ނައިފަރުގައި އަންހެނެއްގެ ބަނޑަށް ދަރިފުޅު މަރުވި މައްސަލަ ބަލަނީ
6 ސެޕްޓެމްބަރު 2020 | އާދީއްތަ 13:09މިކޭސްގައި މައްސަލަތަކެއް އުޅޭކަން ފާހަގަކުރެވިފައިވޭ
ޅ.ނައިފަރު، އެރަށުގެ ހޮސްޕިޓަލުން ވެސް އަންނަނީ މިމައްސަލަ ބަލަމުން
ޅ. ނައިފަރުގައި އަންހެނެއްގެ ބަނޑަށް ދަރިފުޅު މަރުވި މައްސަލަ ހެލްތް މިނިސްޓްރީން ބަލަން ފަށައިފިއެވެ.
ރާއްޖެއެމްވީއަށް ހެލްތް މިނިސްޓްރީގެ އޮފިޝަލް ވިދާޅުވީ އެ މައްސަލަ މިނިސްޓްރީގެ ސަމާލު ކަމަށް އައިސްފައިވާ ކަމަށެވެ. އަދި މި ކޭސްގައި މައްސަލަތަކެއް އުޅޭކަން ފާހަގަކުރެވިފައިވާ ކަމަށް އޮފިޝަލް ވިދާޅުވިއެވެ.
އޮފިޝަލް ވިދާޅުވީ މައްސަލަ މިހާރު ބަލަމުންދާ ކަމަށާއި، އިހުމާލެއް ވާނަމަ ފިޔަަވަޅު އަޅާނެ ކަމަށެވެ.
ރާއްޖޭގެ ބައެއް މީޑިއާތަކަށް ނައިފަރު ކައުންސިލްގެ މެމްބަރެއް ވިދާޅުވީ ހޮނިހިރު ދުވަހުގެ ރޭގެ ވަގުތެއްގައި އެ އަންހެން މީހާ ބަނޑުގައި ރިއްސާތީ ހޮސްޕިޓަލަށް ދިއުމުން އޭނާ ބެލުމަށް ފަހު ޑޮކްޓަރަކު އަންހެން މީހާ ގެއަށް ފޮނުވާލިއެވެ.
މައުލޫމާތު ލިބިފައިވާ ގޮތުގައި އެ އަންހެން މީހާއަކީ ނ. ހެނބަދޫއަށް ނިސްބަތްވާ މީހެކެވެ. އަދި އޭނާ އަކީ ނައިފަރު މީހަކާ ކައިވެނިކޮށްގެން އެރަށުގައި ދިރިއުޅޭ މީހެކެވެ.
މި މައްސަލަ ހެލްތް މިނިސްޓްރީން ބަލަމުން އަންނައިރު ނައިފަރު ހޮސްޕިޓަލުން ވެސް އަންނަނީ މި މައްސަލަ އިތުރަށް ބަލަމުންނެވެ.
