ސިންގަލް ވިންޑޯ މަޝްރޫއުގައި ހެދި ޓެކްނިކަލް އިވެލުއޭޝަނުން ފާސްވީ ވެބް ފޮންޓެއިން އެކަނި!
7 ސެޕްޓެމްބަރު 2020 | ހޯމަ 12:52މަޝްރޫއު އެވާރޑް ކުރުމުގައި އެންމެ އިސް ކަމެއްގެ ގޮތުން ބަލަނީ ޓެކްނިކަލް އިވެލުއޭޝަނަށް
ފިނޭންސް މިނިސްޓްރީގެ އޮފިޝަލުން ހޯމަ ދުވަހު ނޫސްވެރިންނަށް މައުލޫމާތު ދެނީ- މިނިސްޓްރީން ވަނީ ބިޑް އެވާރޑް ކުރި ގޮތުގެ ތަފްސީލުތައް ހިއްސާ ކޮށްފައި
ބޯޑަރުގައި ހަރަކާތްތެރިވާ މުހިއްމު 7 މުއައްސަސާއެއް އެއް ވިއުގައަކުން ގުޅާލުމަށް މި ސަރުކާރުން ފަށާފައިވާ "ނެޝަނަލް ސިންގަލް ވިންޑޯ" މަޝްރޫއުގެ ބިޑިންގ މަރުޙަލާގައި ހެދި ޓެކްނިކަލް އިވެލުއޭޝަނުން ފާސްވީ ހަމައެކަނި ވެބް ފޮންޓެއިން ކުންފުނި ކަމަށް ފިނޭންސް މިނިސްޓްރީން ހާމަ ކޮށްފިއެވެ.
ވެބްފޮންޓެއިންއާ މަޝްރޫއު ހަވާލުކުރީ އަގު ހެޔޮކޮށް ކުރިއަށް ގެންދަން ހުށަހެޅި ގިނަ ކުންފުނިތައް ބާކީ ކުރުމަށް ފަހު ކަން ލިޔުންތަކުން ފެންނަން އޮތް ކަމަށް މީޑިއާތަކުން ރިޕޯޓް ކޮށްފައިވާއިރު، އެކަމުގެ ޙަޤީޤަތް ހޯމަ ދުވަހު ފިނޭންސް މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި ވަނީ އާންމު ކޮށްފައެވެ.
އެގޮތުން މިނިސްޓްރީގެ ސީނިއަރ ޕޮލިސީ ޑިރެކްޓަރ ހުސައިން ހަމީމް ވިދާޅުވީ، މި މަޝްރޫއު އެވާރޑް ކުރުމުގައި އެންމެ މުހިއްމު ކަމެއްގެ ގޮތުން މިނިސްޓްރީން ބަލާފައިވާނީ ބިޑިންގ މަރުޙަލާގައި ހެދި ޓެކްނިކަލް އިވެލުއޭޝަނަށް ކަމަށެވެ. އަދި މިފަދަ މަސައްކަތެއް ކުރެވޭނެ ކަމުގެ ޤާބިލުކަން ހުރިކަން ވެސް އެނގިގެން ދަނީ އެސެސްމަންޓު ހެދުމުންކަން ފާހަގަ ކުރައްވައި އޭނާ ވިދާޅުވީ، އެއީ މިނިސްޓްރީން ބަލާ އެންމެ އަސާސީ އެއް މިންގަނޑު ކަމަށެވެ.
އަދި އެހެން ކުންފުނިތަކުން ހުށައަޅާފައިވާ އަގު ހެޔޮ ނަމަވެސް، މަސައްކަތަށް "ކޮލިފައި" ނޫންކަން މިނިސްޓްރީން ފާހަގަ ކޮށްފައިވެއެވެ.
މިނިސްޓްރީން ބުނީ، އެ މިންގަނޑުން ބެލިއިރު، އެސެސްމަންޓުން ފާސްވެފައި ވަނީ ވެސް ހަމައެކަނި ވެބްފޮންޓެއިން ކުންފުނި ކަމަށެވެ. އަދި އެ ކުންފުންޏާ ގުޅިގެން ފާހަގަވި މައްސަލަ އަކީ ވެބް ފޮންޓެއިން އޭޝިއާ އިންކް (ފިލިޕީންސް)ގެ ތަޖުރިބާގެ ލިޔުންތަކުގެ ގޮތުގައި ހުރީ ވެބް ފޮންޓެއިން އެފް.ޒެޑް.އެލް.އެލް.ސީ (ޔޫ.އޭ.އީ) ގެ ލިޔުންތަކަށް ވުން ކަމަށެވެ. އެހެން ނަމަވެސް، އެއީ އިންޓެގްރިޓީ ވައިލޭޝަނެއް (ކުންފުނިން އޮޅުވާލުމުގެ މަޤްސަދުގައި ކޮށްފައިވާ ކަމެއް) ކަމަށް ނުބެލެވޭ ކަމަށް އޭޑީބީއާއި މިނިސްޓްރީއަށް ވެސް ފާހަގަވެފައިވާ ކަމަށް އޭނާ ވިދާޅުވިއެވެ.
އެއާއެކު، އަލުން މި މަޝްރޫއުގެ ބިޑިންގއަށް ދާއިރު ވެސް، އެހެން ކުންފުނިތަކެކޭ އެއްގޮތަށް ވެބް ފޮންޓެއިން އޭޝިއާ އިންކް (ފިލިޕީންސް)އަށް ބައިވެރިވުމުގެ ފުރުސަތު އޮތް ކަމަށް އޭޑީބީން ވަނީ ނިންމާފައެވެ.
