28 އޮގަސްޓްގެ ކުރިން ނަގާފައިވާ ކަޅު ބަޓާއި ހުދު ބަޓު ބޭރު ކުރުމަށް ހާއްސަ ހުއްދައެއް ދެނީ

ސައިޓީސްގެ މުއާހަދާ އަށް އަމަލު ކުރަން ފެށުމުގެ ކުރިން ކަޅު ބަޓު އަދި ހުދު ބަޓު ހުއިފިލަނޑާގެ ސްޓޮކް އެކްސްޕޯޓް ކުރަން ބޭނުންވާ ފަރާތްތަކަށް ޚާއްޞަ "ޕްރީ-ކޮންވެންޝަން ސެޓްފިކެޓެއް" ދިނުމަށް ނިންމައިފިއެވެ.

އެންވަޔަރަމަންޓް މިނިސްޓްރީން ބުނެފައިވަނީ 28 އޮގަސްޓުން ފެށިގެން "ކޮންވެންޝަން އޮން އިންޓަނޭޝަނަލް ޓްރޭޑް އިން އެންޑޭންޖާޑް ސްޕީޝީޒް އޮފް ވައިލްޑް ފައުނާ އެންޑް ފްލޮރާ" (ސައިޓީސް) މުޢާހަދާ ގެ ޖަދުވަލު 2 ގައި ދިވެހިރާއްޖޭގައި ކުރާ ހުއިފިލަނޑާގެ މަސްވެރި ކަމުގައި ނަގާ ދެ ބާވަތެއް ކަމަށްވާ ހުދު ބަޓު އަދި ކަޅު ބަޓު ހިމެނުމާއި ގުޅިގެން، ދިވެހިރާއްޖޭގެ ސައިޓީސް ސައިންޓިފިކް އޮތޯރީ އެއްކަމަށްވާ މޯލްޑިވްސް މެރިން ރިސަރޗް އިންސްޓިޓިއުޓުން ހެދި ރިޕޯރޓް (ނޮންޑެޓްރިމަންޓަލް ފައިންޑިންގ) އަށް ބިނާކޮށް، އެ ދެ ބާވަތަށް ސައިޓީސް އެކްސްޕޯޓް ޕާމިޓު ދޫނުކުރުމަށް ނިންމާފައިވާ ކަމަށެވެ.

އެގޮތުން މި 28 އޮގަސްޓުގެ ކުރިން ނަގާފައިވާ (ހާވެސްޓް ކޮށްފައިވާ) މި ދެ ބާވަތުގެ ހުއިފިލަނޑާގެ ސްޓޮކް އެކްސްޕޯޓް ކުރަން ބޭނުންވާ ފަރާތްތަކަށް ޚާއްޞަ "ޕްރީ-ކޮންވެންޝަން ސެޓްފިކެޓެއް" ދޫކުރުމަށް ނިންމާ، މި ސެޓްފިކެޓް ދޫކުރެވޭނީ އެކްސްޕޯޓު ކުރަން ބޭނުންވާ ފަރާތްތަކުން، ނަގާ ޕްރޮސެސް ކޮށްފައި ހުރި ސްޓޮކްގެ އަދަދާއި ބަރުދަން އެނގޭ ގޮތަށް، މި މަހުގެ 15 ވަނަ ދުވަހުގެ ކުރިން މިނިސްޓްރީގައި އެ ސްޓޮކް ރަޖިސްޓްރީ ކުރާ ފަރާތްތަކަށް ކަމަށެވެ.

އެންވަޔަރަމަންޓް މިނިސްޓްރީން ބުނީ 15 ސެޕްޓެމްބަރު 2020 އާއި ހަމައަށް ރަޖިސްޓްރީ ނުކުރާ މި ދެ ބާވަތުގެ ހުއިފި ލަނޑައަށް "ޕްރީ-ކޮންވެންޝަން ސެޓްފިކެޓް" ދޫނުކުރެވޭނެ ކަމަށެވެ. އަދި ރަޖިސްޓްރީ ކޮށްފައިވާ ސްޓޮކް އެކްސްޕޯޓު ކުރުމަށް ބޭނުންވާ "ޕްރީ-ކޮންވެންޝަން ސެޓްފިކެޓް" އަށް އެދި 31 ޑިސެމްބަރުގެ ކުރިން މިނިސްޓްރީ އަށް ހުށަހަޅަން ވާނެ ކަމަށެވެ. އެންވަޔަރަމަންޓް މިނިސްޓްރީން ބުނީ ރަޖިސްޓްރީ ކުރާތާ ގިނަވެގެން 6 މަސް ދުވަހުގެ ތެރޭގައި އެ ސްޓޮކް އެކްސްޕޯޓު ކުރަންވާނެ ކަމަށެވެ.

