އެއެފްސީ 19 އަހަރުން ދަށުގެ މުބާރާތުގެ ކޮލިފައިންގައި ވާދަކުރުމަށްޓަކައި ރާއްޖޭގެ ގައުމީ 19 އަހަރުން ދަށުގެ ޓީމު ތަޖިކިސްތާނަށް ފުރައިފިއެވެ.

ޖުމްލަ 23 ކުޅުންތެރިންނާ 6 އޮފިޝަލުންނާއެކު ގައުމީ ޓީމު ތަޖިކިސްތާނަށް ފުރާފައިވާއިރު ރާއްޖެ މި މުބާރާތުގެ ކޮލިފައިންގައި ހިމެނިފައިވަނީ ގްރޫޕް ބީގައެވެ. ރާއްޖެއާއެކު މި ގްރޫޕްގައި ހިމެނިފައިވަނީ އުޒްބެކިސްތާނާ ތަޖިކިސްތާނާ ސްރީ ލަންކާގެ އިތުރުން ބަންގްލަދޭޝްއެވެ

ރާއްޖޭގެ ގައުމީ 19 އަހަރުން ދަށުގެ ޓީމު ތަޖިކިސްތާނަށް ފުރާފައިވާއިރު އެ ޓީމު ވަނީ އައްޑޫ ސިޓީގައި ކޭމްޕް ކޮށްފައެވެ. އެގޮތުން އައްޑޫ ސިޓީއިން ހޮވާލެވުނު ކުޅުންތެރިންގެ ޓީމަކާ ދެކޮޅަށް ގައުމީ ޓިމު ކުޅުނު މެޗުން މޮޅުވީ 1-0 ގެ ނަތީޖާ އަކުންނެވެ. ތަޖިކިސްތާނަށް ފުރުމުގެ ކުރިން ގައުމީ ޓީމު ވަނީ މާލޭގައި ފަރިތަކުރުންތަށް ބާއްވާފައެވެ.

ރާއްޖޭގެ ގައުމީ ޓީމު ވަނީ މިދިޔަ މަހު ބޫޓާންގައި ބޭއްވި ސާފް ޗެމްޕިއަންޝިޕުގައި ވެސް ވާދަކޮށްފައެވެ. އެގޮތުން އެ މުބާރާތުގައި ރާއްޖެ ކުޅުނު ހުރިހާ މެޗަކުން ބަލިވިއިރު މިކަމާ ގުޅިގެން އެފްއޭއެމްއަށް ބޮޑެތި ފާޑުކިޔުންތަކެއް އަމާޒުވުމާ ވިދިގެން އެ އިދާރާއިންވަނީ ރާއްޖޭގެ ޒުވާން ޓީމުތަށް ބިނާކުރުމަށް މަސައްކަތް ފަށާފައެވެ.

2018 ވަނަ އަހަރުގެ 19 އަހަރުން ދަށުގެ ކޮލިފައިންގައި 43 ގައުމަކުން ވާދަކުރާއިރު މުބާރާތަށް ކޮލިފައިވާނީ 16 ގައުމެކެވެ. ފުރަތަމަ މެޗުގައި ރާއްޖެ ސްރީ ލަންކާއާ ދެކޮޅަށް ނުކުންނައިރު ދެވަނަ މެޗުގައި ނުކުންނާނީ ބަންގްލަދޭޝްއާ ދެކޮޅަށެވެ. އަދި ތިންވަނަ މެޗުގައި އުޒްބެކިސްތާނާ ދެކޮޅަށް ނުކުންނަ އިރު ހަތަރު ވަނަ މެޗުގައި ނުކުންނާނީ ތަޖިކިސްތާނާ ދެކޮޅަށެވެ.