ކުޅިވަރަކީ ކޯޓަށް ގޮސްގެން ކަންކަން ނިންމަން ޖެހޭ ކަމެއް ނޫންކަން އެނގިއްޖެ: އައްޔަ

ކުޅިވަރަކީ ކޯޓަށް ގޮސްގެން ކަންކަން ނިންމަން ޖެހޭ ކަމެއް ނޫންކަން ޓޭބަލް ޓެނިސް އެސޯސިއޭޝަން އޮފް މޯލްޑިވްސްގެ އިންތިޚާބުން އެނގިގެން ގޮސްފި ކަމަށް އެ އެސޯސިއޭޝަނުގެ ރައީސްގެ މަގާމަށް ދެވަނަ ދައުރަކަށް އިންތިޚާބު ވެވަޑައިގެންނެވި އަލީ ރަޝީދު (އައްޔަ) ވިދާޅުވެއްޖެއެވެ.

ޓީޓީ އެސޯސިއޭޝަނުގެ އިންތިޚާބު އަންގާރަ ދުވަހު ބޭއްވީ، އިންތިޚާބު ފަސްކޮށްދިނުމަށް ވަގުތީ އަމުރަކަށް ކުރީގެ މަޝްހޫރު ޓީޓީ ކުޅުންތެރިޔާ އަލީ އާދަމް މަނިކް (ތާޅަފިލި އަލިބެ) ސިވިލް ކޯޓުގައި އެދުނު ނަމަވެސް، ވަގުތީ އަމުރެއް ނެރެދެވެން ނެތް ކަމަށް ކޯޓުން ނިންމުމާ ގުޅިގެންނެވެ.

ޓީޓީ އެސޯސިއޭޝަނުގެ އިންތިޚާބު އައްޔަ ކާމިޔާބުކުރެއްވީ ޣިޔާސުއްދީން ސްކޫލްގެ ކުރީގެ ޕްރިންސިޕަލް ތޯހާ ސަލީމާ ވާދަކުރައްވާ 75 ވޯޓުގެ ތަފާތަކުންނެވެ. އައްޔައަށް އިންތިޚާބުގައި 155 ވޯޓު ލިބިވަޑައިގެންނެވިއިރު، ތޯހާ ލިބިވަޑައިގެންނެވީ 80 ވޯޓެވެ.

ރައީސްގެ މަގާމަށް ދެވަނަ ދައުރަކަށް އިންތިޚާބު ވެވަޑައިގަތުމަށް ފަހު މީޑިއާތަކާ ވާހަކަ ދައްކަވަމުން އައްޔަ ވިދާޅުވީ ހޯމަ ދުވަހު ސިވިލް ކޯޓުން ނިންމި ނިންމުމާއި، އަދި އަންގާރަ ދުވަހު ބޭއްވި އިންތިޚާބުން އެނގިގެން ދިޔައީ ކުޅިވަރަކީ ކޯޓުތަކުން ކަންކަން ނިންމާ ކަމެއް ނޫންކަން ކަމަށާއި، ކުޅިވަރުގައި ގޮތް ނިންމާނީ އެސޯސިއޭޝަނުގެ މެންބަރުން ލާ ވޯޓުން ކަމަށެވެ. އަދި ހޯމަ ދުވަހު ކޯޓުން ނިންމި ނިންމުން އެއީ ކުޅިވަރު އާއިލާއަށް ލިބިގެންދިޔަ ކާމިޔާބީއެއް ކަމަށްވެސް އައްޔަ ވިދާޅުވިއެވެ.

އައްޔަ އިތުރަށް ވިދާޅުވީ ޓީޓީ އެސޯސިއޭޝަނުގެ އިންތިޚާބު ކާމިޔާބުކުރުމުގެ ޔަގީންކަން ކުރިންވެސް އޮތް ކަމަށާއި، އެކަމަކު އިންތިޚާބު ބޯމަތިވިއިރު އެކި ފަރާތްތަކުގެ ޕްރެޝަރު އައި ކަމަށެވެ.

ޓީޓީ އެސޯސިއޭޝަނުގެ އިންތިޚާބު އަންގަރަ ދުވަހު ބޭއްވިއިރު، އައު ހިންގާ ކޮމިޓީއަށް ހޮވުވަޑައިގަތީ ހުސް އައްޔަގެ ޓީމުގައި ހިމެނުނު ބޭފުޅުންނެވެ.

ޓީޓީގެ ގިނަ މުބާރާތްތަކުގައި މީގެ ކުރިން ގިނަ ކާމިޔާބީތަކެއް ހޯދާފައިވަ އައްޔަ އަންނަނީ 2006 ވަނަ އަހަރުން ކުޅުން ހުއްޓާލީއްސުރެ އެސޯސިއޭޝަނަށް ޚިދުމަތްކުރަމުންނެވެ. އެގޮތުން 2006ން 2008ށް އިދާރީ މަސައްކަތްތައް ކުރިއިރު، 2008 ވަނަ އަހަރުން ފެށިގެން އޭނާ ވަނީ ނައިބު ރައީސްގެ މަގާމު ފުރުއްވާފައެވެ. އައްޔަ ޓީޓީގެ ރައީސްގެ މަގާމަށް ފުރަތަމަ އިންތިޚާބުވީ 2016 ވަނަ އަހަރުއެވެ. އައްޔަގެ ރައީސްކަމުގައި ޓީޓީން ވަނީ 21 މެޑަލް ހޯދާފައެވެ. އަދި މިދިޔަ އަހަރުތަކުގައި ބައިނަލްއަގުވާމީ މައިދާނުގައި ޓީޓީން ވަނީ ބޮޑެތި ކާމިޔާބީތަކެއް ހޯދާފައެވެ.