އަދި މި ދެ ބާވަތުގެ ހުއިފިލަނޑާ އެކްސްޕޯޓު ކުރުމަށް ބޭނުންވާ ފަރާތްތަކުން، މި ހިނގާ ސެޕްޓެމްބަރު މަހުގެ 15 ވަނަ ދުވަހުގެ ކުރިން އެކަމަށް ހާއްސަ ކޮށްފައިވާ ފޯމު ފުރިހަމަ ކުރެއްވުމަށްފަހު މިނިސްޓްރީ އަށް އީމެއިލްގެ ޒަރިއްޔާ އިން ހުށަހެޅުމަށް ވަނީ އެދިފައެވެ. މީގެ އިތުރުން އީމެއިލްގެ ސުރުޚީގައި "ސައިޓީސްއާ ގުޅޭ" މިހެން ޖަހަން ޖެހޭނެ ކަމަށާއި، "ޕްރީ-ކޮންވެންޝަން ސެޓްފިކެޓް" ހޯދުމަށް ރަޖިސްޓްރީ ކުރާ ހުއިފިލަނޑާގެ 2 ބާވަތުގެ ސްޓޮކް، މިމިނިސްޓްރީން ބޭނުންވެއްޖެ ހިނދެއްގައި އިންސްޕެކްޓް ކުރެވޭނެ އިންތިޒާމް ރަޖިސްޓްރީ ކުރާ ފަރާތުން ހަމަޖައްސަން ވާނެ ކަމަށެވެ.

ހުއިފިލަނޑާގެ ދެ ބާވަތެއް ކަމަށްވާ ހުދު ބަޓާއި ކަޅު ބަޓު ރާއްޖެއިން ބޭރު ކުރުމުގެ ހުއްދަ ދިނުން ހުއްޓާލަން ނިންމާފައިވަނީ ދިވެހިރާއްޖެއިން ބައިވެރިވެފައިވާ ބައިނަލްއަޤްވާމީ މުޢާހަދާއެއް ކަމަށްވާ، "ކޮންވެންޝަން އޮން އިންޓަރނޭޝަނަލް ޓްރޭޑް އިން އެންޑޭންޖަރޑް ސްޕީޝީޒް އޮފް ވައިލްޑް ފޯނާ އެންޑް ފްލޮރާ" (ސައިޓީސް) މުޢާހަދާއިން އޮގަސްޓް 2019 ގައި ބޭއްވުނު 18 ވަނަ "ކޮންފަރެންސް އޮފް ދަ ޕާރޓީސް" (ކޮޕް 18) ގައި، ދިވެހިރާއްޖޭގައި ކުރާ ހުއިފިލަނޑާ މަސްވެރިކަމުގައި ނަގާ ދެ ބާވަތެއް ކަމަށްވާ ހުދު ބަޓު އަދިކަޅު ބަޓު ވަނީ އެ މުޢާހަދާގެ ޖަދުވަލު 2 ގައި ހިމެނުމަށް ފާސްކޮށް، އެކަމަށް ތައްޔާރުވުމަށް އެއް އަހަރު ދުވަހުގެ މުއްދަތެއް ދީފައިވާތީއެވެ.

އެހެންކަމުން މި ހިނގާ އޮގަސްޓް މަހުގެ 28 ވަނަ ދުވަހުން ފެށިގެން މި ދެ ބާވަތުގެ ހުއިފިލަނޑާ އަކީ ސައިޓީސް މުޢާހަދާގެ ޖަދުވަލު 2 ގައިވާ ގޮތުގެ މަތިން ނެގުން ވަނީ މަނާކޮށްފައެވެ. އެ މުއާހަދާގެ ޖަދުވަލު 2 ގައި އެއްވެސް ބާވަތެއްގެ ދިރޭ އެއްޗެއް ހިމަނައިފިނަމަ، އެ ބާވަތެއް ވިޔަފާރި އުޞޫލުން އެއް ގައުމުން އަނެއް ގައުމަށް ގެންދެވޭނީ، އެކްސްޕޯޓު ކުރާ ޤައުމުގެ ސައިޓީސް މެނޭޖްމަންޓް އޮތޯރިޓީއިން ދޭ ސައިޓީސް ޕާމިޓަކާއެކުގައެވެ.