ރަން މެޑަލް ގެނައި ކުޅިވަރު އޮތީ ސަސްޕެންޝަނެއްގެ ތުންފަތް މަތީގައި: ޖައުޝަން

ބައިނަލްއަގުވާމީ މުބާރާތްތަކުން ރަން މެޑަލް ގެނައި ކުޅިވަރު ކަމަށްވާ ޓޭބަލް ޓެނިސް މިހާރު އޮތީ ސަސްޕެންޝަނެއްގެ ތުންފަތް މަތީގައި ކަމަށް ޓޭބަލް ޓެނިސް އެސޯސިއޭޝަން އޮފް މޯލްޑިވްސްގެ ޤާނޫނީ ވަކީލް މުޙައްމަދު ޖައުޝަން ޝަރީފް ވިދާޅުވެއްޖެއެވެ.

ޓީޓީ އެސޯސިއޭޝަނުގެ އިންތިޚާބު އަންނަ އަންގާރަ ދުވަހު ބޭއްވުމަށް ތާވަލުކޮށްފައިވީ ނަމަވެސް، ޓީޓީ އެސޯސިއޭޝަނުގެ މައްސަލަ މިހާރު އަންނަނީ ސިވިލް ކޯޓުގައި ކުރިއަށް ގެންދަމުންނެވެ. އެއާއެކު އިންޓަނޭޝަނަލް ޓޭބަލް ޓެނިސް ފެޑެރޭޝަން (އައިޓީޓީއެފް) އިން ރާއްޖެ ސަސްޕެންޑް ކުރުމުގެ ބިރު އެބައޮތް ކަމަށް ޓީޓީ އެސޯސިއޭޝަނުން މީގެ ކުރިން ވަނީ ބުނެފައެވެ.

ޓީޓީ އެސޯސިއޭޝަނުގައި އާދީއްތަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޖައުޝަން ވިދާޅުވީ ކުޅިވަރު ޤާނޫނުތަށް ހެދިފައި ހުންނަނީ އެހެން ޝަރުއީ ޤާނުނުތަކާ ތަފާތުކޮށް ކަމަށެވެ. ކުޅިވަރުގެ މައްސަލައެއް ދިމާވެފައިވާނަމަ، އެންމެ ފުރަތަމަ ހުށަހަޅަން ޖެހޭނީ އެ ކުޅިވަރެއްގެ އެސޯސިއޭޝަނަށް ކަމަށް ޤާނޫނުގައި ވަރަށް ސާފުކޮށް ލިޔެވިފައިވާ ކަމަށާއި، އެކަމަކު ޓީޓީގެ މައްސަލައިގައި، އެއްވެސް ފަރާތަކުން އެ އެސޯސިއޭޝަނަށް މައްސަލައެއް ހުށަހަޅާފައި ނުވާ ކަމަށެވެ.

ޖައުޝަން އިތުރަށް ވިދާޅުވީ ރާއްޖޭގެ ކުޅިވަރުގެ އެންމެ ފަހުގެ ނިންމުން ނިންމާ ތަނަކީ ކުޅިވަރާ ބެހޭ ގައުމީ މަޖިލިސް ކަމަށާއި، ޓީޓީ އެސޯސިއޭޝަނާ ދެކޮޅަށް ކުޅިވަރާ ބެހޭ ގައުމީ މަޖިލީހަށް ހުށަހެޅި މައްސަލަ، އެ މަޖިލީހުން ބަލައި، އެކަމަށް ވަކިގޮތަކަށް މައްސަލަ ނިންމާފައިވާ ކަމަށެވެ. އަދި ވިދާޅުވީ ކުޅިވަރާ ބެހޭ ގައުމީ މަޖިލީހުން ނިންމި ނިންމުމުގައި، ޓީޓީ އެސޯސިއޭޝަނުން ޤާނޫނާއި ގަވާއިދާ ޚިލާފަށް އެއްވެސް ކަމެއް ކޮށްފައި ނުވާކަމަށް ބުނެފައިވާ ކަމަށްވެސް ވިދާޅުވިއެވެ. އަދި މި މައްސަލަ ކޯޓަށް ހުށަހެޅި ފަރާތްތަކުން ޓީޓީ އެސޯސިއޭޝަން ސަސްޕެންޑް ނުކުރާނެ ކަމަށް ބުނެ ދައްކަމުން ދަނީ ރޯ ބުހުތާނު ދޮގު ވާހަކަތަކެއް ކަމަށްވެސް ޖައުޝަން ވިދާޅުވިއެވެ.

ޓީޓީ އެސޯސިއޭޝަނުގެ މައްސަލަ ހިންގާ ކޮމިޓީގައި ހިމެނިވަޑައިގަންނަވާ ކުރީގެ މަޝްހޫރު ޓީޓީ ކުޅުންތެރިޔާ އަލީ އާދަމް މަނިކް (ތާޅަފިލި އަލިބެ) ކޯޓަށް ހުށަހެޅުއްވީ ސްޕޯޓްސް ކޮމިޝަނާއި ކުޅިވަރާ ބެހޭ ގައުމީ މަޖިލީހުންވެސް ޓީޓީގެ ކަންކަން އިސްލާހުކުރުމަށް އުޒުރުވެރިވުމާ ގުޅިގެންނެވެ.

ޓީޓީ އެސޯސިއޭޝަނުގެ އިންތިޚާބު މައްސަލަ ކޯޓުގައި އޮތްއިރު، އަންނަ އަންގާރަ ދުވަހު އެސޯސިއޭޝަނުގެ އިންތިޚާބު ބޭއްވުމަށް މިހާރު ވަނީ ނިންމާފައެވެ. މި އިންތިޚާބުގައި މިހާރުގެ ރައީސް އަލީ ރަޝީދު އާއި ތޯހާ ސަލީމް އަދި މުހައްމަދު ޖަލާލް ވާދަކުރައްވާއިރު، ޖަލާލުގެ ނަން އަނބުރާ ނެގުމަށް އޭނާ ނިންމާފައިވާ ކަމަށް ވަނީ މައުލޫމާތު ލިބިފައެވެ.