ކޮވިޑުގެ ސަބަބުން އީރާނުގެ ފަތުރުވެރިކަމަށް 490 މިލިއަން ޑޮލަރުގެ ގެއްލުމެއް!

ކޮރޯނާވައިރަހުގެ ސަބަބުން އީރާނުގެ ފަތުރުވެރިކަމުގެ ސިނާއަތަށް 490 މިލިއަން ޑޮލަރުގެ ގެއްލުމެއް ލިބިފައިވާ ކަމަށް އެ ގައުމުގެ ކަލްޗަރަލް ހެރިޓޭޖް، ޓޫރިޒަމް އެންޑް ހޭންޑި ކްރާފްޓްސް މިނިސްޓަރު ވިދާޅުވެއްޖެއެވެ.

މެހްރް ނޫސް އެޖެންސީ އަށް ދެއްވި އިންޓަވިއު އެއްގައި މިނިސްޓަރު އަލީ އަޝްގަރް ވިދާޅުވީ، މާރޗް މަހުގެ 20ން ޖޫން މަހުގެ 20 އާ ހަމަޔަށް އެގައުމަށް ޒިޔާރަތްކޮށްފައިވަނީ އެންމެ 74 ފަތުރުވެރިން ކަމަށެވެ. މިދިޔަ އަހަރުގެ މި މުއްދަތުގައި އިރާނަށް 2.3 މިލިއަން ފަތުރުވެރިން ޒިޔާރަތް ކުރިއެވެ. އޭނާ ވިދާޅުވީ، މިދިޔަ އަހަރުގެ މާރޗް މަހުން ފެށިގެން މި އަހަރު ފެށުނު ހިސާބާ ހަމަޔަށް 8.7 މިލިއަން ފަތުރުވެރިން ޒިޔާރަތް ކޮށްފައިވާ ކަމަށެވެ.

އީރާނުގެ ހޮޓެލިއަރ އެސޯސިއޭޝަނުން ބުނި ގޮތުގައި، ފަތުރުވެރިކަމުގެ ސިނާއަތުގަ މަސައްކަތްކުރާ 240،000 މީހުންނަށް ކޮވިޑް-19 ގެ ސީދާ އަސަރު ކުރިއެވެ. އަދި 550،000 މީހުންނަށް ނުސީދާ އަސަރު ކޮށްފައިވާ ކަމަށެވެ.

އީރާނު ސަރުކާރުން ވަނީ ކޮވިޑުގެ ނުރަނގަޅު އަސަރުކުރި ވިޔަފާރިތަކުގެ އިތުރުން މެދު ފަންތީގެ އާމްދަނީ ލިބޭ އާއިލާތަކަށް އެހީތެރިވުމުގެ ގޮތުން ތިން ބިލިއަން ޑޮލަރުގެ އެހީގެ ޕެކޭޖެއް ދޭން ނިންމާފައެވެ. މި ލޯންތައް ކުދި އަދި މެދު ފަންތީގެ ވިޔަފާރިތަކަށްވެސް ދޭ ގޮތަށް ނިންމާފައިވަ ކަމަށް އިރާނުގެ ސެންޓްރަލް ބޭންކުން ވަނީ ބުނެފައެވެ. 12 ޕަސެންޓްގެ އިންޓްރެސްޓު ހިމެނޭ މި ލޯނުތައް ދައްކަން ޖެހެނީ ދެ އަހަރަށް ބަހާލައިގެންނެވެ. ސެންޓްރަލް ބޭންކުގެ ގަވަރުނަރު ހެމައްތީ ވިދާޅުވީ، މި ލޯނަށް ޝަރުތު ހަމަވާނީ ވަޒީފާތަކުން މުވައްޒަފުން ވަކިނުކުރާ ކުންފުނިތައް ކަމަށެވެ.

އީރާނަށް ޓޫރިޒަމް އިން ލިބޭ އާމްދަނީ ދަށަށް ގޮސްފައިވާއިރު ކޮވިޑުގެ ބަލި ދިގުލައިގެންދާނަމަ ދުނިޔޭގެ 75 މިލިއަން ވަޒީފާ ގެއްލި 2.1 ޓްރިލިއަންގެ ގެއްލުމެއް ލިބޭނެ ކަމަށް ވޯލްޑް ޓްރެވެލް އެންޑް ޓޫރިޒަމް ކައުންސިލުން ވަނީ ހާމަކޮށްފައެވެ.