގެ އިތުރުން ގްރޫޕް ބީގައި ހިމެނެނީ އަފްއާނިސްތާނާއި، ޗައިނާ އާއި ޔުނައިޓެޑް އަރަބް އެމިރޭޓްސް (ޔޫއޭއީ) އަދި އުޒްބަކިސްތާނެވެ. މުބާރާތުގެ ގްރޫޕުގެ ފުރަތަމަ މެޗުގައި ރާއްޖެ ނިކުންނާނީ ޔޫއޭއީއާ ދެކޮޅަށެވެ. އެމެޗް ކުޅޭނީ އަންނަ ހޮނިހިރު ދުވަހު އެވެ. މިމުބާރާތުގެ ކުއާޓާ ފައިނަލުގެ ޖާގަތައް ކަށަވަރުވާނީ ގްރޫޕްގެ އެއް ވަނަ އަދި ދެވަނަ ހޯދާ ޓީމުތަކަށެވެ. ގައުމީ ފުޓްސަލް ޓީމުގެ އިތުރުން އޭޝިއަން އިންޑޯ ގޭމްސްގައި ރާއްޖޭގެ އެތުލެޓިކްސް ޓީމް ވެސް ވާދަކުރާނެއެވެ.
