އަދުރޭ އަގު ބޮޑު ފްލެޓްތައް ގަތް މައްސަލަ އޭސީސީން އަލުން ބަލަނީ
8 ސެޕްޓެމްބަރު 2020 | އަންގާރަ 06:30ފްލެޓެއްގެ އަގަކީ 4.5 މިލިއަން ރުފިޔާ، ޖުމްލަ 9 މިލިއަން ރުފިޔާ
އިދިކޮޅު ޕީޕީއެމް-ޕީއެންސީ ކޯލިޝަނުގެ ޕީއެންސީގެ ރައީސް އަބްދުއްރަހީމް އަބްދުﷲ: ނުހައްގު، ކުއްލި މުއްސަނދިކަން ހޯއްދަވާފައިވާ ކަމުގެ ތުހުމަތު ކުރެވޭ ބޭފުޅެއް
އިދިކޮޅު ޕީޕީއެމް-ޕީއެންސީ ކޯލިޝަންގެ ޕީއެންސީގެ ރައީސް އަދި ރައްޔިތުންގެ މަޖިލީހުގެ ފޮނަދޫ ދާއިރާގެ ކުރީގެ މެމްބަރު އަބްދުއްރަހީމް އަބްދުﷲ (އަދުރޭ) "ރެހެންދި-6" ފްލެޓްތަކުން އަގު ބޮޑު ދެ ފްލެޓެއް ގަތް މައްސަލަ އެންޓި ކޮރަޕްޝަން ކޮމިޝަން (އޭސީސީ) އަލުން ބެލުމަށް ނިންމައިފިއެވެ.
އޭސީސީން މައުލޫމާތު ލިބިފައިވާ ގޮތުގައި، "ރެހެންދި-6" އިން އަބްދުއްރަހީމް، އަގުބޮޑު ދެ ފްލެޓް ގަތްކަމަށް ބުނެ، އެ ކޮމިޝަނަށް 8 ފެބްރުއަރީ 2018 ގައި މައްސަލައެއް ހުށަހެޅުނު ކަމަށެވެ. އަދި އަބްދުއްރަހީމް އަގުބޮޑުކޮށް ދެ ފްލެޓެއް ގަތް މައްސަލައިގައި ކޮރަޕްޝަނުގެ އަމަލެއް ނުހިމެނޭ ކަމަށް 9 ޖުލައި 2018 ގައި އޭސީސީން ނިންމައި, އެ މައްސަލަ ފައިލް ކޮށްފައިވާ ކަމަށެވެ.
ނަމަވެސް ރައީސް އަބްދުﷲ ޔާމީންގެ ވެރިކަން ބަދަލުވެ، ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރާއި މިހާރު ހިނގަމުންދާ 19 ވަނަ ރައްޔިތުންގެ މަޖިލީހާއެކު، އޭސީސީއަށް އައު މެމްބަރުން އައްޔަން ކުރުމުން އެކޮމިޝަނުން ދަނީ ކުރީގެ ކޮމިޝަނުން އެގޮތަށް ޝައްކު އުފެދޭ ނިންމާފައިވާ ބައެއް މައްސަލަތައް އަލުން ބަލަމުންނެވެ.
އެގޮތުން އަބްދުއްރަހީމް އަގު ބޮޑުކޮށް ދެ ފްލެޓް ގަތް މައްސަލަ އޭރުގެ އޭސީސީން ނިންމި ނިންމުމުގައި ޝައްކުތަކެއް އުފެދޭ ކަންތައްތަކެއް ހުރުމުންނާއި އިތުރަށް ބަލަންޖެހޭ ކަންތައްތަކެއް ހުރުމުން އެމައްސަލަ އަލުން ބަލަމުންދާ ކަމަށް އޭސީސީން ބުނެއެވެ.
އަގު ބޮޑު ދެ ފްލެޓް އަބްދުއްރަހީމްގެ ދެކަނބަލުން ބައްލައިވައި ގަތްއިރު، އަބްދުއްރަހީމަކީ، އޭރުގެ ސަރުކާރުގެ އެންމެ ނުފޫޒުގަދަ އެއް ބޭފުޅާއެވެ. ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު ކަމުގެ އިތުރުން ޕީޕީއެމް ޕާލަމެންޓްރީ ގްރޫޕްގެ އެންމެ ނުފޫޒު ގަދަ އެއް ބޭފުޅަކީ އަބްދުއްރަހީމެވެ. އޭނާއަކީ އޭރު ސަރުކާރު ހިންގި ޕީޕީއެމްގެ ނާއިބު ރައީސް ވެސް މެއެވެ.
އެފްޑަބްލިއު ކޮންސްޓްރަކްޝަނުން މާލޭގައި އިމާރާތް ކުރި "ރެހެންދި-6" އިން އަބްދުއްރަހީމާއި އޭނާގެ އަނބިކަނބަލުން ދިޔާނާ ހުސައިން ފްލެޓް ބައްލަވައިގަނެފައި ވަނީ ފްލެޓެއް 4.5 މިލިއަން ރުފިޔާ އަށެވެ. އެ ދެ ފްލެޓްގެ ޖުމްލަ އަގު 9 މިލިއަން ރުފިޔާއަށް އަރާއިރު އެއީ ފެންވަރު ރަނގަޅު ފްލެޓްތަކެކެވެ.
އަބްދުއްރަހީމްގެ ދެ ކަނބަލުން ފްލެޓް ބައްލަވައިގަތުމަށް ދައްކަންޖެހޭ ފައިސާ ހަލާސްކޮށްފައި ވާތީ، އެ ދެ ފަރާތަށް ފްލެޓް ރެޖިސްޓްރީ ބަދަލުކޮށް ދިނުމަށް ފޮނުވާފައިވާ ސިޓީ ވަނީ ސޯޝަލް މީޑިއާގައި އާއްމުވެފައެވެ.
އެނގިފައިވާ ގޮތުގައި އަބްދުއްރަހީމްގެ ދެކަނބަލުން ބައްލަވައިގަނެފައި ވަނީ ފުރަތަމަ ފްލޯގެ އެއްވަނަ ފްލެޓާއި ދެ ވަނަ ފްލެޓެވެ. އެހެންކަމުން އެއީ ޖެހިޖެހިގެން ހުރި ދެ ފްލެޓް ކަމަށް ވެއެވެ.
އަބްދުއްރަހީމް ވެސް ވަނީ ފްލެޓް ބައްލަވައިގަނެފައިވާ ކަމަށް ވިދާޅުވެ، ބައެއް މީޑިއާތަކަށް އޭރު އެކަން ކަށަވަރު ކޮށްދެއްވާފައެވެ. އަދި އޭނާއަކީ އެވަރުގެ ފޯރުންތެރިކަން ހުންނަ ބޭފުޅެއްކަމަށް އަބްދުއްރަހީމް ވިދާޅުވެފައި ވެއެވެ.
