ރެއާލް ދޫކޮށް ހަމޭސް އެވަޓަނަށް

ރެއާލް މެޑްރިޑަށް ކުޅެމުން އައި ކޮލަމްބިއާގެ މިޑްފީލްޑަރު ހަމޭސް ރޮޑްރިގޭޒް އެވަޓަނަށް ބަދަލުވެއްޖެއެވެ.

އުމުރުން 29 އަހަރުގެ ފޯވާޑް ވަނީ އެވަޓަންއާއެކު ދެ އަހަރުގެ އެއްބަސްވުމެއް ހަދާފައެވެ. އަދި މި އެއްބަސްވުމުގެ ދަށުން އެވަޓަނުން ބޭނުންވެއްޖެ ނަމަ، އިތުރު އެއް އަހަރަށް ހަމޭސް އެ ކުލަބުގައި ބެހެއްޓުމުގެ ފުރުސަތު ލިބެއެވެ. ހަމޭސްގެ ސޮއި އެވަޓަނުން ހޯދި ނަމަވެސް، އޭނާ ގަތުމަށް ކުރި ޚަރަދު އެ ކުލަބުން ހާމަކޮށްފައެއް ނުވެއެވެ. އެކަމަކު ރިޕޯޓުތައް ބުނާ ގޮތުން ހަމޭސް އެވަޓަނަށް ބަދަލުވީ 20 މިލިޔަން ޕައުންޑްގެ އަގަކަށެވެ.

ހަމޭސް އެވަޓަނަށް ބަދަލުވިއިރު، އޭނާ ވަނީ އެވަޓަންގެ މިހާރުގެ ކޯޗު ކާލޯ އަންޗެލޮޓީއާއެކު ރެއާލް މެޑްރިޑާއި ބަޔާން މިއުނިކުގައި މަސައްކަތްކޮށްފައެވެ. އަދި ހަމޭސް ގަތުމަށް އެވަޓަނުން މަސައްކަތް ފެށީ އަންޗެލޮޓީގެ އެދުމުގެ މަތިން ކަމަށްވެސް ރިޕޯޓުތައް ބުނެއެވެ.

އެވަޓަނަށް ބަދަލުވުމަށްފަހު ހަމޭސް ބުނީ ތާރީޚީ ކުލަބަކަށް ބަދަލުވެވުމުން އެކަމާ އުފާކުރާ ކަމަށާއި، އަދި އަންޗެލޮޓީއާއެކު އަނެއްކާވެސް މަސައްކަތް ކުރަން ލިބުމަކީ އޭނާއަށް ލިބޭ ބޮޑު ހިތްހަމަޖެހުމެއް ކަމަށެވެ. އަދި އެވަޓަންއާއެކު ގިނަ ކާމިޔާބީތަކެއް ހޯދައި، އޭނާގެ ފެންވަރު އިތުރަށް ރަނގަޅު ކުރުމަށް މަސައްކަތް ކުރާނެ ކަމަށްވެސް ވަނީ ބުނެފައެވެ.

ރެއާލް ދޫކޮށް ހަމޭސް އެވަޓަނަށް ބަދަލުވީ، ރެއާލްގެ ފުރަތަމަ އެގާރައިން ފަހަކަށް އައިސް ޖާގަ ނުލިބޭތީއެވެ. އެގޮތުން މިދިޔަ ސީޒަނުގައި ހަމޭސް ރެއާލަށް ކުޅެދީފައިވަނީ އެންމެ 14 މެޗެވެ. އެކަމަކު މީގެ ކުރިން ޕޯޓޯ އަދި ބެންފީކާއަށްވެސް ކުޅެފައިވާ ހަމޭސް ވަނީ އޭނާ ރެއާލްގައި ހޭދަކުރި ތިން ސީޒަނުގައި ކުޅުނު 111 މެޗުގައި 36 ލަނޑު ކާމިޔާބުކޮށްފައެވެ. އަދި ވަނީ ރެއާލްއާއެކު ސްޕެނިޝް ލީގާއި، ޔުއެފާ ޗެމްޕިއަންސް ލީގާއި، ޔުއެފާ ސުޕާ ކަޕް އަދި ފީފާ ކްލަބު ވޯލްޑް ކަޕް، މި ކޮންމެ މުބާރާތެއް ދެ ފަހަރު ކާމިޔާބުކޮށްފައެވެ.

އެވަޓަނުން ހަމޭސްގެ ސޮއި ހޯދިއިރު، އެ ކުލަބުން ވަނީ އަންނަ ސީޒަނަށް ނާޕޮލީއަށް ކުޅެމުން އައި ބްރެޒިލް މިޑްފީލްޑަރު އެލަންގެ ސޮއިވެސް ހޯދާފައެވެ. އެލަން އަކީވެސް މީގެ ކުރިން އަންޗެލޮޓީއާއެކު މަސައްކަތް ކޮށްފައިވާ ކުޅުންތެރިއެކެވެ.